¹ Tafara izao ty Jesosy, naho fa nifeno Fagnahy Masigne, le niheregne boake ambavarano i Jordana, le nindese ty Fagnahy Masigne amy ty tane andiolio agne ² amy ty nangalà i rekoko Aze fagnahy agnate ty efapolo andro. Tsy nikama ndra ino ndre inogne Reke tagnate izay andro zay, ie amy ty andro fara'e le nikeré avao Reke. ³ Le hoe ty kokolampe amae: "Naho toe Anak'Andrianagnahare vatae Rehe, le ampanjareo mofo ty vato toy." ⁴ izao ty natoy Jesosy tihoe: " Voasoratse te: Tsy ty hanegne avao ty iveloma ty ndaty.' ⁵ Niavy eo le finaon-drekoko Reke amy ty toeragne ambone le natoro'e Aze tsiela tsiela ty fanjakàgne iaby ambone ty tane toy. ⁶ Le zao ty nataon-drekoko te: "Hameako azo iaby ty lily naho ty hasoa'e, fa toe fa nimeagne ahy reo, naho le hameako ze ndaty teako hameagne aze ka. ⁷ A naho, mitongalike naho mitorogne ahy Rehe le ho Azo iaby zay." ⁸ Fe ie Jesosy nanoigne aze te: "Voasoratse te: 'Hidera ze Andriantompo, ho Andrianagnahareo rehe, le Ie raike avao ro ho torogneo." ⁹ Le mbe nindesen-drekoko avao ka ty Jesosy nandeha ta Jerosalema le natao'e amy ty fara'e ambone amy ty anjomba fivavahagne, le norehafe'e hoe izao te: "Naho te anak'Andrianagnahare Rehe, le akopao boake ambone etoy ty vatao, ¹⁰ fa toe fa sinoratse te: 'Handily ty anjeli'e amao Reke, le hiaro Azo,' ¹¹ le iareo hagnandriagne Azo amy ty tanae, le tsy ho voatsikamba ty vato ty fandia'o.'" ¹² Le nanoigne zao ty Jesosy tihoeke: "Fa natalily te: 'Tsy hangalake ty fagnahin'Andriantompo Nagnahareo rehe."' ¹³ Naho fa nivita ty alake fagnahy nata ty kokolampogne i Jesosy, le nandeha reke naho nienga Aze mandra-piavia ty fotoagne hafa ka. ¹⁴ Le Jesosy niheregne ta Galilia ndese ty hery ty Fagnahy, le ty talily mahakasike Aze le fa fonga nirey ty faritse iabike nagnodidigne. ¹⁵ Le nanomboke nampianatse ty Synagoga'e iareo Reke naho le nitea ty ndaty. ¹⁶ Nandeaha a Nazareta, amy ty tane nibeiza'e Reke, naho ty raha fatao'e, le nilitse agn'anjomba fivavahagne ao amy ty andro Sabata Reke le nijohagne hamoy saontsy mafe. ¹⁷ Natolots'Aze ty saresare ty taratasy i Isaia mpitoky. Nanokake i bokey Reke le vazoho'e ty toeragne nanoratagne izao, ¹⁹ Amako ato ty Fagnahy i Andriantompo, toe jinobo'e Raho hitsara talily soa ho'e ty rarake. Ie ro nagnirak'Ahy hagnafake ty gadra, naho hampatrea indraike ze goa, hagnaha ze mitoreo, ¹⁸ hitalily ty taogne haliovagne fo amin'Agnahare." ²⁰ Le nahoro'e taratasy nahere'e amy ty mpitareke fivavahagne, le niambesatse Reke. Ty maso ty ndaty ty Synagoga'e agn'anjomba tao le nandrendreke Aze iabike. ²¹ Le nisaontsy ama iareo tihoe Reke: "Androany ty hilefe'a izay Soratse Masigne nirey areo izay." ²² Fa ty ndaty iaby tao le nirehake soa ty miomba Aze naho nilatsa ty rehake soa notsarà'e, le nagnontane Aze te: " Tsy anadahy i Josefa ay vao toy io?" ²³ Reke nanao izao ama iareo te: "Fa haiko te hanao fagnoharagne hoe izao amako nareo te: 'Dokotera, tahao ty vatao. Fa ndra inogne ndre inogne ty raha niony ay natao ta Kapernaomy, le manoa ho'e zay ka amy ty tanà'o."' ²⁴ Fa ie zao hoa Reke: "Ataliliko anareo, fa tsy misy mpitoky maregne amy ty misy aze." ²⁵ Fe ie ambarako soa anareo fa maro ty ampela vantotse ta Israely tamy ty andro i Elia, naho fa nihily agnate ty telo taogne naho enem-bolagne i lanitse ey, le niavy ty kere raha tsy tan-tane tamy ze kila tane. ²⁶ Fe ie Elia tsy tamy ty tane misy zao ndre raike, fa ta Zerapata ta Sidona avao, tamy ty vantotse ze nitoboka agne. ²⁷ Fa maro ty boka ta Israely tamy ty andro i Elisa mpitoky, fe ie le tsy nisy niafa'e ndre raike naho tsy Namàna Nte Syriana avao." ²⁸ Ze ndaty iabike tamy anjomban'Agnahare ey tao le nimate ty heloke naho fa naharey o raha aby zao. ²⁹ Nitsangagne iaby iareo le nandrara Aze hisintake tanàgne ey, le nasio iareo amy ty vohitse amy misy ty tanà iareo, hampitotagna Aze an-tevagne agne. ³⁰ Fe ie nitsile ampo i maro oy ao Reke le nignavelo an-tany hafa. ³¹ Le nizotso ta Kapernaomy agne Reke, amy ty tanàgne raike à Galilia agne, le nanoro lalan-kavelogne iareo ka Reke ama ty andro Sabata. ³² Iareo tao le nilatsa amy ty fagnanaragne natao'e, fa nitsara amy ty heri'e Reke. ³³ Le nisy lahy raike niziliha ty fagnahy raty ty kokolampogne te agn'anjomba fivavahagne tao, le nihorentsegne mafe reke nanao izao tihoe: ³⁴ "Ah inogne ty raha hiaroantika, ry Jesosy Ntenazareta? Niavy hampidemodemoke anay vao Iheo? Fantako anio te ia Reheo- Itokagne Masin'Agnahare ey!" ³⁵ Jesosy nandrara kokolampogne ey, nanao izao te: "Mitsigna le miafaha amae ao!" Naho fa nanorake i lahy naho nanonta aze agnivo eo kokolampogne ey, le niala amae, tsy nahavita ndre ty nampitey lio aze. ³⁶ Nilatsa iaby ty ndaty tao, le tsy nitapake ty safiry zao. Nirehake izao iareo tihoe: "Ty saontsy manao akore izay io?" Lili'e amy ty fahefa'e naho ty heri'e ty fagnahy raty le niakatse." ³⁷ Ah izao raha nisy zao le fonga naharey izao laza'e izao iaby ze faritse nifankarine. ³⁸ Nienga i anjomban'Agnahare ey ty Jesosy le nilitse tan-tragno i Simona ao. Nosahiragne ty tazo mahery ka ty rafoza i Simona ampela, le nangatake ty hivia'e amy iareo ao. ³⁹ Le nijohagne miatreke aze eo Reke le nandara i aretegne ey, le niafaka amae izao. Avy le nitsangagne reke naho nitorogn'Aze. ⁴⁰ Naho fa ny hariva i andro'y, le sambe ninday ty ndaty iaby marary ty aretigne maro sambe hafa tamy Jesosy teo iaby ndaty rey. Nagnomey ty fitae ama iareo tsikiraike teo Reke nitaha iareo. ⁴¹ Ty kokolampogne tamy iareo tao ka le niakatse ama iareo ao iabike, nikorake mafe nanao tihoeke iareo te: "Ihe ro Anak'Andrianagnahare!" Fie Jesosy nandrara i kokolampogneey naho tsy nampirehake iareo, fa toe hay iareo te Reke ro Kristy. ⁴² Nagnalegnalegne, nagnavelo amy ty tane tsy misy ndaty Reke. Maro ty ndaty nipay Aze namonjy ty toeragne nisy Aze. Natao iareo ze fomba hitanagne Aze tsy hienga iareo. ⁴³ Nisaontsy tihoe izao ama iareo Reke te: "Hagnombara talily soa miomba ty fanjakan'Agnahare amy ty tanagne hafa Raho, fa toe izay ty nagnirahagne Ahy atoy. ⁴⁴ Niavy eo Reke le nagnonjogne ty fagnombara'e amy ty anjomban'Agnahare notsitsie ty Jodia.