¹ Fa ty vata'areo le mahay, ry rahalahy, fa tsy fiaviagne fahatane ty niavia'ay ama'areo teto. ² Fanta'areo fa taloha teo le nijale ro nalaegne baraka ta Filipy tagne zahay. Izahay le nahasaky am'Andriagnanahare'ay ao ty hagnombara ama'areo ty talilisoan'Andriagnanahare tagnate ty fandieragne bey. ³ Satria ty fagnanara'ay le tsy avy amy ty fahadisoagne, naho avy am'ty fahalotoagne, na ie avy amy ty fitake. ⁴ Fa ie, arake ty nagnekean'Andriagnahare anay mba hatokisagne amy ty talily soa, le zay ty irehafa'ay. Mirehake zahay, tsy hampifale ty ndaty, fa hampifale an'Andriagnanahare. I Reke ro maharofana ty fo'ay. ⁵ Satria mbe lia'ay tsy nampiasa rehake mampikabeake ndre mbia ndre mbia, arake ty fanta'areo, ndra fialan-tsigne amy ty fitsiririagne, satria Andriagnanahare ro ndaty aivo'ay. ⁶ Ndra fipaiagne volonahetse boake ama'o ndaty mbe tsy natao'ay, ndra boake ama'areo ndra boake amy ty hafa. Izahay ka afake mangatake o tombotsoa manahake iareo Apostoly i Kristy io. ⁷ Fe ie, zahay le tsotsa ama'iareo manahake ty rene manambitambe ty ana'e natera'e. [Fagnamaregnagne: ty dikan-drehake taloha ila'e le manao te hoe: "Fe ie, zahay manahake o anak'ajajao ama'areo eo, naho fa manambetambe ty ana'e natera'e ty rene'e."] ⁸ Le manahake zay ro nanagna'ay fiteavagne ho anareo. Malio fo zahay mizara ama'areo, tsy ty talily soan'Andriagnanahare avao, fa ty fiaigna'ay rerike ka. Satria nareo nanjare mami'ay vata'e. ⁹ Satria tiaro'areo, ry rahalahy, ty asa'ay naho ty harerafa'ay. Niasa andro aman'alegne zahay mba tsy hahafaha'ay mampanday ty mavesatse ty raike ama'areo. Tama'ze fotoagne zay, nagnambara ty talily soan'Andriagnahare tama'areo zahay. ¹⁰ Nareo ro ndaty aivo, le Andriagnanahare avao ka, fa masigne, naho maregne, le tsy manan-tahigne ka ty fitondra-tegna'ay tama iareo ze mino. ¹¹ Manahake zay ka le fanta'areo te hoe nanao akore ty natao'ay ama'iareo abike fa manahake ty natao ty baba'e amy ty ana'e natera'e, ¹² nangatake naho nampahery, le nandrisike anareo zahay mba handeha amy ty fomba magneva an'Andriagnanahare, ie mitoka anareo mba ho amy ty fanjaka'e naho ty volonahe'e manokagne. ¹³ Fa ze atao'e zay ro isaora'ay an'Andriagnahare hatrampara'e. Fa nareo naho fa nandrae ty hafan'Andriagnanahare boake ama'ay re'areo, le nirambese areo zay tsy hanahake ty reha'o ndaty. Fe ie, niraese'areo arake ze maregne zay, le ty saontsin'Andriagnanahare. Le zay saontsy zay avao ka ro miasa ama'areo ze mino. ¹⁴ Satria nareo, ry rahalahy, le nanjare nanahake ty fiangon'Andriagnahare a Jodia agne am'i Jesosy Kristy. Fa nareo le nijale avao ka tama'o raha'o naho ty raha natao ty mpiray tanendrazagne ama'areo, manahake ty nanjo iareo ka amy ty raha natao ty Jiosy tama'e. ¹⁵ Iareo Jiosy ro namono i Jesosy Kristy naho ty mpitoki'e. Iareo Jiosy ty nandroake anay. Tsy nankato an'Andriagnanahare iareo. Fe ie fahavalo ty ndaty iabike anio iareo. ¹⁶ Nandrara anay iareo tsy hirehake amy iareo Jentilisa mba tsy hamonjeagne iareo. Ty voka'izay le mameno hakeo ty vata'e lomogn'andro avao iareo. Fe ie le tsy maintsy ho avy amy iareo eo avao ty havigneragne amy ty fara'e. ¹⁷ Nisintake tama'areo zahay, ry rahalahy, tagnate ty fotoagne fohe, amy ty fiatrehagne fa tsy amy ty fo. Le vata'e nazoto zahay, nagniry mafe ty hahatrea ty tarehe'areo. ¹⁸ Satria nagniry ho ama'areo agne zahay, iraho, i Paoly, mateteke, fe ie nanakagne anay ty andrebolisy. ¹⁹ Fa inogne moa ty fitamae'ay ty ho avy, ndra fifaleagne, ndra sabakam-boninahetse ty fandreseagne agnatreha i Jesosy Tompontika eo amy ty fiavia'e. Ay vaho tsy nareo manahake ty hafa avao ka vao? ²⁰ Fa nareo ty volonahe'ay naho ty fifalea'ay.