¹ Tamy tao faharo nazakan'i Nebokadnezara, dra nagnofy izy. Nihorohoro gny sainy, dra sy afa-nandry izy. ² Dra nampitoka reo ambiasa vo reo ze nizaka ho miresaky amy maty gny Pazaka . Nitoka reo mpanao oly vo reo olon-kendry avo koa izy. Nagniry anazy reo hizaka anazy gny momba gny nofiny izy. Koa nilisy ereo dra nisanga teo anolohany Pazaka. ³ Hoy gny Pazaka tamin'ereo ho:''Nagnofy zaho, dra gny saiko dra mitebiteby gny hahafatara gny dikany gny nofy.'' ⁴ Laha teo dra niresaky tamy Pazaka tamy tegny Aramiana reo olon-kendry:''Ry Pazaka , ho velo mandrakizay! Zakao aminay mpanomponao gny nofy, dra zahay hagnambara gny dikany.'' ⁵ Namaly an'ereo olon-kendry gny Pazaka ho:''Fa nilamy zay raharaha zay.Raha sy sinizakandrareo vo hazavandrareo anahy gny nofy, dra ho torotoro gny vatandrareo dra reo tragnondrareo hatao korotam-pako. ⁶ Fa raha zakandrareo anahy gny nofy vo dikany , dra hahazo fagnomeza laha taminahy iandrareo, valisoa raiky, dra voninahisy lahibe. JKoa zakao anahy gny nofy vo gny dikany.'' ⁷ Dra namaly draiky izy ho:''Ao gny Pazaka hizaka aminay mpanompony, gny nofy dra hozakany anao gny dikany.'' ⁸ Namaly gny mpazaka ho:''Fataro soa fa te hahazo fotoa mihoasy iandrareo satria hitandrareo fa tena fatrasy gny fanapaha-kevisiko momba zay. ⁹ Fa raha sy zakandrareo aminahy gny nofy, dra raiky avo gny zakako ho andrareo. Nanapa-kevisy gny hagnoma zaka diso vo fitaky ze nifagnekendrareo ho zaka aminahy handrareo mandra-piova gny haviso. Ko zakao aminahy dra nofy, dra ho fatako fa afaky mandika anizay aminahy handrareo. ¹⁰ Namaly reo olo-kendry gny pazaka ho: "Sy misy olo eto atany afaky hagnatateraky gny fangatahanigny pazaka. Sy misy pazaka lahibe vo mahery bo nangataky raha manahaky anizay aby amigny ambiasa, na avy amin'iza na amin'iza amigny olo-kendry. ¹¹ Sarosy gny raha angatahinigny pazaka, dra sy misy na iza na iza afaky mizaka anizay amigny pazaka afa-sy reo zagnahary, dra sy miay eo amigny olombelo ereo. ¹² Napasiaky vo tena nahaory gny pazaka zay, dra nagnome baiko handringa reo raha agny Babylona ze fatasy tamigny fahendreny izy. ¹³ Ko niboaky gny lalana fa reo aby ze fatasy tamigny fahendren'ereo dra hovono. Noho io lala io, dra nitaly an'i Daniela vo reo namany ereo ba hahafaha mamono anereo. ¹⁴ Dra i Daniela namaly am-pahamalia vo am-pisaigna an'i Arioka mpifehy gny mpiamby gny Pazaka , zay avy hamono reo aby tao Babylona ze fatasy tamy fahendren'ereo. ¹⁵ Nagnontany gny mpifehiny Pazaka i Daniela ho:''Manao gny dra manahaky anizay gny lalany Pazaka?''Dra nizakan'i Arioka tamin'i Daniela zay niseho. ¹⁶ Laha teo Daniela nilisy dra nangataky gny hifakahita tamy Pazaka ba hahafahany manao gny fandika ho agny Pazaka. ¹⁷ Laha teo dra nagnany antragnony dra nagnazava ze niseho tamin'i Hanania, Misaela, vo Azaria i Daniela. ¹⁸ Nampirisiky anazy reo hitalia famindram-po laha tamy Zagnahary gny lagnisy izy mahakasiky io raha-mivony io ba sy hamonoa anazy vo anereo miaraky amin'ireo olo tavela tao Babylona ze fatasy amy fahendren'ereo. ¹⁹ Tamin'io hariva io dra nambara tamin'i Daniela tagnatiny fahita gny raha-mivony . Dra nidera agny Zagnahary gny lagnisy i Daniela ²⁰ dra nizaka ho:''Midera gny agnaran'Agnahary mandrakizay doria;fa anazy gny fahendre vo gny6 hery. ²¹ Manova gny fotoa gny vanim-potoa Izy; mangalaky vo mametraky gny Pazaka eo amin'ireo seza fiandrianany Izy.Magnome fahendre ho agny hendry Izy dra fahalala ho an'ereo ze mana fahazava-say . ²² Mampiseho gny laliky vo reo raha-mivony Izy satria hainy gny ao agnatiny fahamezigna, dra gny hazava miay ao aminazy. ²³ Ry Zagnahary gny Razambeko, misaosy anao zaho dra midera anao noho gny fahendre ze nomenao anahy. Fa nampahafatarinao anahy amizao ze nangatahanay taminao; nampahatarinao anay gny raha mampitebiteby gny Pazaka.'' ²⁴ Boak'eo dra nilisy i Daniela hagnety an'i Arioka (gny nitendrenigny pazaka hamono gny olo hendry aby tagny Babylona). Nandeha izy dra nizaka taminazy ho: "Ka mamono gny olo-kendry agny Babylona. Andeso agny amigny pazaka zaho dra haseho gny pazaka gny dikanigny nofiny." ²⁵ Dra nandesin'i Arioko teo agnatrehanigny pazaka i Daniela dra nizaka ho: "Nahita lelahy raiky teo amireo olon'i Joda natao sesitany ze hagnambara gny dikanigny nofinigny pazaka zaho." ²⁶ Hoy gny pazaka tamin'i Daniela (ze atao ho Beltesazara): "Moa ra hanao afaky gny hizaka aminahy gny nofy ze hitako vo gny heviny?" ²⁷ Daniela namaly gny pazaka dra nanao anizahoky ho: "Gny raha miafy ze nagnotanianigny pazaka dra sy azon'ireo ze mana fanendrena aseho, na reo ze milaza fa mizaka amigny maty, na amigny alalan'ireo ambiasa, dra sy amigny amigny alalan'ireo panondro. ²⁸ Na dre zay aza, misy zagnahary ze mony agny an-dagnisy, ze magnambara gny raha miay, dra fa napahafatariny anao, ry Nebokadnera pazaka, ze hitranga amigny andro ho aby. Tahoky gny nofinao vo reo fahitanigny sainao raha nandry teo amigny fandrianao hanao. ²⁹ Raha gny aminao, ry pazaka, gny fisaignanao eo am-pandrianao dra momba reo raha ho avy, dra ze magnambara reo raha mivony dra fa napahafatasy anao ze hiseho. ³⁰ Raha gny aminahy, zay raha mivony zay dra sy nitalily taminahy nohonigny fahendrena ze hanagnako bebe kokoa mihoasy gny olombelo hafa. Nambara taminahy zay raha mivony zay ba hahatakaranao gny dikany, ry pazaka, dra ba hahafahanao mahafatasy reo eriserisy laliky ao agnatinao. ³¹ Ry pazaka, nitraka hanao dra nahita sarivonga lahibe. Io sarivonga io, ze mahery vatany vo mamirapirasy, dra nizoro teo agnatrehanao. Mapihorohoro gny famirapiratany. ³² Gny lohanigny sarivonga dra natao tamigny volamena soa faratapony. Gny tratrany vo gny sandriny dra vita tamigny volafosy. Gny agnevony vo gny feny dra vita tamigny varahy, dra gny randron'izay dra natao tamigny vy. ³³ Gny tombok'izay dra vita tamigny vy gny apahany dra tanimanga gny apahany. ³⁴ Nitraka hanao, dra nisy vato tapaky raiky, na dre sy tamigny alalanigny tagnanigny olo aza, dra namely gny sarivonga teo amigny tombony vy vo tanimanga zay, dra nandrava anereo. ³⁵ Boak'eo gny vy, gny tanimanga, gny varahy, gny volafosy dra gny volamena dra potipotiky dra lasa manahaky gny lilam-bary eo amigny fagnahafa amigny fahavarasy. Nisofinigny sioky reo dra sy nisy soris'ereo tavela. Fa gny vato ze namaly gny sarivonga dra lasa tendrombohisy lahibe dra nameno gny tany aby. ³⁶ Izay gny nofinao, Dra handeha hizaka gny heviny amigny pazaka zahay amizao. ³⁷ Hanao, ry pazaka, gny pazakan'ireo pazaka ze namen'Agnahary gny lagnisy gny fazaka, gny fahefa, gny hery, dra gny voninahisy. ³⁸ Fanataony teo am-pelatagnanao gny toera honegnanigny olombelo. DRa fa nameny teo am-pelatagnanao reo bibinigny saka vo gny voronigny lagnisy, dra fa nanao anao ho panapaky eo amireo aby reo Izy. Hanao gny lohanigny sarivonga volamena. ³⁹ Afara ao, dra hisy fazaka hafa hisanga ze ambany noho hanao, kanefa gny fazaka varahy fahatelo dra hanapaky eo amigny tany aby. ⁴⁰ Dra hisy fazaka fahaefasy, fatrasy manahaky gny vy, akory gny vy mamaky reo raha aby hafa vo manorotoro gny raha aby. Manorotoro reo raha aby reo zay dra mamotiky anereo. ⁴¹ Araky gny hitanao, gny tomboky vo reo rasany dra vita tamigny tanimanga nahandro vo vy gny apahany, ko dra ho fazaka voazara zay; gny ilany amigny herinigny vy dra ho ao amizay, araky gny fa nahitanao gny vy nafangaro tamigny tanimanga malefaky. ⁴² Akory reo rasa-tombony dra natao tamigny vy gny apahany dra tanimanga gny apahany, dra ho fatrasy gny fazaka amigny apahany dra malemy amigny apahany. ⁴³ Manahaky gny nahitanao gny vy nafangaro tamigny tanimanga malefaky, dra hifangaro reo olo; sy hiara-hizano ereo, manahaky gny vy sy mifangaro amigny tanimanga. ⁴⁴ Amigny andron'ireo pazaka reo, dra hametraky gny fazaka ze sy ho voarava mihisy, na ho babonigny olo-kafa gny Zagnahary gny lagnisy. Handravarava reo fazaka hafa izay vo hapisahasy anereo aby, vo dra hitoetra mandrakizay zay. ⁴⁵ Araky gny fa hitanao, nisy vatolapy raiky nanapaky tandrombohisy, fa sy ba tamigny tagnan'olombelo. Nanapatapaky gny vy, varahy, tanimanga, volafosy, dra volamena zay. Fa napahafatarinigny Zagnahary lahibe anao, ry pazaka, ze hiseho afaran'izay. Mary gny nofy dra azo atoky ty fandika tihoky." ⁴⁶ Napekohoky gny tavany teo agnatrehan'i Daniela i Nebokadnezara dra nagnaza anazy; nandidy gny hanova fagnatisy raiky izy dra liti-kazo magnisy hatolosy ho anazy. ⁴⁷ Hoy gny pazaka tamin'i Daniela ho: "Tena gny Zagnaharinao gny Zagnaharin'ireo zagnahary, gny topon'ireo pazaka, dra gny magnambara gny raha mivony, akory afaky magnambara anizay raha mivony zay hanao." ⁴⁸ Boak'eo nataonigny pazaka gny haza ambony i Daniela dra nameny fagnomeza mahafinarisy. Nanao anazy ho pazaka teo amigny reo firitaninigny Babylona aby izy. Lasa lahibenigny governora teo amireo olon-kendry faratapony an'i Babylona i Daniela. ⁴⁹ Nanao fangataha raiky tamigny pazaka i Daniela, dra nitendrenigny pazaka i Daniela, Mesaka, dra Abednego ba ho pandrindra eo amireo faritanin'i Babylona. Fa Daniela koa nitoby tao amigny lapanigny pazaka.