¹ Fitalilia mahakasiky gny Lohasahan'gny Fahitana: Ino gny atony nandehanandrareo aby ho agny amin'reo tapon-tragno? ² Gny bo haharezandrareo gny tana fena tabataba se, tana ze feno firavoravoa? Gny maty eo amin'iha dra sy matin'gny mesa, sady sy maty tamin'gny aly ereo. ³ Ereo panapaky an'iha aby nindray nilefa, fa voababo sy napiasa zana-sipiky ereo; ereo aby dra nindray voababo, ndre dra nilefa lavisy aza ereo. ⁴ Noho zay dra ho zaho ho: " Ka magnety anahy, fa hitomagny fatrasy dra fatrasy zaho; ka miezaky gny hapiono anahy mahakasiky gny faharavan'gny zanakapelan'gny oloko." ⁵ Fa misy gny andron'gny tabataba, fagnosihosia, vo fifazevoa ho an'gny Topo Yaveh Topon'gny maro, ao amin'gny Lohasaha'gny Fahitana, faharavan'reo fefy, vo gny olo mitokatoka fatrasy agny amin'reo tezovohisy. ⁶ Elama nangalaky gny tragno zana sipiky, nindray tamin'gny kalesan'ireo lelahy vo reo pitikisy sovaly vo Kira nangalaky gny fonon'gny apinga, ⁷ Fa reo lohasaha ze nifilinao vatany dra ho feno kalesy, vo reo piikisy sovaly dra hangalaky gny toerany eo am-bavahady. ⁸ Nangalaky gny fiarovan'i Joda Izy; vo tamin'zay andro zay hanao dra nagnety reo fitova-pialia eo amin'gny Lapan'gny ala. ⁹ Nahita gny bangan'gny tanan'i Davida ndrareo, fa maro reo,vo namory gny ranon'gny dobo ambany ndrareo. ¹⁰ Nagnisa gny akohonan'i Jerosalema ndrareo, vo nandroda reo tragno ba hagnamafisa gny fefy. ¹¹ Namboasy fitahiriza teo agnelagnelan'reo fefy ro ndrareo ho an'gny ranon'gny dobo tranainy. Fa sy bo nihevisy gny pamoro gny tana ndrareo, zay nagmoma anizay fa ela. ¹² Tamin'izay andro zay gny Tompo Yaveh Tompon'gny maro nitoka fitomagnia, fandala, fiaratan-doha, vo fanaova akazo fandala. ¹³ Fa ingo, kosa, gny fankalaza vo gny fifalia, gny famonoan'agnomby vo gny famonon'agnondry, fihinan-kena vo finoma divay, aoky sika hino vo hihina, fa ho faty sika hamaray. ¹⁴ Zao gny nizakan'i Yaveh Tompon'gny maro teo asofiko: " Eka vatany fa sy havela zay helokareo zay, eka fa ndre dra ho faty aza ndrareo," ho gny Tompo Yaveh Tompon'gny maro. ¹⁵ Gny Tompo Yaveh Tompon'gny maro, nizaka anizao: " Mandehana magnagny amin'gny pitandrin-draharaha, agny amin'i Sebna, zay manapaky gny tragno, vo zakao ho: ¹⁶ " Ino gny ahinao eto sady ia gny nagnomia alala anao handavaky lolo ho an'gny vatanao, hamboasy lolo egny ambony vo handavaky toera fizanogna egny amin'gny toera fizanogna egny amin'gny vatolapy?"' ¹⁷ Ingo, Yaveh fa hazera anao, lelahy mahery, hazera anao ambany, hagnisakisaky anao fatrasy vatany Izy. ¹⁸ Hagnakodiadia anao vatany Izy, sady hapisavoaravoara anao hanahaky gny laboly magnagny amin'gny tany malalaky. Agny gny hahafatesanao,vo ho agny koa reo kalesin'gny voninahisinao;hazary hegnasy ho an'gny tompon'gny tragnonao hanao! ¹⁹ " Ho roahiko hiala eo amin'gny raharahanao vo toeranao hanao. Haonga hanao. ²⁰ Aminzeho andro zeho ZAho dra hitoka an'i Eliakima panopoko zanadahin'i Hilkia. ²¹ Hapiakazoako amin'gny akazo lavanao izy vo hasiako gny fehim-kibonao, vo hafindrako ho eo atagnany gny fahefanao. Ho ran'gny ponin'gny Jerosalema vo gny akohonan'gny Joda izy. ²² Hatobiko eo asorongony gny fagnalahilin'gny akohonan'gny Davida; hamoha izy, sady sy hisy hagnily, hagnily izy, vo sy hisy hamoha. ²³ Hapitobohiko izy, manahaky gny ketoky amin'gny toera azo atoky, sady hazary toeram-boninahisy ho an'gny akohonan-drany izy. ²⁴ Hahaton'ereo aminazy gny voninahisy gny akohonan-drany aby, gny zanany vo reo tarakiny, gny fanaky madiniky aby boak'amin'ireo kapoaky hatramin'gny tavoara aby. ²⁵ Amin'zeho andro zeho_zao gny fitalilian'i Yaveh Tompon'gny maro_dra ho ala gny ketoky amin'gny toera fatras'ory, ho potehy sady ho azera, vo gny lanza amin'zay dra ho tapahy _fa Yaveh gny nizaka.