¹ " Mihira, ry apela momba, handrareo ze sy niteraky; miravoaravoa amin'gny hiram-pifalia dra mikoroha fatrasy, handrareo ze sy bo nihesi-zaza. Fa gny zanaku gny panday vata dra maro kokoa noho gny zanaky gny apela manambaly," ho i Yaveh. ² Ahivo lahibe kokoa gny laindrareo dra velaro ambain-daindrareo, velaro soa; alavao gny talindrareo dra hafatraro gny soto-kazondrareo. ³ Fa hiely gny akavagna vo agny akavia handrareo, vo reo taranakindrareo dra handresy reo firene dra hitoby amin'gny tana lao. ⁴ Ka matahosy fa sy ho megnasy handrareo, na kivy fa sy ho afa-baraka handrareo; hagnaligno gny hegnasy gny hatanorandrareo vo gny fahafaham-barakan'gny fanenga andrareo handrareo. ⁵ Fa gny Pahary andrareo gny valindrareo, Yaveh tompon'gny maro gny Agnarany. Gny Raiky Masin'Israely gny Pagnavosy andrareo; Izy dra tokavy ho Zagnahary gny tany aby. ⁶ Fa Yaveh fa nihery nitoka andrareo hanahaky gny valy ze nenga vo malahelo am-panahy, manahaky gny apela nanambaly tanora dra naria," ho gny Zagnaharindrareo. ⁷ " Fa nagnary andrareo nandrisy gny fotoa fohiky Zaho, fa amin'gny fangoraha lahibe gny hangorahako andrareo. ⁸ Selasela avo gny hagnavoniako gny tarehiko tamindrareo; fa amin'gny tondra-dranon'gny hahoria; fa amin'gny faneke mahatoky sy mana-pitapera gny hangorahako andrareo--- ho i Yaveh, gny raiky ze magnavosy andrareo. ⁹ Fa zehi dra manhaky gny tondran-dranon'i Noa Aminahy: manahaky gny nifatako fa gny tondran-dranon'i Noa dra handalo amin'gny tany sasy, gny hifatako fa sy ho roy amindrareo na hizaka fatrasy andrareo Zaho. ¹⁰ Ndre hilavo aza reo tendrombohisy ndre koa hiozongozo aza reo havoa, gny fitiavako sy miova koa dra sy hiodiky amindrareo , na gny fiadagnako manhatoky ho voaozongozo--- ho i Yaveh, ze mamindra fo andrareo. ¹¹ Handrareo ory, afotofoton'gny tafio-drivosy sady dy mana fapionona, ingo, ho ahiko amin'gny vatosoa gny rarivatondrareo, vo amin'gny safira gny hametrahako gny fotosindrareo. ¹² Hahiko robina reo tilikambondrareo vo amin'gny vato mamirapirasy gny vavahadindrareo, vo gny fefindrareo agny iveny amin'gny vato soa tarehy. ¹³ Dra i Yaveh gny hapianasy reo zanadrareo aby, dra ho lahibe gny fiadagnan'ireo zanandrareo. ¹⁴ Amin'gny fahamarigna gny hagneregnako andrareo amin'gny laoniny. Sy hiay fagnitrifa sasy handrareo, dra sy hatahosy handrareo, sady sy hisy ndre ino ndre ino mapitahosy ho avy eo agnilandrareo. ¹⁵ Ingo, no misy olo mitariky korota, dra sy baoky Aminahy zeho; ndre ia ndre ia mitariky korota eo amindrareo dra ho lavo amin'gny faharese. ¹⁶ Ingo, fa nahary panao asa tagna, ze misoky gny bain'efo mirehisy vo manefy fitaovam-pialia ho asany Zaho, vo fa nahary gny pamotiky bo hamotiky Zaho. ¹⁷ Sy misy fitovam-pialia ze voafor hanohisy andrareo haharesy; vo handrareo dra hagnameloky ze iaby miapanga andrareo. Zeho gny lovan'ereo panopon'i Yaveh, vo gny fagnamarignan;ereo baoky Aminahy--- zeho gny fagnambaran'i Yaveh."