¹ Naho ty am'izay le tsy misy fagnamelohagne sasa henanizao hoe'iareo ze am'i Jesosy Kristy ao. ² Fa ty lilin-kavelogne am'i Jesosy Kristy ao ro nagnafake ahy tam'ty lilim-pahafatesagne naho ty hakeo. ³ Fa ze tsy nimete natao ty lalàgne naho ty fahaleme'izay tam'ty nofotse, le nataon' Andriagnanahare. Nandefa ty Ana'e lahy tokagne Reke, nisandroigne nofotse feno hakeo mba ho fagnatetse amy ze ota, le nagnameloke ty ota amy nofotse ao Reke. ⁴ Natao'e zay mba ho lefe amantika ty raha paia i lalàgney, intika tsy mandeha magnorike ty nofotse, fa magnorike ty fagnahy. ⁵ Iareo ze miaigne am'ty nofotse le mimane am'ty raha ty nofotse, fa iareo velogne amy ty fagnahy le mimane am'ty raha ty faganhy. ⁶ Satria havilasy ty fivetsevetseagne mioregne am'ty nofotse, le fiaignagne naho fiadanagne ty vetsevetse mioregne am'ty Fagnahy. ⁷ Fandrafeagne an'Andriagnanahare ty vetsevetse mioregne amy ty nofotse, fa tsy mifagnorike amy ty lalàn'Andriagnahare zay, sady kà tsy hai'e ty manao zay. ⁸ Iareo amy nofotsey ao le tsy mete ho zoton'Andriagnahare. ⁹ Kanefa, nareo tsy amy nofotse ao fa amy Fagnahe ao, naho tena velogne ama'areo ao ty Fagnahin'Andriagnanahare. Fa naho misy ndaty tsy managne ty Fagnahe i Kristy, le tsy Aze reke. ¹⁰ Naho ama'areo ao t'i Kristy, le mate am'ty fahotagne ty vatagne, fa ty fagnahy velogne am'ty fahamaregnagne. ¹¹ Naho ty fagnahe i nampijangagne i Jesosy amy mate'y ro velogne ama'areo ao, le Reke nanangagne i Kristy amy mate zay ro hagnomey havelogne ty vata areo mete mate amy ty fagnahe, le ie velogne ama'areo ao. ¹² Naho ty am'izay,rikiahe, mpitrosa tikagne, fa tsy amy nofotsey ao mba hovelogne arake ty nofotse. ¹³ Fa naho velogne arake ty nofotse nareo, le ho mate, fa naho amy fagnahy amonoa areo ty asan-tsandrigne le ho velogne nareo. ¹⁴ Fa manahake iareo voatary ty Fagnahin'Andriagnanahare, iareo ro anak'Andrianagnahare. ¹⁵ Ko matahotse fa tsy raha nandrae ty fagnahim-pagnandevozagne nareo. Fa nandrae ty fagnahy fananganagne anake nareo, hitokatokavantika te hoe "Aba, O Roae! ." ¹⁶ Ty fagnahy ro vavolombelogne amy ty fagnahintika fa anak'Andriagnahare tika. ¹⁷ Naho anake tika, le mpandova ka, mpandova an'Andriagnanahare. Sady lova raike am'i Kristy ao tika, naho tena mindre mijale Ama'e vata'e tika, le homeam-bolonahetse mindre ama'e ka. ¹⁸ Fa ataoko o fijaleagne amy fiaignagne henane zao, le tsy magneva hampitahaegne amy ty volonahetse haseho amantika. ¹⁹ Fa ty voahare iabike naho magnantegna fatratse, le mandigne ty fampiboahagne iareo anak'Andriagnanahare. ²⁰ Fa ty voahare le natao ho raha tsy misy vara'e, tsy naho ty sitrapo'e manokagne, fa noho Reke nanao aze. Izay le amy toky nameigney ²¹ fa voahare reo mihitsy ro halaegne amy ty fagnandevoza ty fahalovagne, le hitondra amy ty fahafahagne ty am'ty volonahetse ty anak'Andriagnahare zay. ²² Fa haintika fa ty voahare iaby le mindre miseleke aigne naho mindre miasa agnate ty fitivotivognagne ao ndra henane zao aza. ²³ Tsy zay avao fa ndra ty vatantika aza, ie managne ty voaloham-bokatse ty Fagnahy ndra ty vatantika aza le miselekaigne agnate'e ao, mandigne ty fananganagne antika ho anake, le ty fagnavotagne ty vatantika. ²⁴ Fa tam'izay toky zay ro namonjeagne antika. Fa ze atokisantika fa hitroatse le mbe tsy hita, fa ia ty mandigne am-pitokiagne ty fa nihita'e. ²⁵ Fa naho matoky am'ze mbe tsy nitrea ntika tikagne, le mandigne zay am-paharetagne. ²⁶ Manahake zay ka, ty Fagnahy le magnampe agnate ty fahalemeantika ao. Fa tika tsy mahay ze vavake toko'e hataontika, fa ty Fagnahy mihiitsy ro mivalo hoantika amy ty fiselehagne aigne tsy hay rehafegne. ²⁷ I reke ze mieretseretse ty fo ro mahafantatse ty heve ty Fagnahy, satria i reke ro mivalo hoe ty mpino arake ty sitrapon'Andriagnanahare. ²⁸ Fantantika fa iareo tea an'Andriagnahare, le mindre ampiasae'e ho amy ty soa iabike ze kila raha,([Fagnamarenagne: Naho ty tokoe hoe "Mindre ampiasa'e ho amy ty soa abike ze kila raha," le ty dikan-drehake sasa'e manao te tihoeke: "Ze kila raha le mindre miasa ho amy ty raha soa."]) hoe iareo nitokave'e arakarake ty fandahara'e. ²⁹ Satria ze arofana'e voaloha'e le tendre'e voaloha'e ka mba hitovy amy ty tarehe ty Ana'e, mba ho zoke'ondaty amy rahalahi'e maro reo reke. Iareo ze nitondroe'e aloha, le nitokave'e avao ka. ³⁰ Iareo ze nitokave'e le nihamarigne'e avao ka. Iareo ze nihamarigne'e, le namea'e volonahetse avao ka. ³¹ Inogne zane ty raha tokoe horehafentika momba o raha reo? Naho miomba antika ty Andriagnanahare, ia ro hampatahotse antikagne? ³² Ie tsy niaro i ana'e tokagney fa nanolotse Aze hoantika akore ro hagnomeagne antika maimaim-poagne mindre ama'e ze kila raha iabike avao ka? ³³ Ia ro handay fanalaragne hanohetse iareo ndaty voa fidin'Andriagnanahare? Andriagnanahare raike avao ro magnamaregne zay. ³⁴ Ia i raike hihelokey? I Kristy raike ro mate hoantika, le mihoatse zay, natsangagne avao ka Reke. Manampake mindre aman'Andriagnanahare amy fitoeram-bolonahetse eo Reke, le mivalo hoantika ka Reke. ³⁵ Ia ty hahafake antika amy ty fiteava i Kristy? Fahoriagne, sa fijaleagne, sa fagnenjehagne, sa hakere, sa fiboridagnagne, sa loza, sa antsigne? ³⁶ Arake ty voasoratse te hoe: "Voavono isan'andro lava zahay noho ty ama'o avao. Niraesegne manahake o Agnondry hovonoegneo zahay." ³⁷ Agnate o raha maro zao iabike le mihoatse lavitse ty mpandrese zahay noho ty amy Reke tea anay. ³⁸ Fa rese lahatse raho fa ndra ty fahafatesagne, ndra ty fiaignagne, ndra iareo Anjele, ndra iare fanjakagne, ndra iareo raha iabike henane'zao, ndra iareo raha hoavy, ndra ty hery, ³⁹ ndra ty ambone, ndra ty laleke, ndra ty voahare hafa, le tsy hahasarake antika amy ty fiteavan'Andriagnanahare, ie am'i Jesosy kristy Tompontikagn' ao.