¹ Naho izay, naho tsy afake niaretse izay sasa zahay, le nivetsevetse'ay te fanjaka ty mitobeke raike t'a Atena tao. ² Nagnirake i Timoty zahay, roahalahia'y naho mpidre-miasa ho an'Andrianagnahare amy ty talily soa'i Kristy, mba hagnamafe naho hagnatanjake makasike ty finoa'areo. [Fagnamarihagne: Ze dikan-drehake ila'e hafa ntaolo le vakiegne hoe izao: "Nagnirake i Timoty zahay, roahalahia'y naho mpanompon'Andrianagnahare amy ty talily soa'i Kristy ao."] ³ Nataoa'y zay mba tsy hisy ndaty ho taitse ama'o fahoriagne'o. Fa ty vata'areo le mahafantatse fa zay ty nanondroagne antika. ⁴ Maregne vata'e, naho fa nindre tama'areo zahay, le nirehake mialoha tama'areo te itika le tsy maintse hampijalegne, naho nisy zay, arake ty fanata'areo. ⁵ Naho ze anto'e zay, naho fa tsy naharetse izay sasa raho, le nagirake mba hahafantarako ty finoa'iareo. Va'e fa nitsohe'ty mpitso-kevetse i nareo'o, naho le tsy hisy vara'e ty asantika. ⁶ Fe ie niavy tama'ay tatoy ty Timoty naho boak'ama'areo tegne le ninday vaovao mahafale'ty finoagne naho ty hate'areo ho anay. Nitsara tama'ay reke te nareo le managne fahatsiarovagne fanjaka anay avao, naho le magniry mafe nareo ty hahatrea anay manahake ty fagniria'ay hahatrea anareo. ⁷ Naho izay, ry roahalahy, zahay le nampahereze'areo noho'ty finoa'areo, t'agnate ty fatahoragne naho fijalea'ay iaby. ⁸ Fe ie naho velogne anito zahay, naho mipiteke mafe am'i Tompo nareo. ⁹ Fa fisaoragne hoe ty ai'ay ro azo'ay omegne an'Andrianagnahare ama'areo, tamy ty ze heneke fifaliagne anagna'ay t'agnatreha'ty Andrianagnahare'ay teo noho ty ama'areo? ¹⁰ Mivavake mafe andro amagn'alegne zahay mba mete hahatrea ty tarehe'areo naho le hameno ze tsy ampe amy ty finoa'areo ao. ¹¹ Andrianagnahare Raentika vata'e, loneke ty Jesosy Tompontika, hagnitsy ty lala'ay ho ama'areo. ¹² Loneke ty Tompo hampitombo naho hampandroso ama'ty fifankateava'areo amy ty hafa naho ze kila'o ndaty, manahake ty atao'ay ama'areo ka. ¹³ Loneke Reke hagnamafy ty fo'areo, le mba tsy hanan-tahe amy ty fagnamasinagne iareo agnatrehan'Andrianagnahare Raentika, amy ty fiavia'i Jesosy Tompontika naho ze masigne iaby.