¹ Le izao ty raha nisy, naho fa nivory agnila i Jesosy eo ty ndaty maro nitsandregne ty saontsin'Agnahare, le nijohagne agnila ty sikala i Genesareta eo Reke. ² Nahavazoho sambo kede amy moro sikala ay Reke. Fa niakatse tao mpanjono rey fa nanasa ty arato iareo. ³ Niditse amy sambokede, ey Simona ay le nangatake amae hampijogna Aze an-drano lavitse i tanete ey. Niambesatse Reke nanoro lalan-kavelogne ze ndaty ivela i sambo kede ey. ⁴ Naho fa nivita izay, le niaontsy amy Simona tihoeke Reke: "Aisiro amy ty laleke soa lakao le ajogno amizay arato areo oy hahazoa'areo fiagne maro." ⁵ Simona nanoigne Aze izao te: "Ragnandriagne, fa laha niankale anio zahay, fa le noly avao, fe ie naho ty tsarao, le hoazotsoko i aratoy. ⁶ Naho fa natao iareo izao, le nahavory fiagne laialegne, le niriatse ty arato iareo. ⁷ Le nikoike ty ragne'e am-po ty sambokede hafa iareo hagnampe iareo. Le niavy iareo le nameno i sambokede roe iareo, lefa ho ny hileteke iareo. ⁸ Simona Petera naho fa nahatrea izao, le nihohoke amy ty fandia i Jesosy, nirehake izao te: "Misintaha ahy, fa ndaty behakeo raho." ⁹ Fa nahalatsa aze, naho ty nindre ama'e ty habey ty fiagne niazo iareo. ¹⁰ Tagnate izao ty Jakoba naho i Jaona, ana i Zebedio, miharo asa amy simona. Jesosy nanao izao amy Piera te: "Ko matahotse rehe, fa ndaty ka ty tarihio hinanikeo." ¹¹ Naho fa nindese iareo niala amy rano'y ty sambokede iareo, le nenga iareo iaby ze raha tao fa nandeha nagnorike Aze. ¹² Naho mbe tamy tanagney tao Reke, le nisy lahy boka izay ty teo. Vaho nahatrea i Jesosy reke, le nihohoke naho nilalilaly Amae eo, nanao tihoeke: "Andriantompo, naho zoto'o, le liovo raho." ¹³ Nahitsi'e i Jesosy ty fita'e le norambese'e reke, naho nisaontsy hoe izao te: "Zotoko, maliova rehe" le eo naho eo avao lefa niafake ty haboka'e. ¹⁴ Norara'e reke tsy hirehake zao ndre ama ia ndre ama ia, fa izao ty nambarae te: "Mandena amy ty lalao, miboaha amy ty mpisorogne le mindesa raha hasorogne ho fagnaliovagne azo, arake ty lily i Mosesy, hijoroa'o vavaolombelogne ama iareo." ¹⁵ Fie ty talily Aze le ndra vao maike niparitake amy i tanàgney avao, le ndaty maro ty niavy hitsandregne ty fagnanarae naho ninday ty arete iareo ho taha'e. ¹⁶ Fa ie Reke le misintaka avao amy ty tane tsisy raha le mivavaka agne. ¹⁷ Tamy ty andro raike nagnoroa'e lalan-kavelogne, le nisy Fariseo naho ty mpampianatse lily nitoboke eo ze nirike amy ty tanàgne sambehafa amy faritane i Galilia naho Jodia, naho ty boake amy ty tanà i Jerosalema. Ty hery i Andriantompo ro tama'e ao hitaha'e. ¹⁸ Le nisy lahilahy maromaro niavy, ninday ajalahy raike kepeke amy ty fandrea'e, nanao ze fomba hindesagna aze hatao aloha i Jesosy eo iareo. ¹⁹ Tsy nihay iareo ty hanjilihagne aze agnate'e ao fa maro ndaty, le nandeha amy ty tompo i tragno'y iareo, le nampikomake tafo i tragnoy iareo naho le nampizotso i lahy reketse ty fandrea'e, agnivo ty ndaty ao, agnoloha i Jesosy eo. ²⁰ Naho fa nahavazoho ty finoa iareo ty Jesosy, le nanao tihoeke: "Afake ty hakeo'o lahio." ²¹ Sambe nametsevetse ampo'e ao mpahay lily naho i fariseo rey, le nanao izao te: " Ia vao ty lahy mirehake raty tiagne? Ia ty afake magnaha hakeo naho tsy Andrianagnahare raike avao? ²² Niarofàna i Jesosy, ty raha vinetsevetse iareo, le notohine'e tihoeke te: "Nagnino nareo ndra magnontane izao an-troke eo? ²³ Ty aia ro ndra ho mora rehaka aze: 'Afake ty hakeo'o' ke ty mirehake tihoe te: 'Mitroara le mandena?' ²⁴ Fa ie ampafohinegne anareo fa ty Ana Ondaty le managne lily hagnaha hakeo amy ty tane toy, le ataliliko azo, mitroara, le ndeso ty fandrea'o le mandena antragno'o agne." ²⁵ Eo naho eo avao le nitsangagne nangalake ty fandrea'e miatreke iareo reke, niavy eo le nienga ty teo nandeha antragno'e agne, nagomey voninahitse an'Agnahare. ²⁶ Nilatsa izao iabike ty ndaty teo naho le sambe nagnomey voninahitse an'Agnahare iaby ka. Nihondrahondra ty tahotse iareo, nirehake zao te: "Nahatrea sahatse tika ty androany." ²⁷ Tafara ze raha nisy zay le nagnavelo Jesosy, naho le nahatrea mpitake karatse atao Levy zay nitoboke amy ty tragno famorian-karatsey. Nirehake zao Reke tama'e te: "Orio Raho." ²⁸ Le nitsangagne ty Levy nagnorike Aze, le nafoe iaby ty raha'e. ²⁹ Le nanao famahagne bey tan-tragno'e tao hoe'i Jesosy ty Levy. Maro ty mpitake karatse naho ndaty hafa niharo latabatse ama'e niharo fihinagne tamy iareo. ³⁰ I Fariseo naho i mpanoratse lalàgne rey nitoreo tamy mpiana'e rey te: "Nagnino Iheo ro ndra miharo fihinagne amy ty mpitake karatse naho ty tsy vokatse maro toa ao?" ³¹ Le nanoigne zao ty Jesosy tihoeke: " Tsy mila dokotera anio ze jaramba; fa ze siloke avao. ³² Tsy niavy hikoike ze maren-tane ho Raho, fa hiantso ty tsy vokatse amy ty fibebahagne." ³³ Le hoy iareo tama'e te: "Iareo mpiana i Jaona le mateteke mifaly hanegne naho mivavake, ty Fariseo ka le nanao hoe izao avao ka. Fie ty mpianao le mihinagne nao misotro." ³⁴ Jesosy nirehake zao te: "Misy ndaty vao mahavita tsy mampihinagne hanegne ty longo ty mpamokatse naho mbe amy iareo eo i mpamokatsey? ³⁵ Fe ie hoavy ty andro hangnafahagne ty mpamokatse izao amy iareo eo, le amy izay vao hifaly hanegne iareo." ³⁶ Le nanao fagnoharagne tamy iareo ty Jesosy te: "Tsy misy ndaty mandriatse antsasa ty lamba'e vaovao le mampiasa izao amy ty lamba'e fa taloha. Naho manao izao reke, le manimba ty lamba vao'e, ty tapa i lamba vao'ey ka tsy hifagnorike amy lamba fa raty'ey. ³⁷ Tsy misy ndaty hagnisy divay ty siny holitse fa niasa ela. Naho manao izao reke le, naho manao izao reke le hampitriatse i holitsey i divay vaovao'y, le ho longagne i divay, le ho simba ka i siny holitse'y. ³⁸ Fa ty diva'e vaovao le tsy maintsy hatao agnate ty siny holitse vaovao. ³⁹ Tsy misy ndaty boake ninogne ty divae taloha le hipay ty vao'e, fa hanao zao reke te: " I taloha'y ro soa."