¹ Dra Hirama mpazakan'i Tyro nandefa mpinday hafasy tagny amin'i Davida, vo hazo sedera, mpandrafisy, dra mpanao tragno.Nagnory tragno ho anazy nereo. ² Davida dra nahafatasy fa Yaveh gny fa nametraky anazy ho mpazaka teo amin'Israely, dra gny fazakany dra nasandrasy agnabony noho gny amin'i Israely olony. ³ Tao Jerosalema, dra nangalaky valy maro Davida, dra niteraky zanadahy vo zanakapela maro izy. ⁴ Tahoky aby gny agnaran'ereo zanaky naterany tagny Jerosalema:Samoa, Sobaba, Natana, Solomona, ⁵ Jibara, Elisoa, Elipeleta, ⁶ Noga, Nafega, Jafia, ⁷ Elisama, Beliada dra Elifeleta. ⁸ Dra fa gny ren'ereo Filistina fa nohosora ho mpzakan'Israely aby Davida , dra niboaky nitalia anazy izy aby.Nefa ren'i Davida anizay ka niboaky hanohisy anazy reo izy. ⁹ Dra avy reo Filistina ka nanao fanafiha tegny amy Lohasahany Refaita. ¹⁰ Laha teo Davida nangataky fagnampia tamin'Agnahary. Hoy izy ho:''Tokony hiakasy hanafiky reo Filistina se zaho?Hagnome fandrese eo amin'ereo se ianao?''Dra hoy Yaveh taminazy ho:''Tafiho, fa tena hagnome anazy reo ho anao zaho.'' ¹¹ Dra niakasy nagnao Balaperazima ereo, dra tao gny nandreseny anereo.Naneho hevisy izy ho:''Gny tagnako gny namakian'i Yaveh gny fahavaloko hiparitaky manahaky gny tondra-drano.''Ka lasa Bala-perazima gny agnaran'izay toera zay. ¹² Nangan'ereo Filistina teo reo zagnahariny, dra nagnome didy Davida fa tokony oroa reo. ¹³ Dra nanafiky gny lohasaha draiky gny Filistina. ¹⁴ Dra nangataky fagnampia tagny amin'Agnahary draiky Davida.Hoy Zagnahary taminazy ho:''Sy tokony hanafiky anazy reo eo anooa ianao, fa koa hipalipalisy ao afaran'ereo dra ho avy eo amin'ereo laha teo amin'ereo hazo balsama. ¹⁵ Fa gny renao gny feony lia-be amy fisioky gny sioky laha teo amin'ereo tendrony hazo balsama, dra manafiha amin-kery.Manova anizay satria Zagnahary fa hialoa lalana anao hanafiky gny tafikin'ereo Filitina.'' ¹⁶ Ka nataon'i Davida zay nandidian'Agnahary anazy.Nandresy gny tafikin'ereo Filistina tagny Gibeina hatragny Gazera izy. ¹⁷ Dra gny lazan'i Davida dra niely teo amy tany aby, dra nahavy gny firenena aby hatahosy anazy Yaveh.