¹ Fitalilia mahakasikin'gny tany efisy amoron-dranomasy. Manahaky gny tadio mamakivaky an'i Negeva gny hiavian'zay mandalo boak'agny agn'efisy, boak'agny amin'gny tany loza. ² Fahitana mapasiaky gny name anahy: gny lelehy pamitaky dra namitaky, vo gny pandrava dra nandrava. Mekara dra sikino, ry Elama; ahivo fahirano, ry Mediana; hapisahasy gny tarainy aby Zaho. ³ Noho zay dra feno fanaitaigna gny valahako; fanaitaigna manahaky gny fanaitagnan'gny apela miteraky gny namatosy anahy; niondriky noho gny raha reko zaho. ⁴ Torotoro gny foko, mangovisy gny tahosy zaho. Gny hariva, fotoa akafiziko agnatin'gny andro, dra ninday horohoro ho anahy. ⁵ Nagnoma gny latabasy ereo, novelarin'ereo gny lamba firakosy dra nihina vo nino; misangana, ry andriandahy, osory dililo gny apingandrareo. ⁶ Fa zao gny nozakan'gny Tompo taminahy ho: " Mandehana, mametraky lelehy piamby raiky; sy maisy mitatisy ze hitany izy. ⁷ No fa mahita kalesy, pitikisy sovaly ro, pitikisy boriky, vo pitikisy kamela izy, dra tokony handiniky vo ho mahirasirasy." ⁸ Nitaray gny lelahy piamby ho: "Ry Tompo, teo amin'gny tilikambo fiambena zaho dra nizoro nadrisy gny raiky andro totolo, isan'andro, vo teo amin'gny toera-pitiliko gny nizoroko nandrisy gny hariva manotolo." ⁹ Ingo tamin'gny kalesy raiky mindray amin'gny lelahy raiky vo pitikisy sovaly ro. Nitoka mafy isy nanao ho: " Fa rava Babylona, rava, vo reo sary vongan'gny zagnahariny aby dra potiky amin'gny tany." ¹⁰ Ry nivelesy vo nisivagniko, zanaky gny tragno fandisanam-bariko! Ze reko tamin'i Yaveh Topon'gny maro, gny Zagnaharin'Israely, fa nambarako tamindrareo. ¹¹ Fitalilia momban'i Edoma. Nisy raiky nitoka anahy boak'agny Seira ho: " Ry piamby, ombia gny hitaperany gny hariva? Ry piamby, ombia gny hitaperany gny hariva? ¹² Ho gny piamby ho: " Ho avy gny maray vo gny hariva avo koa. No magniry gny anontany hanao, dra magnotania; vo miheregna ndraiky." ¹³ Fitalilia momban'i Arabia. Agny amin'gny tany efis'i Arabia gny andaniandrareo gny hariva, ry andian-Dedanita. ¹⁴ Mandesa rano ho an'gny mangetaheta; ry ponina ao amin'gny tanin'i Tema, senao amin'gny mofo reo pisoha-ponegna. ¹⁵ Fa ereo dra nilefa gny mesa, tamin'gny mesa voarendriky, tamin'gny sipiky voahenza, vo tamin'gny vesasy gny aly. ¹⁶ Fa zao gny nizakan'i Tompo taminahy ho: " Agnatin'gny tao raiky, manahaky gny hitan'gny piasa tany nokaramay mandrisy gny tao, dra hifara gny voninahis'i Kedara aby. ¹⁷ Pandefa sipiky, lelahy pialin'i Kedara keliky sisa gny ho tavela," akory Yaveh, gny Zagnaharin'Israely, gny fa nizaka.