¹ Naho nihily iaby ty filira iaby mbeo Jeriko noho ty tafike Israely. Tsy nisy niakatre naho tsy nisy nilitse tao. ² Hoe ty Yaveh tamy Josoa ty hoe:" Ingo, le fa nomeako teo antagnanao Jeriko, ty mpanjakanay, naho reo miaramila nomanene. ³ Ao riha hanao liabey magnodidy ty tana, ty lahilahy mpialy ro mindeha magnodidy ty tana indraike avao. Ao hanao zay zisike ty enegn'andro riha. ⁴ Mpisoro fito ro hinday trompetra fito vita amity trifan'ose eo agnoloa ty tomabile. Amity andro fahafito le maintsy manao liabey magnodidy ty tana impito nareo, naho tsy mitioke mafe ty trompetra reo mpisoro. ⁵ Bakeo le tsy mainsty mampagneno trompetra lavarene amity trifan'ose iereo, ka laha fa maharey ty feon-trompetra riha le tsy maintsy mikorake amity korake mafe ty vahoake iaby, naho hirotsake ty manda ty tana. Tsy maintsy hanafike reo miaramila, naho hindeha amity hitine iaby ty kirai-kiraike." ⁶ Naho nikaike reo mpisoro ty Josoa anagn'i Nona ka nanao tamiereo ty hoe:" Ento ty tomabile ty fifagnenkea, naho ao hisy mpisoro fito hinday trompetra trifan'ose fito ho eo aloha ty tomabile ty fifagnenkea Yaveh." ⁷ Hoe re tamireo vahoake ty hoe:" Mindehana naho manaova liabey magnodidy ty tana, naho hindeha eo aloha ty tomabile Yaveh reo lahilahy mitam-pialia." ⁸ Arake ze nirehafe Josoa tamity vahoake, le ninday trompetra trifan'ose fito teo agnoloa Yaveh reo mpisoro fito. Laha nagnato igne iereo, le nitioke ty trompetra. Nagnorike iereo bakao afara ty tomabile ty fifagnenkea Yaveh. ⁹ Nisy lahilahy mitam-pialia nindeha teo agnoloa reo mpisoro, naho nitioke ty trompetrane iereo, fa nindeha niakatre bakao afra iereo kea reo mpiambe ty lala, naho nitioke ty trompetrane iereo zisikegne reo mpisoro. ¹⁰ Fa Josoa nandily reo vahoake, nanao ty hoe:" Ko mikorake. Ao tsy hisy feo hiakatre amity vavanareo zisike ty hiavia ty andro irehafako aminareo mba hikorake. Amizay avao nareo vaho hikorake." ¹¹ Ka nataone nindeha nagnodidy ty tana indraike avao ty tomabile Yaveh tamio andro o. Naho le nilitse ty tobe iereo, le nitoboke tao antobe zisike ty hale. ¹² Le nifoha maraim-bey ty Josoa, nalae reo mpisoro ty tomabile Yaveh. ¹³ Nindeha mafe naho nitioke ty trompetra reo mpisoro fito, ty ninday reo trompetra fito trifan'ose teo aloha ty tomabile Yaveh. Nisy miaramila mitam-pialia nindeha teo aloha iereo. Fa laha fa nindeha bakao afara ty tomabile Yaveh reo mpiambe lala, le nagnakatre feo tsy mijano reo trompetra. ¹⁴ Nanao liabey nagnodidy ty tana indraike avao ierero tamity andro faharoe naho nihere tagne antobe. Nanao zay zisike ty enegn'andro iereo. ¹⁵ Tamity andro fahafito ro nindehana iereo maraim-bey, naho nanao liabey nagnodidy ty tana arake ty fomba iereo avao iereo, fa impito tamity indraike toy. Tamio andro o ro nanaova iereo liabey impito nagnodidy ty tana. ¹⁶ Tamity andro fahafito, tamireo mpisoro nitioke reo trompetra trifan'ose, ro nandilia Josoa reo vahoake ty hoe:" Mikoraha! Fa le fa nomea Yaveh anareo ty tana. ¹⁷ Natoka ho ahy Yaveh ho fandrava ty tana vaho iaby ze amine ao. Rahaba mpivaro-bata arere avao ro ho velo__re vaho iaby miarake amine ao antragnone__satria nagnaja reo lahilahy nirahentika re. ¹⁸ Ty aminao kea, miambena amity fangala reo zaka voatoka ho ahy ty fandrava, mba tsy hangalake na ino ino amizay riha, laha fa bake nasianao famantara ho ravae zay. Laha manao zay riha, le hahavy ty tobe Israely ho zaka tsy maintsy ho ravae ka hinday koronta amizay. ¹⁹ Reo volafoty, volamena, naho reo zaka iaby vita amity varahy vaho vy le voatoka ho ahy Yaveh. Tsy maintsy halefa ao amity fitoeran-draketre Yaveh reo." ²⁰ Laha fa nitioke ty trompetra iereo, le nikorake mafe ty vahoake naho nirotsake ty manda, kay ka nihity nilitse ty ndaty iaby naho nambabo ty tana. ²¹ Rinava iereo tamity lela meso iaby ze tao amity tana__ty lahilahy vaho ampela, ty kele vaho ty antetre, ty agnombe, ty agnondry naho reo borike. ²² Bakeo le hoe ty Josoa tamireo lahilahy reo nijilo tao amity tane hoe:" Mindehana agne antragno ty mpivaro-bata. Ento miakatre i ampelay vaho reo iaby ze miarake amine, arake ty nifantanareo tamine." ²³ Ka le nilitre naho ninday i Rahaba niakatre reo ajalahy roe mpijilo. Niente iereo niakatre ty raene, ty renene, reo anadahine, naho reo longone ze niarake tamine. Niente iereo tagne amity toera raike ambaly ty tobe Israely iereo. ²⁴ Noroa iereo ty tana vaho ze tamine eo iaby. Ty volafoty, volamena, naho reo zaka vita amity varahy vaho vy avao ro natao tao agnate ty fitoeran-draketre ty tragno Yaveh. ²⁵ Fa nenga Josoa ho velo ty Rahaba mpivaro-bata, ty longon-draene, naho reo iaby niarake tamine. Mitoboke agne Israely zisike zao re satria nagnaja reo lahilahy ze nirahe Josoa hijilo tao Jeriko. ²⁶ Naho tamize andro zay le nandily iereo tamity fifanta ty Josoa, naho nanao ty hoe:" Voaozo eo amaso Yaveh anie ze ndaty magnere magnore ty tana toy, le i Jeriko. Amity arofo ty anane lahy voalohane ro hanaovane fotora, naho amity arofo ty anane faralahy ro hananganane ty vavahadine." ²⁷ Ka le niaro Josoa ty Yaveh, naho niele nagnera ty tane ty lazane.