¹ O tsy fanta'areo vao; ry rahalahy (satria nirehake amy ty ndaty nangatake momba o lilio raho), fa ty lily ro mandily ty ndaty raike naho mbe ho velogne reke? ² Fa ty ampela magnambaly le voafehe lily ie amy ty valie naho mbe velogne reke, naho fa mate i valiey, le malalake ty lily i fanambaliagney reke. ³ Le naho mbe velogne ty valie, naho miarake amy ty lahilahy hafa reke, le hatao te ampela miriragne reke. Fa naho mate i vale ey, le vototse amy ty lily reke, le tsy miriragne ka reke naho mila lahilahy hafa. ⁴ Noho zay, ry rohalahiko, le natao ho maty amy ty llily ao ka nareo amy ty tahina i Kristy. Le natao zay hitraofa'areo amy ty ilae, hoe, tamy ty fivagnonae velogne, soa te hamokarantika voa ho an'Andrianagnahare. ⁵ Tamy tikagne mbe tagnate ty nofotse, ty filàn-kakeo, zay nampeae i lily, le nanjaka amy ty vatantika iareo hinday antikagne amy ty fahafatesagne. ⁶ Hinane zao le nafahagne amy i lily tika. Mate tami ty nameheagne antika tika. Le izay ty hahafahantika manompo ty fagnahy vaovao, fa tsy amy ty fahantera ty soratse. ⁷ Inogne areke ty horehafentika? Le o lilio vatae ro mampanan-kakeo? Raha tsy le vatae tsy hisy anio zao. Fie, tsy nahafantatse o hakeo raho, naho tsy nisy zay lily zay. Fa tsy nahafantatse magniry raho naho tsy nirehake ty lily te hoe: "Ko magniry". ⁸ Fa vao maike ndra nampea i didy ty hakeo ke le niavy amako atoy iaby ty fagniriagne. Naho tsy misy ty lily, le tsy niteo ka ty hakeo. ⁹ Te ntaolo raho le nivelogne tsy nisy lily, fie naho fa avy ty lily, le nivelogne ndraike ty hakeo, le mate raho. ¹⁰ Ty lily tokoe hinday fiaigne ro nivalike fahafahatesagne ho ahy. ¹¹ Ndra nagnindra i hakeoy ty fisia i lily le namitake ahike. Tamy i lily ie ro namonoae ahy. ¹² Naho zay ty lily le masigne, ary ty lalàgne le masigne, maregne, ro soa. ¹³ Le ndra nivalike fate ho ahy vao ty soa? Le raha tsy hisy anio zay. Fa ty hakeo, mba hafahae miboake ho hakeo amy zay soa zay, le nikaike fate tamako tatoy. Zay le ho amy lily zay, ty hakeo le mete hatoly hakeo vatae. ¹⁴ Fa fantantika fa boake amy fagnahy ty lily, fa raho boake amy ty nofotse. Fa navily ho ambane ho ndevo ty hakeo raho. ¹⁵ Fa ty raha ataoko, tsy mazava amako soa. Satria ze teako hatao, le tsy ataoko, le ze hejeko, le ataoko. ¹⁶ Fa naho manao ze hejeko raho, le miray hevetse amy ty lily fa soa ty lily. ¹⁷ Fa henane zao tsy raho sasa ro manao zay, fa ty hakeo zay velogne amako ato. ¹⁸ Fa fantako amako ato, zay agnate ty vatako, le tsy misy raha soa miaigne. Fa ty fagniriagne soa, fie tsy afake manao zay raho. ¹⁹ Fa ty soa teako le teako le tsy ataoko, fa ty raty tsy teako, ro ataoko. ²⁰ Le naho fa manao ty tsy teako hatao raho, le tsy raho sasa ro manao zay, fa ty hakeo velogne amako ato. ²¹ Le raho nahatrea, ty lilitse amako ato fa te hanao ty soa raho, fie ty raty ro amako ato amizao. ²² Fa falefale amy ty lilin'Andrianagnahare raho amy ty fagnahy maha ondaty. ²³ Fie mahatrea lilitse raike hafa amy ty mahakasike ty vatako raho. Izao le mifanohetse amy ty lilitse vaovao an-tsaiko ao. Manjietse ahy ho rese ty lily ty hakeo amy ty mahakasike ty vatako zay. ²⁴ ndaty sahiragne raho! Ia ty hagnafake ahy amy ty vata ty havilasy toy? ²⁵ Fa isaoragne an'Andianagnahare amy alala i Jesosy Kristy tompontika! Naho zay, raho ambatako le manompo ty lilin'Andrianagnahare ty saiko. Ndre eo zay, le manompo ty sata ty hakeo amy ty nofotse raho.