¹ Tamigny voloha-taonan'i Belsazara pazakan'i Babylona, dra nagnonofy vo nahazo fahita asay i Daniela raha nandry teo amigny fandriany izy. Boak'eo dra naorasy ze hitany tao amigny nofiny izy. Nanorasy reo tranga manan-daza faratapony izy: ² Nagnazava i Daniela ho: "Tao agnatinigny fahitako tamigny hariva dra nahita reo sioky efasy gny lagnisy zaho dra napihesiky gny ranomasim-be. ³ Biby lahibe efasy, samihafa karazan'aby, gny niakasy boak'ao amigny ranomasy. ⁴ Gny volohany dra manahaky gny liona fa mana elasy voromahery. Raha nagnety zaho, rota reo elany dra miala amigny tany zay dar misanga amigny tomboky ro, manahaky gny olo. Name anizay gny fisaignanigny olo. ⁵ Boak'eo dra nisy biby faharo; manahaky gny bera, dra niondriky zay; nanao tolan-teheza telo eo agnelagnelanigny nifily vo gny vavany zay. Nizakany zay ho: 'Mifohaza dra mandrapaha olo maro. ⁶ Tafaran'izay dra nagnety zaho. Nisybiby raiky hafa, raiky ze miendriky manahaky gny leoparda. Teo an-damosin'izay dra nisy elasy efasy manahaky gny elasy gny voro, dra nanao loha efasy zay. Name fahefa hanapaky anizay. ⁷ Tafaran'izay dra nahita biby fahaefasy tao agnatinigny nofiko tamigny hariva zaho, napihorohoro, napatahosy, dra tena natazaky. Nana nify vy lahibe izy; nandrapaky anizay, namotiky, dra nagnisakisaky ze tavela amigny tombony. Izay dra sy nitovy amireo biby hafa, dra nana zagnony folo izy. ⁸ Raha nandiniky reo zagno zaho, dra nagnety dra nahita tandroky hafa miry eo amizay, zagno masaiky raiky. Gny telo amireo zagno volohany dra niboaky tamigny fakany. Nahita maso manahaky gny mason'olo tao agnatin'io tandroky io zaho dra vava ze nirehareha momba reo raha aby. ⁹ Raha nagnety zaho, dra nipetraky tamigny toera reo seza fiandriagna, dra reo Andro Fahagola gny nangalaky gny pisenazy. Fosy manahaky gny ora-panala gny akazony, dra gny volon-dohany dra manahaky gny volon'agnondry sy mifangaro. Lelan'afo gny seza fiandrianany, dra kodiany dra afo mirehisy. ¹⁰ Nikoria niboaky boak'eo anoloany gny loharanon'afo; atapitrisany gny nanopo anazy, dra zato tapitrisa gny nisanga eo agnatrehany. Nivory gny fisara, dra nisokaky reo boky. ¹¹ Bo nagnety hatragny zaho nohonigny fireharehan'ireo zaka nizakan'ireo zagno. Nagnety zaho raha igny bo nivono igny gny biby, dra nisolany gny vatany, dra nanolosy ba ho oroa zay. ¹² Dra gny sisa tamireo biby efasy, dra nala gny fahefan'ereo hanapaky, kanefa nalava gny fehi-potoa hiegnan'ereo. ¹³ Tao agnatinigny fahitako amy hariva io, dra nahita olo raiky avy niaraky tamireo rahonigny lagnisy manahaky gny zanak'olo zaho; avy teo amireo Andro Fahagola izy dra naseho teo agnatrehany. ¹⁴ Name anazy gny fahefa hanapaky vo voninahisy dra hery fiandriagna ba hanopo anereo olo aby, reo firenena, dra reo fizaka isa-karazany. Gny fahefany hanapaky dra fahefa mandrakizay ze sy ho levo, dra gny fazakany dra gny sy ho levo, dra gny fazakany dra gny sy ho rava mandrakizay. ¹⁵ Raha gny aminahy, Daniela, dra malahelo ato agnato gny fagnahiko, dra reo fahita ze hitako tao asaiko dra mapatahosy anahy. ¹⁶ Nagnato gny raiky tamireo nisanga tagny zaho dra nangataky taminazy ba hapisehoany anahy gny dikan'ireo raha reo. ¹⁷ Reo biby lahibe reo, efasy raha isahy dra pazaka efasy ze hisandrasy boak'amigny tany. ¹⁸ Fa reo olomasinigny Avo indrindra dra hitakasy fazaka, dra hana zay ho fanagnamandrakizay doria ereo.' ¹⁹ Dra te hahafatasy bebe kokoa momba gny biby fahaefasy zaho__tena hafa vatany amireo hafa zay dra mapioribolo vatany amigny nifiny vy vo reo vazakoho varahy; mandrapaky zay, mamotipotiky, dra magnisakisaky amigny tombony ze tavela. 20Te-hahafatasy momba reo zagno folo eo an-dohany zaho, dra nisy zagno telo potraky teo alohany. Te-hahafatasy momba gny zagno ze mana-maso dra momba gny vava ze mirehareha momba reo raha lahibe zaho dra ho lahibe mihoasy noho reo namany zay. ²¹ Raha nagnety zaho, io zagno io dra mikarama agnaly manohisy reo olomasy dra naharesy anereo ²² mandra-pihavian'ireo Andro Fahagola, dra gny fahamarigna dra name reo olomasinigny avo indrindra. Boak'eo dra avy gny fotoa gny fa nitakasy gny fazaka reo olomasy. ²³ Zao gny nizakanigny olo: 'Raha gny amigny biby fahaefasy, ho fazaka fahaefasy amigny tany ze ho hafa amireo fazaka hafa aby ze. Handrapaky gny tany raiky manotolo zay, hagnisaky vo handrava anazy ho potipotiky. ²⁴ Raha gny amireo zagno folo, pazaka folo gny hisandrasy avy aminio fazaka io, dra raiky hafa gny hisandrasy afaran'ereo. Ho hafa amireo teo aloha zay, dra handresy reo pazaka telo izy. ²⁵ Hizaka zaka manohisy anigny Avo indrindra izy dra hapasiaky reo olomasin'Agnahary Avo indrindra. Hiezaky hanova reo fakalaza vo reo lala izy. Reo raha reo dra hame eo atanany mandrisy heri-tao, ro tao, dra tapa-tao. ²⁶ Fa hivory gny fisara, dra hangalaky gny herinigny fiandriana ba ho sola vo ho rava agny amigny farany ereo. ²⁷ Gny fazaka vo gny fanapaha, dra gny halahibenigny fazaka eo ambaninigny lagnisy manotolo, dra hame reo olo ze an'ireo olomasinigny Avo indrindra. Gny fazaka dra fazaka maharisy mandrakizay, dra reo fazaka hafa aby dra hanopo vo hakato anazy.' ²⁸ Tihoky gny farany nitranga. Raha gny aminahy, Daniela, nanaisy anahy tateraky reo eriseriso dra niova endriky gny tavako. Fa nitanako ho anahy raiky reo raha reo."