¹ Namboasy sarivonga volamena i Nebokadnezara pazaka ze enipolo hakiho gny halavany dra enina hakiho gny sakany. Napetrany tao amigny Lemak'i Dora ao amigny faritanin'i Babylona zay. ² Dra nandefa hafasy i Nebokadnezara ba hapivory miaraky reo governora-paritany, reo governora-parisy, dra reo governora teo atoera, mbamireo panolo-say, reo pitam-bola, reo pisara, reo pahay lalana, reo manam-boninahisy gny faritany agnabo aby ba ho avy amigny fitokana vo Sarivonga ze fa nasangany. ³ Dra nindray nivory reo governora-paritany, reo governora-parisy, vo reo governora teo atoera, niaraky tamireo panolo-say, reo pitam-bola, reo pisara, reo pahay lalana, reo manam-boninahisy gny faritany agnabo aby ba ho avy amigny fitokana gny sarivonga ze fa nasangan'i Nebokadnezara. Nizoro teo anoloan'izay ereo. ⁴ Dra nisy pikabaro nihiaky fatrasy ho: "Didy handrareo, ry vahoaky, ry firenena, vo reo fizaka samihafa, ⁵ fa amigny fotoa haharezadrareo gny feonigny azomara, sodina, sitara, lokanga, harpa vo farara, vo gny karazan-draha-magneno aby, dra sy maisy miondriky dra mekohoky eo amigny sarivonga volamena ze fa nasangan'i Nebakadnezara pazaka handrareo. ⁶ Na iza na iza sy miondriky dra manopo, amizay fotoa zay mihisy, dra haria ao agnaty laforo midedadeda." ⁷ Ko gny fa nahare gny feonigny azomara, sodina, sitara, lokanga, harpa vo farara, vo gny karazan-draha-magneno aby gny vahoaky manotolo, reo firenena, vo fizaka dra niondriky dra nekohoky teo amigny sarivonga volamena ze fa nasangan'i Nebokadnezara pazaka. ⁸ Dra tamin'io fotoa io dra nisy Kaldeana avy dra ninday fiapanga hanohisy reo Jiosy. ⁹ Hoy ereo tamin'i Nebokadnezara pazaka: "Ry pazaka! Ho velo mandrakizay anie hanao! ¹⁰ Hanao, ry pazaka, dra fa nanao lalana fa gny olo aby ze mahare gny feonigny azomara, sodina, sitara, lokanga, harpa vo farara, vo gny karazan-draha-magneno aby, dra sy maisy miondriky dra mekohoky eo amigny sarivonga volamena. ¹¹ Na iza na iza sy miondriky vo manopo dra sy maisy aria ao agnaty laforo midedadeda. ¹² Dra misy reo Jiosy ze nisitihinao amireo raharaha-paritanin'i Babylona; gny agnaran'ereo dra Sadraka, Mesaka, dra Abednego. Reo lelahy reo, ry pazaka, dra sy niteno anao. Sy hivavaky na hanopo reo zagnaharinao ereo, na hiakohoky eo anoloanigny sarivonga volamena ze fa nasanganao. ¹³ Dra Nebokadnezara, feno fahasiaha vo fahoria, dra nandidy gny hinday an'i Sadraka, Mesaka, dra Abednego ho eo aminazy. Ko nandesin'ereo teo anoloanigny pazaka reo lelahy reo. ¹⁴ Hoy Nebokadnezara tamin'ereo: "Fa nandefa fisaignandrareo ra handrareo ry Sadraka, Mesaka, dra Abednego, fa sy hanopo reo zagnahariko dra hiakohoky eo anolonigny sarivonga volamena ze fa nasangako? ¹⁵ Dra raha vonona handrareo__gny fa mahare gny feonigny azomara, sodina, sitara, lokanga, harpa vo farara, vo gny karazan-draha-magneno aby__gny hiondriky dra hiakohoky eo amigny sarivonga ze fa namboariko, dra hilamy gny raha aby. Fa raha sy manopo handrareo, dra haria avy hatragny ao agnaty lafory midedadeda. Iza gny zagnahary afaky mamozy andrareo eo atagnako?" ¹⁶ Namaly gny pazaka i Sadraka, Mesaka, dra Abednego ho: "Ry Nebokadnezara, sy mila mamaly anao amizay raharaha zay izahay aby. ¹⁷ Raha misy valiny, dra gny zagnaharinay ze toponay gny afaky miaro anay amigny laforo midedadeda, dra hamozy anay sy ho eo atagnanao izy, ry pazaka. ¹⁸ Fa na sy izay aza, dra aoky ho fatasao, ry pazaka, fa sy hanopo reo zagnaharinao izahay, dra sy hekohoky amigny sarivonga volamena ze fa nasanganao." ¹⁹ Dra feno fahatezera i Nebokadnezara; niova tamin'i Sadraka, dra Abednega gny neniny. Nididiny fa tokony hafana ipito ma tokoa gny hafanany nmahazasy gny laforo. ²⁰ Dra nandidy lelahy matazaky maro tao amigny tafiny izy ba hamatasy an'i Sadraka, Mesaka, dra Abednego dra hagnary anereo ao agnaty lafory midedadeda. ²¹ Nifahe bo tamin-piakazo reo akazolavany, reo kapotiny, reo sotrony,vo fitafia hafa izy reo, dra natorany tao agnaty laforo midedadeda. ²² Satria hetriny gny fagnaraha gny baikon'ny pazaka dra nahama be gny laforo, dra namono reo lelahy zay napiakasy an'i Sadraka, Mesaka, dra Abednego gny lelanafo. ²³ Reo lelahy telo reo, zay Sadraka, Mesaka, dra Abednega, dra nilavo tao agnatin'ny laforo midedadeda izy reo sady nifehy. ²⁴ Dra gaga Nebokadnezara pazaka dra nisanga manalaky. Nagnotany reo pagnomesay izy ho: ''Moa se sy natoraky nifehy tao agnaty afo izy telolahy?'' Dra namaly gny pazaka izy reo ho: '' Evatany, ry pazaka.'' ²⁵ Hoy izy: ''Nefa zaho mahita lelahy efasy sy mifehy mandehandeha ao agnty afo, dra sy magnino izy reo. Gny fazelasiny gny fahaefasy dra manahaky gny zanak'ireo Zagnahary.''' ²⁶ Dra nagnato gny vatrangaranigny lafory midebadeda i Nebokadnezara dra nitoka fatrasy ho: "Ry Sadraka, Mesaka, dra Abednego, panopon'Agnahary Avo Indrindra, miboaha! Mandehana atiky!" Dra niboaky boak'ao amigny afo i Sadraka, Mesaka, dra Abednego. ²⁷ Reo governora-paritany, reo governora-parisy, reo governora hafa, dra reo panolo-sainigny pazaka ze niara-nivory dra nahita reo lelahy reo. Sy napagnino gny vatan'ereo gny afo; sy ma gny volon-dohan'ereo; sy sola gny akazon'ereo; dra sy nisy fofon'afo taminazy. ²⁸ Hoy Nebokadnezara: "Handeha isika hidera gny Zagnaharin'i Sadraka, Mesaka, dra Abednego, ze nandefa gny babany dra nagnome anizao hafany izao ho an'ireo panopony. Natoky anazy izy reo raha nanda gny baikoko, dra nahafo gny vatany ereo toy zay hanopo vo hekohoky amize zagnahary afa-sy gny zagnaharin'ereo. ²⁹ Ko manao lalana zaho fa ze vahoaky, firenena, na fizaka ze mizaka raha hanohisy gny Zagnaharin'i Sadraka, Mesaka, vo Abednego dra sy maisy rava, dra gny tragnon'ereo dra sy maisy atao ho fako mivangongo akory sy misy zagnahary hafa magnavosy manahaky anizao." ³⁰ Dra napisondrosy an'i Sadraka, Mesaka, dra i Abednego tao amigny faritanin'i Babylona gny pazaka.