¹ Tafaran'izay, nanokasy gny vavany i Joba dra nagnozo gny andro nahaterahany. ² Ho izy ho: ³ " Ho foa ra gny andro gny nahaterahako, gny haly zay nanao ho: " Misy zaza lelahy vo torontorony." ⁴ Ho mezy ra zay andro zay; sy ho saroan'Agnahary boak'agny ambony ra zay, na hamirapirasy amin'izay gny masoandro. ⁵ Gny ezy vo gny aloky gny fahafatesa ra hizaka anizay ho andreo manoka. Hitoboky eo amin'zeho ra gny raho; gny raha aby ze nahavy gny andro ho mainty ra hapihorohoro anizay vatany. ⁶ Gny amin'izeho hariva zeho, hisambosy anizay ra gny ezim-pito. Sy hifaly eo amin'gny andron'gny tao ra zay; sy ho avy amin'gny isan'gny vola ra zay. ⁷ Ingo, ho momba ra zeho hariva zeho; sy hisy feom-pifalia ra ho avy ao amy zaho. ⁸ Hagnozo zeho andro zeho ra ereo, ereo ze mahay gny fomba hamohaza gny Leviatana. ⁹ Ho mezy ra gny vasian'gny andro vo mazava-rasin'izeho. HItalia fahazava ra zeho andro zeho, fe sy hahita; na hahita reo holi-mason'gny vo mazava-rasy, ¹⁰ akory sy nagnily gny vatrangaran'gny trokin'gny reniko zeho, sady akory sy nagnavony reo fahoria sy ho eo amasoko zeho. ¹¹ Nagnino se zaho gny sy maty no fa niboaky boaky tao an-troky? Nagnino zaho gny sy nagnenga gny fagnahiko no niteraky anahy gny reniko? ¹² Nagnino gny nisena anahy reo pokopokony? Nagnino gny nandramby anahy reo nonony mbo hahafahako mitritriky? ¹³ Fa sahala anizay zaho fa nandry am-pilamigna. Natory zaho sady nizano ¹⁴ nindray tamin'ireo pazaka vo reo panolon-sain'gny tany, zay nagnory reo lolo ho an'gny vatan'ereo ze fa rava androany. ¹⁵ Na fa nimaty nindray tamin'ireo andriandahy zay nan volamena fahizay zaho, zay nameno reo fasangeny tamin'gny volafosy. ¹⁶ Na mety ho teraky sy avy vola zaho, sahala reo zaza zay sy mbo nahita gny hazava vatany. ¹⁷ Agny gny mizano amin'gny fahoria gny rasy fagnahy; agny gny mizano gny rokaky. ¹⁸ agny reo voagadra dra hindray hitony; sy mahare gny feon'gny papiasa ereo. ¹⁹ Samby agny gny olo keliky vo lahibe; gny panopoko dra afaky amin'gny tompony agny. ²⁰ Nagnino gny fahazava gny ome anazy zay ao agnatin'gny fahoria? Nagnino gny fiegna gny ome an'ize mafaizy fagnahy, ²¹ ho an'igny raiky ze miamby fatrasy gny fahafatesazay sy ho avy; ho an'gny raiky ze mihaly fahafatesa mihoasy noho gny harena mivony? ²² Nagnino gny fahazava gny ome ho an'gny raiky zay feno hafalia vo ravoravo aby no fa hitany gny lolo? ²³ Nagnino gny fahazava gny ome an'gny olo raiky zay mivony gny lalany, olo raiky say voafehin'Agnahary tao? ²⁴ Fa gny foainko dra miseho mno tokony hihina; miraraky manahaky gny rano gny fitaregnako. ²⁵ Fa gny raha zay natahorako dra gny teo aminahy; zay napatahosy anahy dra avy aminahy. ²⁶ Sy milamy zaho, sy miegny zaho, sady sy mana fizanogna zaho; gny fahoria ndraiky gny avy."