¹ Nihira ho an'i Yaveh gne tognon’iza hira za tame gnandro nagnavotan'i Yaveh enazy tatanane fahavalony aby, sy tatanan'i Saoly i Davida. ² Nivavaky izy hoe: "Yaveh gne pelapelambatoko, ferova mafy ho anah, gne raiky efa mamonjy enah. ³ Andriamanitry gne pelapelambatoko. Mialotry eo aminazy iah. Izy gne ferovako, gne tandroky gne famonjea anah, ferova mafy ho anah, sy fialofako, gne raiky magnavotr’enah ame mafy. ⁴ Hangaiky en'i Yaveh, gne mendriky gne ho deray iah, ka ho avotry ame fahavaloko iah. ⁵ Fa nagnodidy enah gn’alotry gne fahafatesa, nanindry enah gne rano mikiririkine fahapoteha. ⁶ Nagnodidy enah gne tadine fiainan-tsy hita; namandriky enah gne fandriky gne fahafatesa. ⁷ Tame fahoriako gne nangiako en'i Yaveh; nangaiky gn'Andriamanitro iah; nahare gne feoko avy tame ttempoliny Izy, ary avy tapototsofiny gne haiky vonjiko. ⁸ Da nihozogny sady nangorohoro gne tany. Nihorohoro sady voahozongozo gne vodi-lagnitry, satria vignitry gn’Andriamanitry. ⁹ Niakatry avy tame vavan’orony gne setroky, ary gn’afo miredareda gne nijotso avy tame vavany. Varehitr'iza gne bain'akafo. ¹⁰ Nidy nanokatry gne lagnitry Izy, ary gn’aizim-pito tambanine lelatombony. ¹¹ Nipitiky tame Kerobima Izy ary lasa nagnembo. Hita tagnatine gnabakabaky Izy. [Fagnamariha: gne dikane teny sasany misy hoe: "Nandrembo tame gn’elatry gne rivotry Izy."] ¹² Namboariny ho lay nagnodidy Enazy gne minjy, nandagno mika matevy tame gn’habakabaky izy. ¹³ Avy tame gn’hetry tagnatrehany gne nilatsahane bain’akafo. ¹⁴ I Yaveh nampikotrokotroky avy tagny andagnitry. Nizaka mafy gn’Abo Indrindra. ¹⁵ Nandefa zana-tsipìky Izy ka nampiparitaky gne fahavalony— nandefa hela-pahazava ka nagnaparitaky endreo. ¹⁶ Avy eo da niboda gne fantson-drano; niharihary tame tomagnine gn’adin'i Yaveh gne fagnambanin'izao tontolo izao, tame fipoahane fofon'aine vavan’orony. ¹⁷ Nidy avy latambony Izy; nitazo mafy enah Izy! Nisinto enah tame rano magnonja Izy. ¹⁸ Namonjy enah tame fahavaloko mafy Izy, tame tsy tia anah, satria tena natanjaky indreo taminah. ¹⁹ Avy nanohitry enah indreo tame gn’androm-pahoriako, kanefa Yaveh gne mpanoha enah. ²⁰ Namoky enah ho agny ame toera malalaky evakoa Izy. Namonjy enah Izy satria faly taminah. ²¹ Efa namaly soa anah tame refine fahamarignako Yaveh; efa nagnapody enah tame laoniny tame refim-pahadiovane tagnako Izy. ²² Fa efa nitandry gne lalan'i Yaveh iah ary tsy ba nagnano gne ratsy tame felah tame gn’Andriamanitriko. ²³ Satria gne didiny marigny aby da efa takatrefako; laha gname lalàny koa, da tsy niotaky tam’iza iah. ²⁴ Efa tsy nanan-tsigny tagnatrehany evakoa iah, ary nitandrigny gne tegnako tsy hanota iah. ²⁵ Noho iza da napodin'i Yaveh tame laoniny tame refine fahamarignako iah, tame refine fahadiovako tamasony. ²⁶ Ho ane raiky mahatoky, mampiboda gne tegnanao ho mahatoky Ianao; ho ane gn’olo tsy manan-tsigny, da mampiboda gne tegnanao ho tsy manan-tsigny Enao. ²⁷ Ame madio da mampiboda gne tegnanao ho madio Enao, fa mivadiky ame mpiolakolaky Enao. ²⁸ Magnavotry gn’olo ory Enao, nefa gne masonao da manohitry gne mpirehareha, ary ahetrinao indreo za. ²⁹ Fa Enao gne mpitariky enah, ry Yaveh. Magnazava gn’aiziko Yaveh. ³⁰ Fa noho Enao da afaky mihazakazaky mihotry gne fahatambagna iah; nohone gn’Andriamanitro da afaky mihotry rindry iah. ³¹ Laha gn’amin'Andriamanitry, tanteraky gne lalany. Madio gne rohon'i Yaveh. Izy da ferova hoan’izay mialotry eo aminazy. ³² Fa iza gn’Andriamanitry afa-tsy Yaveh, ary iza gne vatolampy afa-tsy gn’Andriamanitsika? ³³ Andriamanitry gne felofako, ary mitariky gn’olo tsy manan-tsigny ame lalany Izy. ³⁴ Mampalaky gne tomboko akoigne gne diera Izy ary mametraky enah egny ame gnambony abo. ³⁵ Magnazatry gne tagnako ame gn’ady Izy, sy gne sandriko hamoritry tsipìky varahina. ³⁶ Efa nagnome enah gne felofane famonjenao Enao, ary gne sitrakao gne nagnano enah ho zakabe. ³⁷ Efa nagnano toera malalaky ho ane tomboko tambaniko Enao, ka tsy nibolasitry gne tomboko. ³⁸ Nagnenjiky gne fahavaloko iah ka nagnapotiky endreo. Tsy nipody iah mandrapahapotik'indreo. ³⁹ Nandevy endreo sy nagnapotiky endreo iah; ka tsy afaky nitrotry indreo. Lavo tambanine tomboko indreo. ⁴⁰ Nagnapetraky hery taminah akoigne fehinkibo ame gn’ady Enao; nagnapetraky gne nitrotry hanohitry enah tambaniko Enao. ⁴¹ Nagnome enah gne hatoky gne fahavaloko Enao; nandavo gne tsy tia anah enao. ⁴² Nangaiky vonjy indreo, kanefa tsy nisy nagnavotry endreo; nangaiky mafy an'i Yaveh indreo, kanefa tsy namango endreo Izy. ⁴³ Namango andreo ho singa madiniky akoigne vovoky ame tany iah, notorotoroiko akoigne fotaky egny ame lala indreo. ⁴⁴ Efa namonjy enah tame fifanoherane vahokiko evakoa Enao. Efa napetrakao ho lohane firene iah. Gne vahoky tsy fantatriko da manompo enah. ⁴⁵ Notere hiankohoky taminah gne vahiny. Vantany va nahare gne mahakasiky enah indreo, da nankatò enah. ⁴⁶ Gne vahiny da nijotso ame tahatry tame ferova mafindreo. ⁴⁷ Velo i Yaveh! Ho deray ro gne vatolampiko. Apekary ro gn’Andriamanitry, gne vatolampine famonjea enah. ⁴⁸ Iza gn’Andriamanitry magnatanteraky famalia ho anah, gne Raiky mampihetry vahoky maro eo ambaniko. ⁴⁹ Magnafaky enah ame fahavaloko Izy. Nampiranga anah ho ambonine nitrotry hanohitry enah dato Izy. Mamonjy enah ame lelah mahery setry Enao. ⁵⁰ Noho iza da hagnome fisora ho Anao, eo ame firene iah, ry Yaveh; hihira fidera ho ane gnagnaranao iah. ⁵¹ Andriamanitry magnome fandrese zakabe ho ane mpanjakany, ary mampiboda gne tsy fivadiham-panekeny ame vahosotriny Izy, ho an'i Davida sy ho ane taranakiny mandrakizay."