¹ Dra namaly i Elifaza gny Temanita dra nano ho: ² " No misy olo magnandra mizaka aminniha, dra sy haharisy se anao? Fe ia gny afaky handrara gny vatany sy hizaka? ³ Ingo, maro reo fa napenariniha; fa napatazaky gny tagna malemy hanao. ⁴ Nita ze nilavo gny zakaniha; fa nifatrariniha gny malemy pokopoko. ⁵ Akory zao avy aminiha gny fahoria, dra ketraky hanao; mikasiky aniha zay, dra ory hanao. ⁶ Moa sy gny fahatahoraniha gny tokiniha, vo gny fahisian'gny lalaniha gny fagnatenaniha? ⁷ Mbo saigno se zao: ia gny fa ripaky sy nanan-signy? Na ombia gny olo-mary gny nipotehy? ⁸ Araky ze fa hitako, reo ze mamboly hahoria vo mamafy ola gny mizanza anizay. ⁹ Amin'gny alalan'gny fofon'ain'Agnahary gny haharipaky andreo; amin'gny fipoahan'gny hahoriany gny hahalevo andreo. ¹⁰ Gny fieron'gny liona, gny feon'gny liona masiaky, reo nifin'gny liona tanora---potiky reo. ¹¹ Ripaky gny liona antisy nohon'gny sy fahapian''ireo haza, reo zanaky gny liona vavy dra miparitaky egny iaby egny. ¹² Nisy raharaha nandesy mangingiky teto aminahy, dra nahare bisiky manhakasiky anizay gny sofiko. ¹³ DRa nisy eriserisy aby boaky tamin'gny fahita amin'gny hariva, nofa tafalasaky tamin'gny olo gny torimaso lalaiky. ¹⁴ Tagnaty hariva gny nahavian'gny tahosu vo horohoro taminahy, vo nangitakitaky gny tolako aby. ¹⁵ Dra nisy fagnahy nandalo teo agnoloan'gny tarehiko, vo nisanga gny volo tamin'gny vatako. ¹⁶ Nizano gny fagnahy, fe sy nety vafarisiko gny tarehiny. Tarehy raiky gny teo agnoloan'gny masoko; nisy fangikia, vo nahare feo zaho nanao ho: ¹⁷ " Afaky gny ho mary be noho Zagnahary ra gny olo mety maty? Afaky gny ho malio noho gny Mpamoro anazy ra gny olo raiky? ¹⁸ Ingo, no sy mametraky fitokisa amin'ireo panopony Zagnahary; no niapanga reo anzaliny nohon'gny fahamola Izy, ¹⁹ hatreza gny fahamarignan'ireo ze mitoboky agnaty fasange vita amin'gny tanimanga, zay ao amin'gny botany gny fotosy ioregnany, zay potiky mialohan'gny kalalao? ²⁰ Potehy eo agnelagnelan'gny maraindray vo hariva ero; reoaky mandrakizay sy misy mahasikarisy aby ereo. ²¹ Sy voongosy tamin'ereo ra gny talin-dain'ereo? Maty ereo; maty sy misy fahendre ereo.