¹ Aminahy ato gny Fagnahin'gny Tompo Yaveh, akory nagnosotry anahy hitory vaovao mahafaly amin'ize ory i Yaveh. Nagniraky anahy so hagnasitra gny marary am-po Izy, so hagnambara fahafaha amin'ireo ze babo, vo fisokafan'gny fonza ho an'ireo ze voafatotry. ² Nagniraky anahy so hagnambara gny tao fankasitrahan'i Yaveh, gny andron'gny valifatin'gny Zagnaharisika, vo ba ha[iegny an'ize iaby mandala Izy. ³ Nagniraky anahy Izy--- so hagnome ho an'ereo ze mandala ao Ziona--- so hagnome satroky ho andreo fa sy lavenoky, dililom-pifalia fa sy fandala, lamba fidera ho solon'gny faharokfan'gny fagnahy, so hitokava andreo ho hazon'gny fahamarigna, gny nambolen'i Yaveh, so homem-boninahisy izy. ⁴ Hananga reo rava taloha ndraiky ereo; hapihery reo fandrava teo aloha ndraiky ereo. Hapihery reo tana rava ndriky ereo, reo fandrava tamin'gny taranaky maro teo aloha. ⁵ Hisanga dra hamaha an'ireo agnondry aman'osindrareo reo vahiny, vo reo zanaky lelahin'gny vahiny hiasa gny sahandrareo vo gny tanim-boalobokindrareo. ⁶ Ho tokavy ho pisoron'i Yaveh handrareo; hitoka andrareo ho panopon'gny Zagnaharisika ereo. Hihina gny haren'ireo firene handrareo, dra hirehareha amin'gny haren'ereo. ⁷ Hahazo avo ro heny handrareo solon'gny hegnasindrareo; dra hifaly amin'gny fizaran'ereo handrareo solon'gny fahafaham-baraka. Noho zeho ereo dra hahazo zara avo ro heny amin'gny tanin'ereo; hafalia mandrakizay gny ho andreo. ⁸ Fa Zaho, Yaveh, dra tia gny rariny, vo halako gny fandroba vo gny herisetra sy ara-drariny. Hamaly andreo am-pahamarigna Zaho, sady hanao faneke mandrakizay amin'ereo. ⁹ Ho fatasy eo amin'ireo firene gny taranah'ereo, vo eo amin'ireo vahoaky gny zanak'ereo. Ze iaby mahita andreo dra hagneky andreo, fa ereo gny vahoaky ze nitahin'i Yaveh. ¹⁰ Hifaly tateraky amin'i Yaveh zaho; ho ravo ao amin'gny Zagnahariko zaho. Fa Izy gny napisiky anahy tamin'ireo fitafian'gny famonze; napisiky anahy tamin'gny akazo lavan'gny fahamarigna Izy, manahaky gny panpakasy mandravaky gny vatany amin'gny satroky, vo manahaky gny apankary mandravaky gny vatany amin'gny firavakiny. ¹¹ Fa manahaky gny tany mapisimoky gny raha misiry ao aminazy, gny hapisirian'i Yaveh fahamarigna vo fisiriria eo agnatrehan'gny firene aby.