¹ Zeho gny zakan'i Yaveh: "Eza gny fagnamarignam-pisaraha ze nisarahako tamin'gny renindrareo? Ia tamin'ireo papisambosy Anahy gny nivarotako andrareo? Ingo, navily handrareo oho reo fahotandrareo,vo noho reo fikomiandrareo, dra nalefa nandeha gny renindrareo. ² Nagnino Zaho gny avy fe sy nisy olo tagny? Nagnino Zaho gny nitoka fe sy nisy nalmaly? Sa fohiky loasy gny tagnako so hagnavosy andrareo? Sa ra sy nanan-kery Zaho so hamonzy andrareo? Ingo, amin'gny fizakako fatrasy gny andritako gny ranomasy; hanao reo ony ho efisy Zaho; matin'gny sy fisian-drano vo hetaheta gny hazan-dranony. ³ apitafiko ezy gny habakabaky, lamba fandala gny agnarognako anizeho." ⁴ Gny Tompo Yaveh nagnome anahy lela manahaky reo ze fa napianary, so hizakako zaka mapahery ho an'gny rokaky; mamoha anahy isaky maraindray Izy; mamoha gny sofiko so hiteno manahaky reo napianary Izy. ⁵ Fa nanokasy gny sofiko Yaveh, ka dra sy bo nikomy zaho, na nihodiky nagnagny afara. ⁶ Nomeko ho an'ireo ze nizera anahy gny lamosiko, vo gny tarehiko ho an'ireo ze nagnombosy gny volom-bavako; sy nagnavony gny tarehiko tamin'ireo fihesiky mahamegnasy sady mapadikidiky zaho. ⁷ Fa gny Tompo Yaveh gny hagnapy anahy; noho zeho dra sy ho afa-baraka zaho; koa dra fa nanao gny tarehiko ho afovato zaho, akory fatako fa sy ala baraka zaho. ⁸ Izy ze hagnamary anahy dra akekiko eo. Ia gny hanohisy anahy? Ndao sika hisanga dra hifagnatriky. Ia gny piapanga anahy? aoky izy hagnriny anahy. ⁹ Ingo, gny Tompo Yaveh gny hagnapy anahy. Ia gn hagnameloky anahy? Ingo, izy aby reo ho driasy manahaky gny akazo, gny kalalao gny hihina andreo. ¹⁰ IA amindrareo gny matahosy an'i Yaveh? Ia gny magneky gny feon'gny panopony? Ia gny mandeha amin'gny ezy laliky sy misy fagnilo? Tokony hatoky amin'gny agnaran'i Yaveh izy dra hiantehisy amin'Agnahariny. ¹¹ Ingo, handrareo aby ze mandrehisy afo; ze mivasy fagnilo; mandehana amin'gny hazavan'gny afondrarao vo amin'gny afo ze fa narehisindrareo. Zeho gny fa nirambesindrareo boaky aminahy, dra handriandrareo egny amin'gny toeran'gny fanhararia.