¹ Ingo, gny tagnan'i Yaveh sy fohiky ra dra sy hahavonzy; vo gny sofiny sy maregniregny, dra sy hahare. ² Gny asa rasindrareo, fe, gny napisaraky andrareo tamin'gny Zagnaharindrareo, vo gny fahotandrareo gny nahavy Anazy hagnavony gny tarehiny amindrareo dra sy hiteno andrareo. ³ Fa tasin'gnylio gny tagnandrareo vo gny rasan-tagnandrareo tasin'gny fahota. Mizaka vandy gny sognindrareo vo gny lelandrareo mizaka amin-kafese. ⁴ Sy misy mitoka gny mary, sady sy misy mifona amin'gny fahamarigna. Mitoky amin'gny zaka fahatany ereo, dra mizaka vandy; vandy gny torotorogniny vo fahota gny aterany. ⁵ Mikotriky atolim-bibilava feno poizy ereo dra magneno tragnon-kala. Ze iaby mihina gny atoliny dra maty, vo no misy atoly vaohisaky, dra foy ho bibilava feno poisy zeho. ⁶ Sy azo apesa hahy akazo gny tragno-kalany, na afaly magnoro gny vatany gny asany. Asan'gny fahota gny asany, vo gny asan'gny herisetry gny eo an-tagnany. ⁷ Mihazakazaky ho agny amin'gny rasy gny tombony, vo mihazakazaky handasaky lio sy mana-syigny ereo. Fihevisy fahota gny fihevisiny; herisetry vo fandrava gny lalagnany. ⁸ Gny lalagnan'gny fiadagna sy bo fatas'ereo, dra sy misy rariny eo amin'gny lalany. Nagnamboasy lala-meloky ereo; ze iaby mandeha amin'izeho lala zeho dra sy mahita fiadagna. ⁹ Noho zeho dra lavisy anay gny rariny, sady sy mahatratry anany gny fahamarigna. Mandigny fahazava zahay, fe mahita ezy; mitalia famirapirata zahay, fe mandeha amin'gny ezy. ¹⁰ Misapasapa rindry manahaky gny poaky zahay, manahaky reo ze sy mahita. Voafinga amin'gny dizerabenagnahary zahay manahaky gny ho amin'gny takariva; eo amin'gny reo mahery dra manahaky gny olo maty zahay. ¹¹ Mierosy manahaky gny bera zahay dra mitolokoloko manahaky gny voromailala; miaby rariny zahay, fe sy misy; maimby fagnavota, fe lavisy anay zeho. ¹² Fa eo agnoloaniha gny helokinay, vo gny fahotanay gny miapamga anay; fa gny helokinay dra mindray aminay, sady fatasinay gny fahotanay. ¹³ Nikomy zahay, nanda an'i Yaveh sady niala tamin'gny fagnaraha gny Zagnaharinay. Nizaka fapahoria zahay dra nivio lala, namoro fitaraigna boaky tao am-ponay vo zaka vandy. ¹⁴ Nala gny rariny, dra mizoro lavisy dra lavisy gny fahamarigna; fa tafitohy egny akalamanzagna gny fahamarigna, dra sy ho aby gny mary. ¹⁵ Fa difisy lavisy gny fahamendreaham-pitokisa, vo gny raiky ze miala amin'gny rasy gny mahavy ny vatany ho tra-doza. Hitan'i Yaveh zeho dra sy faly Izy fa sy misy gny rariny. ¹⁶ Nahita Izy fa sy misy olo, dra lasa fa sy mbo misy milisy an-sehasy. Noho zeho dra tagnany avo gny nanday famonze ho Anazy, vo gny fahamarignany gny nanoha Anazy. ¹⁷ Mitafy fahamarigna ho saron-tratra Izy vo garo-loha famonze eo amin'gnylohany. Nitafy akazo vaalifaty izy dra nanao gny zoto-po ho aron'akazo. ¹⁸ Nivaliany noho ze vitany ereo, dra fisara feno hahoria amin'gny rafiny, famalia ho an'gny fahavalony, vo fatrokafa ho valim-pitian'ireo. ¹⁹ Koa dra hatahosy gny agnaran'i Yaveh lat'agny andrefa ereo, vo gny voninahiny lat'agny amin'gny fiposahan'gny masoandro; fa ho avy manahaky gny mipaoky Izy, ze andesin'gny fofonain'i Yaveh. ²⁰ "Misy pagnavosy avy ao Ziona vo amin'ireo ze miala amin'gny asany feno fikomia ao amin'i Jakoba--- zeho gny fagnamabarn'i Yaveh. ²¹ No gny aminahy, dra zeho gny fanekeko amin'ereo--- ho Yaveh--- gny faganhiko ze ao amin'ereo, vo gny zakako ze napetrako teo am-bavaniha, dra sy hiala amin'gny vavaniha, na hiala amin'gny vavan'ireo zanakiniha, na hiala amin'gny vavan'ireo zafiniha--- ho Yaveh--- manomboky zeho dra ho mandrakizay."