¹ Vatane vaho rey reo mpanjaka Amorita iaby tagne amity llane antignana Jordana, vaho reo mpanjaka Kananita iaby, ze tamoro ty sisy ty riake bey, fa Yaveh le fa nandany ty rano Jordana zisike hitsaha ty vahoake Israely, le naleme ty arofo iereo, naho tsy nisy fagnahy sase tao amiereo noho reo vahoake Israely. ² Tamize andro zay le hoe ty Yaveh tamy Josoa ty hoe:" Magnamboara meso afovato naho tampaho ndraike reo lahy Israely iaby." ³ Naho Josoa nagnamboatre meso afovato ka nanampake reo lahy Israely iaby tao Gibeata Haralota. ⁴ Zao ty anto nanampaha Josoa iereo: ty lahy iaby ze niakatre agne Egypta, agnisa zay reo lahilahy mpialy iaby, le mate andala tagne agnefetre, tafara ty niakara iereo bakagne Egypta. ⁵ Na le fa tampake iaby aza ty lahy iaby ze niakatre agne Egypta, le mboe tsy nisy tamireo ajalahy terake andala tagne agnefetre niakatre agne Egypta ro vita savatse. ⁶ Fa reo vahoake Israely le nindeha efapolo tao tagne egnefetre mandra-pahafate reo vahoake iaby, zane hoe, ty lahilahy mpialy iaby ze niakatre agne Egypta, le mate, satria tsy nanenke ty feo Yaveh iereo. Nifanta tamiereo Yaveh fa tsy hagnenga iereo hahisake ty tane zay nifantane tamity razambeiereo fa homeane iereo, le tane feno ronono vaho tantele. ⁷ Ty anaiereo ro natsanga Yaveh teo amity toera iereo ze nanavara Josoa, satria tsy voasavatre tegne andala iereo. ⁸ Laha fa voasavatre iaby iereo iaby, le nijano tao amize nitobea iereo mandram-pisitragna iereo. ⁹ Naho hoe ty Yaveh tamy Josoa ty hoe:" Androany le fa nagnafake taminareo ty fahafaham-baraka i Egypta Raho." Ka ty agnara zay toera zay le natao ty hoe Gilgala zisikezao. ¹⁰ Nitobe tao Gilgala ty vahoake Israely. Nitana iereo ho ahy ty hariva ty fahefatre ambifolo ty andro ty vola ty Pasake, teo amity lemake Jeriko. ¹¹ Nihina ty ilane tamity voka ty tane iereo tafara ty Pasake: mofo tsy misy masirasira, naho vare voaende. ¹² Nijano tamity andro tafara ty nihinana iereo ty voka ty tane ty mana. Tsy nisy mana ho ahy ty vahoake Israely sase, fa nihina ty voka ty tane Kanana iereo tamize andro zay. ¹³ Laha fa teo agnila Jeriko Josoa, le nagnakatre ty masone naho nanente, naho ingo, nisy lahilahy raike nitsanga teo agnoloane; nafahane ty mesone naho tegne antagnane zay. Nimbaeo amy Josoa naho nanao ty hoe:" Aminay riha sa amireo fahavalonay?" ¹⁴ Hoe re:" Aha. Satria mpibaiko ty tafike Yaveh raho. Avy raho amizao." Naho Josoa nihohoke tamity tane mba hanompo naho nanao tamine ty hoe:" Ino ro rehafe ty tompoko amity mpanompone?" ¹⁵ Ty mpibaiko ty tafike Yaveh nirehake tamy Josoa ty hoe:" Afaho amity tombonao ty Kapanao, satria ty toera ze itsangananao le masy." Le zay ro natao i Josoa.