¹ Eka vatany, mihorohoro amin'izeho gny foko; miala amin'gny toerany. ² Tenoy, oh, tenoy gny fikotaban'gny feony, gny feo ze miboaky lat'amin'gny vavany. ³ Mandefa anizeho egny ambany lagnisy manotolo Izy, dra mandefa gny selam-pahazavany hatragny amin'gny sisin-tany. ⁴ Misy feo mierosy afaran'izeho; mikotrokotroky amin'gny feon'gny voninahisiny Izy; sy manaka gny sela-pahazava hiselasy IZy nofa re gny feony. ⁵ Mahalasa gny fikotrakotroky gny feon'Agnahary; manao raha lahibe ze sy takasisika Izy. ⁶ Fa ho Izy amin'gny oram-panala: ' MIlasaha egny amin'gny tany"; manahaky anizeho koa gny ranon'ora: ' Mizaria ho rosak'ora mivatravatra be'. ⁷ Mapizano gny tagnan'gny lelahy kiraikiarajy amin'gny asany Izy, so hahafahan'gny olo aby ze namboariny hahita reo asany. ⁸ Dra milisy ao amin'gny fivoniany koa ireo bibidia ka mamisaky agny an-zohiny. ⁹ Gny tafio-drivosy avy lat'agny amin'gny efisiny lat'agny asimo, vo gny hasiaky lat'amin'gny fiparitahan'gny rivosy lat'agny avarasy. ¹⁰ Amin'gny alalan'gny fofonain'Agnahary gny mapisy gny ranomandry. Mivainga manahaky gny vy gny rano be midadasiky. ¹¹ Magnavesasy gny raho matevy amin'gny hamandoa vatany Izy; mapiely gny sela-pahazavany amin'gny raho Izy. ¹² Manodikody gny raho araky gny fitarihany Izy, so hahafahan'ereo manao ze andiliany andreo eo ambonin'gny velaran'izao totolo zao. ¹³ Ahiny miseho zeho iaby zeho; kindraikindraiky dra mitranga anizeho ho fagnisia, kindraikindraiky ho an'gny taniny, vo kindraikindraiky ho gny asan'gny faneke mahatoky. ¹⁴ Tenoy izeho, ry Joba; mizanogna dra saino gny momban'ireo asa mahalasan'Agnahary. ¹⁵ Fataniha se gny faneren'Agnahary amin'gny sitrapony amin'gny raho vo fanaovany gny sela-pahazava hiselasy ao amin'ireo? ¹⁶ Takasiniha se gny fihevahevan'gny raho, reo asa mahalasan'Agnahary, zay tonga lafasy amin'gny fahalala? ¹⁷ Takasiniha se gny mahavy reo akazoniha hafana nofa tosy gny tany akory avy lat'agny asimo gny rivosy? ¹⁸ Hanao se afaky mamelasy gny habakabaky manahaky gny ahiny--- dra gny abakabaky, zay fatrasy manahaky gny fitarasy manganohano vita amin'gny vy voarendriky? ¹⁹ Ba apianaro anay ra ze tokony ho zakanay aminazyaminazy, fa zahay sy mahavita mandahasy reo tohan-kevisinay nohon'gny fahamezignan'gny fisainanay. ²⁰ Tokony hizaka ze tiako zaka aminazy se Izy? Misy olo magniry gny ho voately se? ²¹ Amizao, sy afaky magnety gny masoandro nofa mamirasy egny amin'gny habakabaky se gny olo afaran'gny fandalovan'gny rivosy ka napisavany gny raho. ²² Lat'agny avarasy gny hihavian'gny famirapirata volamena--- voninahisy mapatahosy gny eo amin'Agnahary. ²³ No gny amin'gny Tsitoha, sy afaky mahita Anazy sika! Izy dra lahibe amin'gny fahefa; sy mapahory gny rariny Izy sady be fahamarigna. ²⁴ Noho zeho, matahosy Anazy gny olo. Sy magnety reo ze mihevi-tegna ho hendry aby Izy."