¹ Amin'zay andro zay tiky hira tiky gny hiray gny amin'gny tanin'gny Joda: mana tana fatrasy zahay; Zagnahary fa nanao gny famoze ho rindrin'zay vo tovon-tany ferova. ² Voaho gny vavahady, bo ahafahan'gny firene mary ze mita finoa milisy ao. ³ Gny say ze mitoesy ao aminao, hotehirinao amin'gny fiadagna tateraky izy, akory mitoky aminao; ⁴ matokia an'i Yaveh mandrakariva; fa ao amin'i Yah, Yaveh, gny vatolapy sy mana-pahatapera. ⁵ fa hapizesy reo ze miay amim-piavognavogna Izy; gny tana mifefy harodany.Harodany amin'gny tany; fisahany egny amin'gny vovoky zay. ⁶ Ho voahisaky gny tombony gny mahatra vo gny lian'gny ory zay. ⁷ Voaravo gny lalan'gny olo-mary, Gny Mary, ahisinao gny lalan'gny mary. ⁸ Eka, amin'gny lalan'gny fisaranao, ry Yaveh, gny andignasanay Anao; gny Agnaranao vo gny lazanao gny fagnirianay. ⁹ Many Anao zaho no hariva; eka, mitalia Anao fatrasy gny fagnahy ato aminahy. Fa no fa avy etiky ambon'gny tany gny fisaranao, dra hahay gny fahamarigna gny ponin'gny tany. ¹⁰ Aoky haseho amin'gny rasy fagnahy gny sitraky, fa sy hahay gny fahamarigna zay izy. Agny amin'gny tanin'gny fahisia gny hanehoanay faharasia ka sy mahita gny voninahis'i yaveh. ¹¹ Ry Yaveh, misondrosy tagnanao fe sy sikaris'ereo zay. Fe ho hitan'ereo gny zotp-ponao amin'gny vahoaky ka hala baraka, akory handevo andreo gny afon'ereo pifanigna aminao. ¹² Ry Yaveh, hinday fiadagna ho anay Hanao; akory fa, nahavita reo asanay ho anao Hanao. ¹³ Ry Yaveh Zagnaharinay, tompo hafa maro ankoasy Anao gny fa nanapaky teo aminay; fe gny agnarano raiky avo gny siriritinay. ¹⁴ Maty ereo, fa sy bo ho velo; nodimandry ereo, fa sy bo hisanga. Avy tamin'gny fisara vatany Hanao sady handripaky anazy regny, ka hagnafoa gny fahasiarova andreo aby. ¹⁵ Fa napitombo gny firene Hanao, ry Yaveh, fa napitombo gny firene Hanao; fa nagnitasy reo farisy gny tany aby Hanao. ¹⁶ Ry Yaveh, tamin'gny horohoro gny nagnitian'ereo Anao; nibisiky vavaky ereo no fa tao amin'ereo gny fagnanaranao. ¹⁷ Manahaky gny apela bevoka mariny andro hiteraha, amin'gny fotoa mapihesi-zaza anazy dra mitaray amin'gny fiteraha, dra manahaky anizay koa zahay eo agnolonao, ry Tompo. ¹⁸ Fa ninday vohoky zahay, fa nihesi-zaza zahay, fe zay dra manahaky gny miteraky rivosy avo. Bo sy ninday famoze tamin'gny tany zahay, vo bo sy potraky reo ponin'gny tany. ¹⁹ Hisanga gny maty ao amiano; hisanga gny fatin'ereo. HIfoha ka hihira fifalia, hanao ze mitoesy amin'gny vovoky; fa gny andonao dra andom-pahazava, vo gny tany hinday mihoasy efasy heny reo maty aminazy ao. ²⁰ Mandehana, ry vahoakiko, milira agny an'efitragnonao, ka hilio reo vatrangarandrareo; mivonia ao agnatin'gny fotoa visy, mandra-pahalasan'gny fahasosora. ²¹ Fa, ingo, fa hiala avy ao amin'gny toerany ba hagnasazy gny ponin'gny tany noho gny helok'ereo Yaveh; hapiharihary gny fandasahan-diony gny tany, vo sy hagnavony gny faty ao aminazy sasy.