¹ Ingo, hagnafoa gny tany Yaveh, handrava anizay, hahalao anazy vo hapiely reo poniny. ² Ho sahala amin'izay gny ho an'ireo poniny, gny pisoro; gny panopo, gny topony, piasa atragno; gny topovaviny, gny pivily, gny pivarosy; gny pagnomia trosa, gny pitrosa; gny pandray zanabola, vo pagnomia zanabola. ³ Ho rava tateraky gny tany sady ho foagna tateraky; akory Yaveh gny fa nizaka zay zaka zay. ⁴ Maiky vo malazo gny tany, milofoky vo malazo zao totolo zao, mihaosa gny olo malazan'gny tany. ⁵ Niloton'gny poniny gny tany akory fa nandika gny lalana, nagnota gny lily, sady nivaliky tamin'gny fagneke maharisy mandrakizay ereo. ⁶ Noho zay dra mandevo gny tany gny ozo, sady diso reo poniny. Ma reo ponin'gny tany, vo visy gny sisa tavela. ⁷ Maiky reo divay vaovao, malazo gny voaloboky, miseto aby reo faly am-po. ⁸ Misahasy gny feo mandrosirosin'gny apongatapaky, vo gny fitabataban'ereo mifaly; misahasy gny fifalia amin-dokanga. ⁹ Sy mino divay na mihira sasy ereo, vo gny toaky dra nafaisy ho an'ereo ze nino anizay. ¹⁰ v10 Rava gny tanan'gny fikorotagna, mihily sady foa aby reo tragno aby. ¹¹ Misy tabataba nohon'gny divay egny an-dalambe; mezy gny haravoa, nazavo gny fifalia. ¹² Faharava sisa gny eo amin'gny tana, vo gny vavahady dra potiky. ¹³ Fa sahala aminzay gny ho amin'gny tany aby eo amin'gny firene, manahaky gny hazo oliva voazera, manahaky gny fisiponam-boaloboky no fa vita gny fiotaza. ¹⁴ Handrasy gny feony sady hitoka gny voninahisin'Agnahary, vo hihiaky apifalia boak'amin'gny ranomasy ereo. ¹⁵ Noho zay dra makalaza an'i Yaveh agny asignana, magnomeza voninahisy gny agnaran'i Yaveh, gny Zagnaharin'Israely ao amin'ireo nosy. ¹⁶ Hatragny aparan'gny tany gny naharezanay hira ho: " Voninahisy ane ho an'gny mary!" Fa ho zaho ho: " Fa nihaosa zaho, fa nihaosa zaho, mbakany! Gny pamitaky dra ninday apitaky; eka, gny pamitaky dra vatany ninday apitaky vatany." ¹⁷ Amindrareo gny tahosy, gny lavaky, vo gny fandrky, ry ponin'gny tany. ¹⁸ Izy ze nilefa gny feon'gny fapihorohoroa dra ho lasaky ao an-davaky, vo izy ze miakasy boak'o an-davaky dra ho azon'gny fandriky. Hisokasy gny vatragnaran'gny lagnisy, vo reo fagnorenan'gny tany dra hiozongozo. ¹⁹ Ho rava tateraky gny tany, hitresaky gny tany; hiozongozo fatrasy gny tany. ²⁰ Hivembe manahaky gny olo mamo gny tany sady hisingeva manahaky gny tragno bongo zay. Hivesasy amin'izay gny fahotany dra ho lavo zay dra sy hiary sasy. ²¹ Vo amin'zeho andro zeho dra hagnasazy gny miaramilan'gny abo agnabo, vo reo pazakan'gny tany etany etihoky i Yaveh. ²² Haharo ereo, gadra ao an-davaky, vo hisy ao apoza; vo afaky andro maromaro dra ho voasazy ereo. ²³ Vo dra ho megnasy gny vola, sady ho afa-baraka gny masoandro, akory hazaka amin-boninahisy ao atezovohis'i Ziona vo ao Jerosalema, vo manoloa reo zokiolony i Yaveh tompon'gny lako.