¹ Le fara'e, nareo rahalahe, mampahere'y naho magnanatse anareo zahay am'i Tompo Jesosy ao. Naho nahazo ty fampianaragne boak'ama'ay nareo momba'ty fomba tsy maintsy handehana'areo naho hamalefalea'areo an'Nagnahare, ty am'o lalagne andehanagne'o avao ka, le mba anaovo'areo milikoatse izay ka. ² Fa inareo le mahafantatse o fampianaragne namea'ay anareo'o tami'ty alala'i Jesosy Tompo. ³ Fa izao ty sitrapon'Andrianagnahare, le ty hahamasigne anareo, mba hiala'areo ami'ty tsy firiragnagne, ⁴ le ty hahaia ty kiraikiraike boak'ama'areo ty fomba ahazoagne ty fanagna'ty vatae am'ty fahamasignagne ao naho volonahetse, ⁵ tsy ami'ty filan-draty (manahak'iareo Jentilisa tsy mahafantatse an'Nagnahareo). ⁶ Ano'areo mba tsy hisy ndaty handika na hagnaraty ty rahalahi'e am'izay. Fa i Tompo ro mamale am'o ze kila raha iaby, manahake ty nampitaoa'ay mialoha naho nitsangana'ay vavolombelogne t'ama'areo. ⁷ Fa i Andrianagnahare tsy nitoka anay ho ami'ty fahalotoagne, fa ami'ty fahamasignagne. ⁸ Naho zay reke, ireke mandietse izay le tsy mandietse ndaty, fa Andrianagnahare, ty nagnomey ty Fagnahe Masigne ho anareo. ⁹ Mahakasike ty fifankateava'areo mpirahalahe, tsy mipay ndaty hafa nareo hanoratse ho anareo, fa ty vata'areo le nampean'Andrianagnahare mba hifankatea. ¹⁰ Anovo'areo vatae zay, ho ey'iareo rahalahe iaby era'i Makedonia. Fa zahay le magnanatse anareo, nareo rahalahe, mba hanao mihoatse. ¹¹ Magnanatse anareo ka zahay mba hanandratse hiaigne am-pilaminagne, hihevetse ty raharaha'areo rery, naho hiasa ami'ty tagna'areo, manahake ty nandilia'ay anareo, ¹² mba hanagna'areo fagnahy soa imaso'o tsy mpino'o naho tsy hanagne raha ijaleagne. ¹³ Fa tsy tea'ay tsy ho fanta'areo, nareo rahalahe, ty mahakasike ze nivilasy, mba tsy hahaferenaigne anareo manahake o ilae tsy managne antoke ami'ty hoavy io. ¹⁴ Fa naho mino tika fa Jesosy le nivilasy naho nivagnombelogne ndraike, le manahak'izay ka ty hadesan'Nagnahare miarak'ami i Jesosy iarey ze nivilasy t'amae ao. ¹⁵ Fa izao ty ambara'ay ama'areo tami'ty saontsy i Tompo, fa itikagne ze velogne, ze sisa tavela ami'ty fiavia'i Tompo, le tsy hialoha vatae iareo fa nimate. ¹⁶ Fa ty saontsy i Tompo ro hijotso boak'andagnits'agne. Ho avy miarak'ami'ty feo ambone Reke, miarak'ami ty feo ty Arkanjely, naho miarake ami'ty trompetran'Andrianagnahare, naho ty vilasy am'i Kristy ro hivagnombelogne alohae. ¹⁷ Avy eo tikagne velogne, ze sisa tavela, hiarake hiakatse am'iareo ambone rahogn'ey naho hihaogne am'i Tompo ambone habakabake'ey. Am'izay le hiarake am'i Tompo lalandavatika. ¹⁸ Naho izay reke, mifampitretreza am'o talily reo.