¹ Mitenoa zao, ry taranak'i Jakoba, ze nitokavy tamin'gny agnaran'gny Israely, vo ze boaky tamin'gny ranon'ain'i Joda, hanao ze mifata amin'gny agnaran'i Yaveh sady mangataky gny Zagnahary gny Israely, fe sy tamin-kisipo na fomba mary. ² Fa mitoka gny vatany gny vahoakin'gny tana masy ereo sady matoky an'Agnahry gny Israely. Yaveh Tompon'gny maro gny agnarany. ³ " Fa voazakako gny raha tamin'gny taloha; naloaky gny vavako ereo, sady napallaza andreo Zaho; Dra tapoky gny nanaovako andreo sady avy bo andalo ereo. ⁴ Akory nahafatasy Zaho fa be-dia-doha hanao, gny hozasy gny hatokiniha dra manahaky gny vy, vo gny handriniha dra manahaky gny saba. Ko dra nambarako taminiha mialoha zeho raha zeho, ⁵ mialohan'gny isehoan'izeho dra fa nizaka aniha Zaho, dra sy tokony hizaka hanaoho: 'gny sapiko gny fa nanao andreo,' na 'gny sari-sokiso vo sarin-drahako an'idina gny nandily zeho raha zeho.' ⁶ Fa nahare anizeho raha zeho hanao; atio gny porofon'izeho raha zeho, vo hanao, sy hagneky se hanao fa zay voazakako dra mary? Manomboky zao, mapiseho aniha raha vaovao Zaho, raha mivony ze sy bo fataniha. ⁷ Vo zao, dra sy tamin'gny teo aloha, akory avy ereo, vo gny talohan'gny androany dra sy bo nahare gny mahakasiky andreo hanao, dra sy afaky gny hizaka hanao ho, 'eka, zaho mahafatasy andreo.' ⁸ Sy bo nahare mihisy hanao; sy nahay hanao; zeho raha zeho dra sy nahy ho an'gny sofiniha mialoha. Fa fataniha fa hanao dra tena pamitaky,sady fa pikomy hatragny an-troky. ⁹ Fa nohon'gny agnarako dra leferiko gny hahoriako, vo nohon'gny voninahisiko gny hisalsalako gny amin'gny fandrava aniha. ¹⁰ Ingo, voalioko hanao, fe sy manahaky gny volafosy; fa nagnadio aniha tao amin'gny lafaoron'gny fahoria Zaho. ¹¹ Nohon'gny vatako, eka nohon'gny vatako gny hanaovako anizeho; fa akory gny anengako gny agnarako ho fahafaham-baraka? Sy homeko olon-kafa gny voninahisiko. ¹² Mitenoa anahy, ry Jakoba, vo ry Israely, ze nitokaviko: Zeho gny izy; Zaho gny volohany, vo Zaho avo koa gny farany. ¹³ Eka, gny tanako mametraky gny fagnorena eo amin'gny tany, vo gny tagnan'gny olo mary hovelary amin'gny lagnisy; Nofa mitoka andreo Zaho, dra mindray misanga ereo. ¹⁴ Mivoria handrareo, handrareo iaby, dra mitenoa! Ia teo amindrareo gny fa nagnambara anizeho raha zeho? Ze tian'i Yaveh gny hagnataterako gny tanzony hanohisy an'i Babylona. Hagnatateraky ze tian'i Yaveh hanohera reo Kaldeana. ¹⁵ Zaho, fa nizaka zaho, eka, fa napitoka anazy Zaho, fa nanday anazy Zaho, dra hahomby izy. ¹⁶ Mandehana akekiko eto, mitenoa zeho: Hatragny am-piandoha gny fa sy nizakako tamin'gny mangingiky; nofa miseho zeho, dra eto Zaho." Amizao Yaveh Tompon'gny maro gny nagniraky anahy, vo gny Fagnahiny. ¹⁷ Zeho gny nambaran'i Yaveh, pagnavosy aniha, gny Toka Masin'gny Israely: "Zaho gny Yaveh Zagnahariniha, ze mapianasy aniha hahomby, ze mitariky aniha amin'gny lala ze tokony andehananiha. ¹⁸ No ba fa nagneky gny liliko hanao! Dra fiadananiha vo gny fagnambinaniha gny hikoria sahala gny ony, vo gny famonzeniha dra sahala reo onzan-dranomasy. ¹⁹ Sy ho hita isa sahala gny fasiky reo taranakiniha, vo gny zanaky aloaky gny trokiniha hitovy isa sahala gny sombim-pasiky; gny agnaran'ereo dra sy ho tapaky na ho foa boaky eo agnoloako. ²⁰ Miboaha hiala agny Babylona! milefasa reo Kaldeana! Ambarao amin'gny feo koraky zeho! Ahivo malaza zeho, aelezo hatragny am-paran'gny tany zeho! Zakao ho: 'Fa nagnavosy an'i Jakoba panopony i Yaveh,' ²¹ Sy nangetahateha ereo no nandesiny tany an'efisy; napikoria gny rano boaky tamin'gny vatolapy ho andreo izynapitresaky gny vatolapy izy, dra niboiboiky reo rano. ²² Sy misy fiadana ho an'gny rasy fagnahy-hoy Yaveh."