¹ Dra namaly i Joba dra nizaka ho: ² " Fa nahare raha manahaky anizay maro zaho; papiono mahonena aby handrareo. ³ Mbo hisy fitaperany se reo zaka sy misy fotony? Ino gny raha manahira gny dra mamaly manahaky anizao hanao? ⁴ Afaky mizaka manahaky andrareo avo koa zaho, no handrareo gny teo amin'gny toeraka; afaky mangoro vo manambasy zaka zaho andesy hanohera andrareo vo hagnifikifiky gny lohako amindrareo amin'gny eso. ⁵ Eh, te hapahery andrareo amin'gny vavako zaho! Endrey gny ho hamevan'gny fapiononan'gny molosiko gny alahelondrareo! ⁶ No mizaka zaho, dra mihe gny alaheloko; no misigny kosa zaho, manao akory gny hagnapia anahy? ⁷ Fa amizao, ry Zagnahary, dra novalahinao zaho; noravano gny fianakaviako iaby. ⁸ Nohamainao zaho, zay vavolombelo manohisy anahy avo; nisanga hagnameloky anahy gny fahian'gny vatako, vo vavolombelo manohisy gny tavako zay. ⁹ Tao agnaty hahoria gny namotehn'Agnahary vo nagnitrifany anahy; nihily vaza taminahy Izy; dra nanondro maso anahy gny fahavaloko no mbo nandrava anahy Izy. ¹⁰ Nisagnasagna vava taminahy gny olo; nitapifin'ereo tamin'gny fanomeza-signy gny fifiko; nindray nivondro hanohisy anahy ereo. ¹¹ Atolosin'Agnahary eo amin'gny olo pagnirasira zaho, sady atorakiny egny an-tagnan'gny olo rasy fagnahy. ¹² Nilamy zaho, dra nopotehy. Eka vatany, nirambesiny tamn'gny vozo zaho dra narindriny ho momoky; nahiny mariky ho kendreny avo koa zaho. ¹³ Mipalipalisy anahy reo panipy gny zana-sipikiny; sindronin'Agnahary sy hanagnahantra gny voako; ararakiny amin'gny tany gny aferoko. ¹⁴ Velesiny hatragny hatragny gny rindriko; milomay magnato anahy manahaky gny pialy Izy. ¹⁵ Nizeriko teo amiholisiko gny akazo fandala; fa naletiko tao amin'gny tany gny tandroko. ¹⁶ Menan'gny tomagny gny tarehiko; eo amin'gny holimasoko gny aloky gny fahafatesa ¹⁷ ndre dra sy misy herisetra aza gny tagnako, dra malio gny fivavako. ¹⁸ Ry tany o, ka lombofa gny lioko; ao sy hana toera hisahara gny fitomagniako. ¹⁹ Ndre amizao aza, ingo, agny an-dagnisy gny vavolombeloko; agny amin'gny avo piatoky anahy. ²⁰ Magnirasira anahy reo namako, kanefa mandrosa-dranomaso ho an'Agnahary gny masoko. ²¹ mangatakyt zay vavolombelo tagny an-danisy zay zaho mbo hialy ho an'itiky lelahy tiky eo amin'Agnahary manahaky gny ahin'gny olo amin'gny piara-belo aminazy zaho! ²² Fa afaky tao kelikeliky, dra ho agny amin'gny toera raiky zay sy hiheregnako sasy zaho.