¹ Dra namaly Elifaza Temanita dra nanao ho: ² " Tokony hamaly amin'gny fahalala sy misy dikany se gny olon-kendry raiky ka hameno gny tegnany amin'gny sioky boakagny asignana? ³ Tokony handahasy amin'gny zaka sy mahasoa ⁴ Eka vatany, mapietry voninahisin'Agnahary hanao; manaisotry gny fanoloran-tegna ho Anazy hanao, ⁵ fa gny siakao gny mapianasy gny vavanao; mifily gny hana gny lelan'gny olom-pesy hanao. ⁶ Gny vavanao avo gny magnahy anao, fa sy gny anahy; gny sogninao avo gny mihazo anao. ⁷ Moa hanao gny olo teraky volohany? Moa nahy nisy talohan'ireo havoa avo hanao? ⁸ Moa se fa nahare gny fahalala mivonin'agnahary hanao? Moa feranao ho amin'gny vatanao avo gny fahendre? ⁹ Ino gny fatanao ze sy fantasinay? Ino gny takasinao ze sy aminay avo koa? ¹⁰ SAmby miaraky aminay reo fosy volo vo reo lelahy voky tao ze antisy mihoasy noho gny ranao. ¹¹ Moa masaiky loasy ho anao gny fapiononan'Agnahary, dra reo zaka malefaky aminao? ¹² Nagnino gny manday anao hivio gny fonao? Nagnino hanao gny mipipi-maso, ¹³ hany dra mivaliky amin'Agnahary gny fagnahinao ka mamoaku zaka sahala anizay boak'amin'gny vavanao? ¹⁴ Ino moa gny olo gny tokony halio? Ino moa ze nateraky apela gny tokony ho mary? ¹⁵ Ingo, Zagnahary dra mametraky fitokisa ndre dra amin'ireo masiny aza; eka vatany, sy malio eo amasony gny lagnisy; ¹⁶ meky fa gny hasaikin'gny fahadiovanao zay mapangelakelaku sady rasy toetra, lelahy mino heloky manahaky gny rano! ¹⁷ Haboako anao; mitenoa anahy; hagnambara aminao reo raha ze hitako zaho, ¹⁸ reo raha ze nizakain'gny olon-kendry boaky tamin'ireo rany, reo raha ze sy mbo navonin'gny razambeny. ¹⁹ Reo gny razan'ereo, zay hany nome gny tany, vo zay sy mbo nandalovan'gny vahiny mihisy. ²⁰ Gny olo rasy fagnahy dra mizaly am-pararia amin'gny androny aby, zay isan'gny tao napetraky hizalian'gny papahory. ²¹ Misy feo fempitaho eo an-sofiny; no hahazo izy, dra ho avy aminzay gny pandripaky. ²² Sy mihevisy izy fa hihery boakao amin'gny ezy; mandigny anazy gny amesa. ²³ Mandeha agny amin'gny toera isan-karazany izy mbo hitalia mofo, manao ho: 'Eza zay?' Fatany fa atomosy gny andron'gny fahamezigna. ²⁴ Mapatahosy anazy gny fahoria vo gny fangirifiria; fa mahagio anazy ereo, manahaky gny pazaka vonon-kialy. ²⁵ Akory nanindrisy gny tagnany hanohisy an'Agnahary izy sady nieboebo nanohisy gny Tsitoha, ²⁶ dra nilomay magnagny amin'Agnahary amin'gny fahamafisan-katoky zay lelahy rasy fagnahy zay, mindray amin'gny apinga matevy. ²⁷ Mary zay, ndre dra nagnavony gny tarehiny tamin'gny taviny vo mamory tavy ho an'gny valahany aza izy, ²⁸ vo nitoby tao amin'gny tana lao; tagny amin'gny tragno ze sy misy mipetraky amizao vo ze fa vono gny ho nahy korotam-bato. ²⁹ Sy ho pagnarivo izy; sy haharisy gny hareny; ndre gny aloky aza dra sy haharisy an-tany etoky. ³⁰ Sy hiboaky boakao amin'gny ezy izy; hisy afo handevo gny mololony; vo amin'gny fofonay boak'amin'gny vavan'Agnahary gny halasany. ³¹ Aoky izy sy hatoky raha fahatany, ka hamitaky gny ainy; fa gny raha fahatany gny ho valisoany. ³² Hisy mialohan'gny tokony hahavian'gny fotoa hahafatesany zay; vo sy ho meso gny rasany. ³³ Haninsa gny vihy sy matoiny manahaky gny voaloboky izy; vo hapiraraky gny voniny manahaky gny hazon'oliva. ³⁴ Fa gny atokon'gny pagnarasy dra ho momba; handevo gny lain'gny kolikoliny gny afo. ³⁵ Sompasy gny torotoroniny vo heloky gny haterakiny; fitaky gny torotoronin'gny trokin'ereo "