¹ Ry rahalahe, ty fagniria ty foko naho ty anongalehako aman'Agnahare hoe'y iareo, le ty hamonjeagne iareo. ² Le mahasaky mijoro vavolombelo hoe'y iareo raho fa le tsy mikele aigne aman'Agnahare iareo, nefa tsy mitoky amy ty fahalalagne. ³ Fe ie tsy le mahay ty fahamaregnan'Agnahare iareo, le tea'iareo ty hametrake ty fahamaregna'iareo raike avao. Tsy magneke ty fahamaregn'Agnahare iareo. ⁴ Le i Kristy ro fahatanteraha ty lily ho amy ty fahamaregnagne hoe'y ty ze mino iaby. ⁵ Le nisorata i Mosesy ty momba ze fahamaregnagne zay amy ty lily manao ty hoeke: "Ze ndaty manao ty fahamaregnagne amy ze lily zay le hiaigne amy ze fahamaregnagne zay." ⁶ Fe ie ty fahamaregnagne avy amy ty finoagne le manao ty hoeke: "Le ko mametsevetse te hoe: 'ya ao ro hiakatse an-dagnitse agne?' (Le mampizotso i Kristy zay); ⁷ le ko mirehake te hoe: 'ya ao ro hizotso amy ty laleke agne?'" (Le mapivagnom-belogne i Kristy zay). ⁸ Le magnambara ino zay? "Agnila'o eo i rehake'y, am-bava'o ao naho am-po'o ao." Le izay ty nambara i finoagne'y, atalili'ay. ⁹ Fe ie naho amy ty vava'o ro agnekea'o i Jesosy te hoe Tompo, naho le inoa'o vata'e fa nivinelon'Andrianagnahare ndraike Reke, le ho vonjegne rehe. ¹⁰ Fe ie naho amy ty fo ty inoa'o ndaty ty fahamaregnagne, le amy ty vava ro agnekeae ty famonjeagne. ¹¹ Fa hoe ty soratse masigne nanao ty hoeke: "Le tsy ho megnatse iaby ze mino Aze." ¹² Fe ie le tsy misy fagnavakavahagne ty eo amy ty Jiosy naho ty Grika. Fa ie le raike avao ty Tompontika iaby, le ho fitahiantsoa hoe'y ze mitoka Aze Reke. ¹³ Fa ze mitoka i Andria Tompo amy ty tahina'e ro ho vonjegne. ¹⁴ A le manao akore zane ty ahafaha iareo mitoka Aze ie nefa tsy inoagne? Le manao akore ty ahafaha iareo mino Aze ie nefa tsy rendre'iareo? Le manao akore ty ahafaha iareo mitsandregne naho tsy misy mpitalily? ¹⁵ Le nanao akore ka ty ahafaha iareo mitalily, naho tsy nisy nagnirake?_ Arake ty voasoratse manao te hoe: "Heinhake ty hasoa ty tombo'iareo mitalily ty raha soa'i talily soa'ay!" ¹⁶ Fe ie anio tsy le iareo iaby ty nijanjigne i talily soa'ay. Le hoe ty Isaia: "O Ragnandria, ya ao ty nino i hafatse'ÿ?" ¹⁷ Naho izay reke le niavy amy ty fitsandregnagne o finoagne'eo, le o fitsandregnagne'eo avy amy ty saontsy i Kristy. ¹⁸ Le hoe raho te hoe: "ombao tsy naharendreke vao iareo'o?" Eka, le izay ty imaregna'e. "Fe ie le naparitake eran-tane ty feo'iareo, le hatram-pare'izao tontolo izao ty reha'iareo." ¹⁹ Le ty ankoatse izay, le hoe raho: "Ombao tsy naharendreke vao ty Israely?" Le nagnambara ty Mosesy taloha tagne nanao ty hoeke: "Le hatàko ho be fialognagne amy ty tarira mbe tsy firenena nareo. Amy ty tarira tsy misy fahalalagne, hatàko ty hahaboseke anareo." ²⁰ Le nahasaky am'izay ty Isaia naho fa ie ro nanao ty hoeke: "Le hahatrea ahy ze tsy nipay ahy. Niseho tamy ze tsy nagnontane ahy raho." ²¹ Le nanao ty hoeke reke tam'Israely: "Lomogn'andro ty agnitsiako ty tagnako ama ze ndaty tsy magnorike naho ze mafe hatoke."