¹ Dra nanohy niresaky ndraiky Joba dra nanao ho: ² " No mbo velo vatany Zagnahary, zay nanaisotra gny rariny ho anazy, gny Tsitoha, zay napalailay gny fiaignako, ³ no mbo aminahy ato gny aiko, vo eo am-bavoroko gny fofon'ay boak'amin'Agnahary, dra zao gny ho ahiko. ⁴ Sy hizaka faharasia gny sogniko, na hizaka fitaky gny lelako; ⁵ sy hagneky mihisy zaho ho mary andrareo telo; mandra-pahafatiko dra sy handa gny fahisiako mihisy zaho. ⁶ Tanako fatrasy gny fahamarignako sady sy hangako handeha; sy hikoraky anahy mihisy gny eriserisiko no mbo velo zaho. ⁷ Aoky gny fahavaloko hanahaky gny olo rasy fagnahy; aoky ze misanga hanoisy anahy hanahaky gny olo sy mary. ⁸ Fa ino gny fagnatenan'gny pagnarays no fa haringan'Agnahary izy, no fa alan'Agnahary gny ainy? ⁹ Moa ho tenoin'Agnahary gny fitorevany no fa avy aminazy gny fahoria? ¹⁰ Moa hapiravoravo gny vatany amin'gny Tsitoha izy vo hitoka an'Agnahary amin'gny fotoa aby? ¹¹ Hapianasy andrareo mahakasiky gny tagnan'Agnahary zaho; vo sy hanazary gny eriserisin'gny TSitoha zaho. ¹² Ingo, ndrareo aby mihisy gny nahita anahy; koa nagnino se ndrareo gny nizaka zao raha sy misy dikany aby zao? ¹³ Zao gny anzaran'gny olo rasy fagnahy amin'Agnahary, gny lovan'gny papahory zay resiny boak'amin'gny Tsitoha: ¹⁴ No mihamaro gny zanany, dra ho an'gny amesa zay;sy ho apy hany mihisy gny taranany. ¹⁵ Reo ze sisa velo amin'izay dra halevin'gny areti-mandripaky, vo gny valy nengan'ereo sy mbo mitomany andreo. ¹⁶ Ndre dra mamory volafosy manahaky gny botany aza gny olo rasy fagnahy, dra mamory akazo manahaky gny tanimanga, ¹⁷ dra mety hamory akazo avo izy, fa gny olo mary gny hisiky anizay, vo gny olo sy mana-siny hizara gny volafosy eo amin'ereo. ¹⁸ Mananga gny fasengeny manahaky gny hala izy, manahaky gny tragno bongo ze ahin'gny piamby. ¹⁹ Mandry ao am-pandria amin'gny hapagnarivo izy, fe sy hizano amin'izay Izy; manokasy gny masony izy, dra lasa gny raha aby. ²⁰ Mandrendriky anazy manahaky gny rano gny horohoro; mangalaky anazy amin'gny hariva gny tafio-drivosy. ²¹ Andesin'gny rivosy lat'agny asignana izy, vo lasa; mamafa anazy sy ho eo amin'gny toerany anizay. ²² Mapifatrasy gny vatany agny aminazy anizay vo sy mizano; miezaky gny milefa miala gny tagnany izy. ²³ Miteha-tagna anazy amin'gny fanesoa anizay; misiosioky anazy hila amin'gny toerany zay.