¹ Zeho gny zakan'i Yaveh: "Tandremo ze mary, manaova ze rariny; fa mriny gny famonzeko, sady fa haseho gny fahamarignako. ² Voatahy gny olo ze manaho, sady mita fatrasy anizeho. Izy dra mitandry gny Sabata, fa sy mandoto anizeho, dra mifehy gny tagnany amin'gny fanaovan-drasy." ³ Aoky gny hafa firene ze avy pagnaraky an'i yaveh sy hisy hanao ho: "Hangalaky anahy ao amin'ireo vahoakiny vatany Yaveh." Gny tandapa sy tokony hizaka ho: "Ingo zaho fa hazo maiky." ⁴ Fa zeho gny zakan'i Yaveh: "Ho an'ireo tandapa ze mitandry reo Sabatako, vo misafidy gny ankasitrahao, dra mita gny fanekeko, ⁵ ho andreo gny hananganako ao am-pasangeko vo ao agnatin'gny fefiko gny sangam-bato ze soa kokoa nohon'gny manan-zanaky lelahy vo zanaky apela. Hagnome andreo sangam-bato maharisy mandrakizay ze sy ho kapay mihisy Zaho. ⁶ Reo hafa firene ze mindray amin'i Yaveh avo koa_so hanopo Anazy, vo reo ze tia gny agnaran'i Yaveh_so hisiriry Anazy, gny olon'aby ze mitandry gny Sabat, ze mita amin'gny sy fandotoa anizeho, vo ze mita gny fanekeno ⁷ _dra ho andesiko agny an-tendrombohisiko masy dra hapiravoravoko ao am-pasange fivavahako ereo; gny fagantisy orony vo gny soron'ereo dra hele eo ambonin'gy alitarako. Fa gny fasangeko hotokavy ho fasange fivavaha ho an'gny firenen'aby, ⁸ zeho gny fagnambaran'i Yaveh Tompo, ze mamory reo vahoakin'Israely_mbo hamory reo hafa ho fagnapin'ereo Zaho." ⁹ Handrareo bibidia aby agny an-saha, avia dra arapao, handrareo bibidia aby agny agn'ala! ¹⁰ Reo pitily anazy aby dra poaky, sy mahatakasy ereo. Amboa moa aby ereo dra afaly mivovo. Manofy, sy misilailay ereo sady tia matory. ¹¹ enda-kany vatany reo amboa; sy mety visy mihisy ereo; piaraky agnondry sy mahay magnavaky ereo; nivoa tamin'gny lalany aby izy aby reo, samby fatra-pitia tombony sy ara-drariny gny kiaraikiraiky. ¹² " Avia" ho ereo: "Ndao hino divay vo toaky sika. hanahaky gny androny avo gny hamaray, gny andro lahibe tafahoasy."