¹ Mirehake ty maregne am'i Kristy ao raho. Tsy mavande raho, le ty eretsereko ro ndate'aivo miarak'amako am'i Fagnahe Masegn'ao, ² ty ahy ka le misy ferenaigne naho fijaleagne tsy mijanogne ty agnate arofoko ato. ³ Fe ie afake nagniry raho naho te vatako ro ho voaozogne le hisintake ama'i Kristy noho ty ami'ty rahalaheko, am'ondaty razagne raike amako niharo lio reo. ⁴ Israelita iarey. Managne fagnonjonagne iarey, ty vononahitse, ty fahasiagne, ty fagnomeagne lalàgne, ty fideragn'Anagnahare, naho ty fampitamagne. ⁵ Ty a'iareo le ty razagne nahavy i Kristy ho nofotse, Reke ty Andrianagnahare ambone ty raha iaby. Hoderaigne hatr'amparae Reke. Amena. ⁶ Fe ie tsy rereke ze ndaty nampitamae'n'Andrianagnahare. ⁷ Fe ie tsy ze boak'a Isiraely ro tena Isiraely vatae. Na ty tarana'i Abrahama iaby ro ho ana'e. Fa: ''Ami'ty alala'i Isaka ty hitokavagne o taranao reo.'' ⁸ Ty dika izay, tsy ana'Nagnahare ty ndaty ana'ty nofo. Fa ze ana'ty fampitamaegne ro raesegne ho taranake. ⁹ Le hoe izao ty talili'ty fampitamaegne: ''Hoavy Raho am'izay andro zay, le homeagne anake lahy ty Saraha.'' ¹⁰ Tsy izay avao, fa hoave eo ka ty Rebeka hanagn'anake ami'ty lahilahy raike, Isaka raen-tika_ ¹¹ fe ie mbe tsy terake o ajaja reo naho mbe tsy nanao soa na raty, mba hanahake ty fagnirian'Nagnahare magnarake ty fijibognagne, tsy ami'ty asa, fa noho Ireke nitoka_ ¹² nisaontsiagne tam'i ampela'y te hoeke: ''Hanompo ty zaie ze zokee.'' ¹³ Manahak'izay ka ty voasoratse te hoeke: ''Teako ty Jakoba, fa hejeko ty Esao.'' ¹⁴ Vaho inogne ty ho rehafen-tika? Misy tsy fahamarinagne vao ty miarak'ama'Nagnahare? ¹⁵ Tena tsy hisy zay. Le hoe ty saontsie tama'i Mosesy te ie: ''Handio hakeo ami'ze teako Raho, le hiferenaigne ami ze teako ho ferenaignagne ka Raho.'' ¹⁶ Naho zay reke, le tsy ami'ty reke magniry izay, na ami'ty reke méke, fa aman'Andrianagnahare mpagnafake tahigne naho hakeo. ¹⁷ Le hoe ty Soratse Masigne nagnombara ama'i Farao te hoeke: ''Le am'izay antoe zay ty nanandratako azo, mba hanoroako azo ty heriko, naho ty hagnombaragne ty agnarako magneran-tane.'' ¹⁸ Naho izay reke, le magnafake hakeo ami ze teae ty Andrianagnahare, le ze teae, ro ho hamasinegne ty arofoe. ¹⁹ Boak'eo hirehake amako nareo te hoeke: ''Nagnino vao Reke mbe mahavazoho hakeo avao'o?'' Ia vao ty mahatohetse ty sitrampo'e?'' ²⁰ Mifanohitse am'izay, ty lahilahy, ia vao ty mamale manohetse'a'Nagnahare? Sa ze namboaregne vao le hirehake mpamboatse te hoeke: ''Nagninogne raho atao ho'izao 'o?'' ²¹ Sa ty mpamboatse valàgne tsy managne zo ami'ty fotake naho ty vata'e raike avao ty hatao fasiagne raha ami'ty andro raike, naho fasiagne raha hafa ami'ty andavanandro? ²² Akore naho ty Andrianagnahare, te hampiboake ty helo'e naho hampahafantatse ty fahefa'e, ro niaretse tami'ty faharetagne ami'ty fitoera ty heloke fa nomanegne ho ami'ty fahasimbagne? ²³ Akore naho natao'e zay mba hampahafantaragne ty harea' ty voninahi'e ami'ty fitoera'ty famelan-keloke, fa nomane'e mialoha ho ami'ty voninahetse? ²⁴ Akore naho natao'e ho'antikagne ka zay, nitokave'e ka, tsy hoami'ty sambe jiosy eo avao, fa hoam'iarey Jentilisa ka? ²⁵ Manahake ty nisaontsie'e tama'i Hosea vao ka te hoeke: ''Hotokaveko te ndatiko ze tzy ndatiko, le ikokoako ze tsy ikokoako. ²⁶ Boak'eo ka am'iareo nagnombaragne te hoeke: 'Tsy ndatiko nareo, 'agne ty hagnombaragne iareo te hoeke: 'Ana'Nagnahare velogne.'' ²⁷ Nitoka mafe ama'i Isiraely ty Isaia te hoeke: ''Naho manahake o faseke an-dranomasegneo ty kiraike amo'o ana'i Israely io, le ho avotse ze sisa ambe'e, ²⁸ naho i Tompo ty handay ty saontsi'e ambone tane eto, feno naho tsy ho ela.'' ²⁹ Manahake ty nirehafe'i Isaia mialoha te hoeke: ''Naho i Andriatompo tompoe'ty maro ro tsy nagnenga taria ho antikagne, le hanahake i Sodoma tinkagne, naho hanahake i Gomora.'' ³⁰ Vaho inogne ty horehafen-tika? Le iareo Jentilisa, tsy nimpay ty fahamarinagne, ro nahazo ty fahamarinagne, fahamarinagne boak'ami'ty finoagne. ³¹ Le Isiraely, ty nimpay ty làla'ty fahamarinagne, ro tsy niavy am'izay. ³² Nagninogne vao? Satria iareo tsy nimpay izay tami'ty finoagne, fa tami'ty asa. Tsinikapy ty vato mpanikambatse iareo, ³³ manahake ty fa voasoratse te hoeke: ''Henteo, napetrako a Ziona ao i vato mpanikambatse'y naho i lamilamy ty fandikan-dalàgne'y. Tsy ho megnatse ze mino izay.''