¹ Tamigny tao fahatelo nazakan'i Kyrosy pazakan'i Persia, dra nisy hafasy nambara tamin'i Daniela, ze natao avo koa ho Beltesara. Mary zay hafasy zay. Izay dra mombanigny aly lahibe. Nahatakasy gny hafasy i Daniela gny fa nahazo faharagnita-say avy amigny fahita izy. ² Tamizay andro zay, izaho Daniela, dra nandala nandrisy gny telo herignandro. ³ Sy nihina hanina hany zaho, sy nihina hena mihisy, sy nino divay mihisy, dra sy ba nagnososy dililo tamigny tavako mandra-pahavitanigny telo herignandro manotolo. ⁴ Tamigny andro fahaefasy amby ropolony tamigny volohanigny vola, raha teo agnilanigny ony lehibe zaho (izay ho, Hedekela), ⁵ niandrandra zaho dra nahita lelahy nekazo lamba zamala, miaraky amigny fehikibo vita amigny volamena sy mifangaro boak'agny Ofaza magnodidy gny valahany. ⁶ Gny vatany dra manahaky gny topaza, dra reo tarehiny manahaky gny hazava. Reo masony manahaky gny fanilo mirehisy, dra reo sandriny vo gny tombony manahaky gny varahy manganohano. Gny feony manahaky gny feon'olo maro be. ⁷ Izaho, Daniela, raiky gny nahita fahita, fa gny olo ze teo aminahy dra sy nahita gny fahita. Na izay aza, avy teo amin'ereo gny harohoro lahibe, dra nienga nagnavony gny vatany ereo. ⁸ Ko izaho raiky gny sisa teo dra nahita gny fahitana lahibe. Simisy hery nitoby tao aminahy; nihasola nivaloariky gny endriko namirasy, dra simisy hery nitoby tao aminahy. ⁹ Dra nahare reo zakany zaho__dra raha nahare anereo zaho, lasaky tagnaty torimaso laliky zaho dra gny tarehiko teo amigny tany. ¹⁰ Nisy tana nikasiky anahy, dra napangovisy gny lohaliko vo gny felanigny tagnako. ¹¹ Nizaka taminahy gny azely ho: "Ry Daniela, lelahy nihindrahindra fatrasy, fataro reo zaka ze zakako aminao. Mizoro mahisy, akory nirahy ho aminao atiky zaho." Gny fa avy nizaka anizay hafasy izay taminahy izy, dra nizoro am-patahora zaho. ¹² Dra hoy izy taminahy: "Ka matahosy, ry Daniela. Nanomboky tamigny andro volohany nahafataranao anizay tao asainao dra nanetrenao tegna teo alohanigny Zagnaharinao, dra fa re gny zakanao, dra avy zaho noho gny zakanao. ¹³ Gny andriandahy ao amigny fazakan'i Parsia nanohisy anahy, dra nandigny gny pazakanigny Persia zaho nandrisigny raiky amby ropolo andro. Fa i Mikaela, Raiky amireo andria lelahy, gny avy nagnapy anahy. ¹⁴ Amizao avy zaho hagnapy anao hahatakasy ze hahazo gny vahoakao amigny andro farany. Fa gny fahita dra ho an'ireo bo ho avy." ¹⁵ Gny fa nizaka taminahy tamigny fapesa reo zaka reo izy, natoliko taigny tany gny tavako dra sy afaky nizaka zaho. ¹⁶ Nikasiky gny moloso gny olo raiky ze manahaky gny zonak'olo, dra nanokaky gny vavako zaho dra nizaka taminazy nisanga teo anoloako ho: "Ry topoko, nohonigny fahita dra ao agnaty fahoria zaho; sy misy hery tavela ato aminahy. ¹⁷ Panoponao zaho. Akory gny hahafahako mizaka amigny topoko? Fa amizao sy mana-kery zaho, dra sy misy fofon'ay tavela ato agnatiko." ¹⁸ Nikasiky anahy ndraiky gny nangalaky endrik'olo dra nakahery anahy. ¹⁹ Hoy izy ho: "Ka matahosy, ry lelahy nahindrahindra fatrasy. Fiadagna anie ho anao! Matazaha izao, matazaha!" Raha bo nizaka taminahy izy, dra nahery zaho. Hoy zaho ho: "Aoky gny topoko gny hizaka, fa nakahery anahy hanao." ²⁰ Dra hoy izy ho:''Fatasao se nanaoakory zaho gny avy eto aminao? Bo hihery hialy amigny andriandahin'i Persia zaho. Gny fa mandeha zaho, dra ho avy koa gny andriandahin'i Grisia.

21Nefa ho zakako aminao zay voasorasy ao amigny Bokin'ny Marina. Sy misy olo mapiseho gny tazaky gny tegnany aminahy ba hanohisy anazy reo, fa sy Mikaela andriandahidrareo.