¹ Le naho fa ny Sabata le nandeha an-tanembare'y ty Jesosy le i mpiana'e rey nangalake ty salohim-bare, le nikoseke izao an-tanà'ey le nihinagne ty vokatse. ² Ty ila'e tamy iareo Fariseo nirehake tihoe: "Manao akore nareo tsy manao raha amy ty tokoe ho ie ro ndra manao izao amizao andro Sabata zao?" ³ Izao ty natoy Jesosy teo fa nikere reke: "Mbe tsy vinaky areo vao ty raha natao i Davida nah iareo naho ty lahilahy nindre ama'e? ⁴ Nizilike an'anjomban'Agnahare ao reke, le nandra'e ty mofo ty fagnatrehagne naho nikama kedekedeke amizao, le namea'e kedekedeke tamizao ka ty lahilahy nindre tama'e hihinagne amizao, ty mpisorogne avao ro orihe ty lily naho mihinagne amizao. ⁵ Naho ny avy teo le nanao izao Reke tihoe: "Ty ana o'ndaty ro tompo ty Sabata." ⁶ Tamy ty andro Sabata hafa ka le niditse ta Synagoga tao Reke le nampianatse ty ndaty tao. Nisy lahy mate tanagne havanagne zay ty tao. ⁷ Niambegne soa Aze avao i mpanora-dalàgne naho fariseo rey hahavazoho te hitsabo ndaty amy ty andro Sabata ka Reke, mba hahafaha iareo hizaka Aze. ⁸ Fe ie niarofàna'e ty raha agnate ty say iareo le izao ty norehafe i Jesoa tamy lahy maty tanagney te: "Mitsanagàna le miavia agnivo ty maro etoa." Le nitsangagne i lahy le nijahigne teo." ⁹ Jesosy nirehake zao te: "Magnontane anareo Raho, mete amy ty andro Sabata vao ty fanoagne soa ke ty raty, ty manavotse fiaigne va ke ty mamoteke aze?" ¹⁰ Le nitolike ty magnodidign'aze iabike Reke le nirehake tamy lahy te: "Ahintsio ty tagna'o" le nanao izao reke, le nisitragne ty tagna'e. ¹¹ Nimate ty heloke iabike iareo le nifampirehake mahakasike ty tokoe hatao iareo amy Jesosy. ¹² Tamy o andro zao le nandeha am-bohitse agne Reke hivavake. Notohiza'e le nihalegne avao ty fivavaha'e tamin'Agnahare. ¹³ Naho fa ny maray, le nitoka i mpiana'e rey hoama'e eo Reke, naho nijibogne ty folo roa ambe tamy iareo, le notokavy'e te Apostoly. ¹⁴ Ty agnara o'Apostoly reo le Simona (nantsoegne te Petera) ty rahalahi'e Andrea, Jakoba, Jaona, Filipo, Bartelemeo, ¹⁵ Matio, Tomasy, Jakoba anaka lahy i Alfeo, Simona antsoegne te Zelota, ¹⁶ Jodasy ana i Jakoba, le i Jodasy Iskariaota, nanjare mpifotetse. ¹⁷ Boakeo Jesosy nizotso boake ambohitse'y nindre amy iareo le nitsangagne amy ty tane maregne reketse i mpiana'e rey naho ty ndaty maro boake Jodia naho Jerosalema naho ty boake amy ty moro i Tyro naho Sidona. ¹⁸ Niavy teo iareo mba hitsanogn'Aze naho ty mba hitsaboagne iareo. Sitragne iaby ka ndre ty ndaty trinobo ty fagnahy raty. ¹⁹ Ty ndaty iaby teo le nipay lalagne ty hitsapa Aze fa nikatse tama'e ty hery magnitra, le nisitragne iaby iareo. ²⁰ Le nitolike amy mpiana'e rey Reke, le nirehake tihoeke: "Haha nareo ze rarake, fa hoanareo ty fanjakan'Agnahare. ²¹ Haha ze kere amy hinane zao, fa ho vontsigne nareo. Haha nareo ze mitagny hinaneo, fa hihehe nareo.' ²² Haha nareo ze heje o'ndaty, irihia'iareo naho haratie iareo, noho ty amy ty Ana o'Ndaty. ²³ Mifalefalea amy zao andro zao le mirebeha, satria ho azo antoke fa hadrae valenkasoa boak'andanitse agne nareo, fa manahake zay ty nindesa o razagneo o'mpitoky reo. ²⁴ Fa ho hakeo areo managne vara, fa fa niazo areo ty raha nampalio fo anareo. ²⁵ Loza'areo ze vontsigne amy o hinane zao, fa mbe ho keré nareo naho fa afara agne. Loza'areo mihehe amy hinane zao, fa hisaona naho hitagny nareo naho fa afara agne. ²⁶ Loza'areo, naho fa magnombara raha soa ama'areo ze kila o'ndaty, fa toe manahak'izay ty natao ty raza'iareo tamy o mpitoke sandoke reo. ²⁷ Fa magnombara anareo ze mitsanogne Raho, miragneta ty fahavalo'areo le manoa soa amy ty malaigne anareo. ²⁸ Tretrezo ze magnozogne anareo le mivavaha ho'e ze manao tsinontsinogne anareo. ²⁹ Naho misy mijera ty fifio raike, le ameo aze ka ty raike, naho misy mitavagne ty lambao, le ko azitse ndre ty fisikio. ³⁰ Ameo aby ze mangatake amao. Naho misy mangalake ty raha'o, le ko milalilaly ty hagneregnagne izao amao. ³¹ Manahake ty raha irie'o hatao ty ndaty amao, ro tokoe hatao ka amy iareo. ³² Naho ze ndaty tea azo avao ro ho teao, inogne ty soa ho azo'o amizao? Fa ndre ty ndaty tsy vokatse aza le tea ty tea aze ka. ³³ Naho ty ndaty manao soa amao avao ro hanoa'o soa, le inogne ty soa hoazo'o amizao? Fa ndre ty tsivokatse ka le manao manahak'izay. ³⁴ Naho tsy hampitrosa naho tsy ndaty mahavake izao amao avao rehe, le inogne ty soa hoazo'o amizao? Fa ndre ty tsivokatse le mampitrosa avao amy ty tsivokatse, hahazoa'e raha manahak'izay avao. ³⁵ Fa mamio ty fahavalo'areo le manoa ty soa amy iareo. Mampitrosa le ko mitamà ty vale'e le ho bey ty valesoa hoazo'areo le ho ana ty Andidimbonegne agne nareo, fa Ie vata' le soa fagnahy amize ty tsy misaotse naho ty ndaty raty fagnahy. ³⁶ Miferegnesa manahake ty Rae'areo mpiferinaigne. ³⁷ Ko mitsara, le tsy ho tsaragne nareo. Ko magnomey tahegne, le tsy homean-tahegne, votsoro ty hafa, le hovotsoragne ka nareo. ³⁸ Magnomeza, le omeagne anareo ka izao. Ty matarike - atao vatae, mindre ahetseke le mitoborogne - ro ho ahiligne ampofoao eo. Arakarake ty fatra areo, ro hamaragne anareo hoe zay ka. ³⁹ Le nanao fagnoharagne ho'e iareo Reke. "O vao ty goa afake hitarike goa hafa? Nao manao izao iareo tsy ho tota agnate ty aly iaby iareo roe, ke tsie? ⁴⁰ Ty mpianatse raike le tsy bey noho ty mpampiana'e, fa ze nahavita ty fiofana'e le ho hambagne amy ty mpampiana'e. ⁴¹ Nagnino ihe mahatrea ty hatà kede agnate ty maso ty rahalahio, fie tsy mahatrea ty hatà bey miebagne agnate ty maso'o? ⁴² Ty akory ty irehafao ty rahalahio tihoe: "Votsoro raho rahalahe, hangafake ty hatà kede amy ty maso'o tiagne,' fe ie ndra ty bey amao tsy le tsy trea'o? Ry piso mpagnaja hoho! Afaho agnate ty maso'o ao hey ty hatà bey, le hahaonigne soa rehe le afake ty hatà kede agnate ty maso ty rahalahio. ⁴³ Fa tsy misy hata soa hamokatse voa raty, na hazo raty hamokatse voa soa. ⁴⁴ Fa ty hatà tsikiraike le fantatse avao amy ty voa maro vokare'e. Fa tsy afake hipay voan'adaro amy ty fatike ty ndaty, na hangalake voaloboke ama ty hatà voaroy. ⁴⁵ Ty ndaty soa le mamokatse soa amy ty hareagne soa ty fo'e, le ty ndaty raty mamokatse raty boake amy ty hareagne raty ty fo'e. Fa ze aboa'e ty fo'e ro rehafe ty vava'e. ⁴⁶ Magnino nareo mitoka Ahy: 'Andriantompo, Andriantompo,' mone izao ty raha tsarako tsy orihe areo? ⁴⁷ Ty ndaty iaby miharine Ahy naho mitsanogne ty rehako le magnorike izao, le ambarako anareo te manahake ty inogne reke. ⁴⁸ Manahake ty ndaty nagnamboatse tragno reke, le nihaly laleke ty tane hagnoregnagne foto-tragno ambone ty vato. Naho fa niavy ty oragne nanjare ranobey, le nagnaly lalagne handrodagne o tragno zao, fa le tsy hampagninogne aze, satria soa ty foto'e. ⁴⁹ Ze ndaty nitsanogne ty tsarako fa ie tsy nagnorike izao, le hanahake ty ndaty nagnorigne tragno ambone ty tane tsy nagnisy fototse. Naho fa niavy handrodagne o tragno ty rano bey, le ho rava amy inge avao izao, le tsy ho ei sasa o tragno zao."