¹ Laha fa tafitsake agne Jordana ty ndaty iaby, le nirehake tamy Josoa Yaveh ty hoe: ² "Mifilia riha lahilahy roa ambifolo amity vahoake, lahilahy raike aby isake ty foko. ³ Ameo iereo ty lily toy:' Mangala vato roa ambifolo bakao agnivo i Jordana zay itsangana reo mpisoro eo amity tane maike, naho ento magnorike anareo zay naho atoboho eo amity toera ze hiroroa nareo androany hale."' ⁴ Naho kinay Josoa reo lahilahy roa ambifolo ze le fa nifiliene teo amireo foko Israely, raike isake ty foko. ⁵ Hoe ty Josoa tamiereo ty hoe:" Mindehana aloha ty tomabile Yaveh Zagnaharenareo ao agnivo Jordana. Hinday vato egne amity sorone iaby nareo kirai-kiraike, arake ty isagnireo foko ty vahoake Israely ⁶ Zay le ho famantara eo aminareo laha fa hagnotane anareo ty anagnareo amireo andro hoavy ty hoe:' Ino ro dika reo vato reo aminareo?' ⁷ Naho hoe nareo amiereo ty hoe:' Nivakie teo agnoloa ty tomabile ty fifagnenkea Yaveh ty rano Jordana. Laha fa nandrio teo amy Jordana zay, le vaky ty rano Jordana. ka ho fahatiarova zisikezay ho ahy ty vahoake Israely reo vato reo."' ⁸ Ty vahoake Israely le nanao arake zay nandilia Josoa aze, ka nangalake vato roa ambinifolo teo agnivo Jordana iereo, arake ty nirehafe Yaveh i Josoa. Nampiakare iereo arake ty isa reo foko Israely ty isa reo vato. Niente iereo niarake tamiereo ty vato, nimbaeo amity toera ze nitobea iereo naho natobone teo ambane teo. ⁹ Bakeo Josoa nametrake vato roa ambinifolo teo agnivo ty renerano Jordana, teo amity toera ze nitsangana ty tombo reo mpisoro zay ninday ty tomabile ty fifagnenkea. Agne zay fahatiarova zay zisikezao. ¹⁰ Reo mpisoro ze ninday ty tomabile le nitsanga teo agnivo Jordana zisike ty hahalefe ty zaka iaby nandilia Yaveh ho rehafe Josoa tamireo vahoake, arake ze iaby le fa nandilia Mosesy i Josoa. Nitsake malaky reo vahoake. ¹¹ Laha fa tampetre iaby ty ndaty, le nitsake teo agnoloa ty vahoake ty tomabile Yaveh vaho reo mpisoro. ¹² Ty foko Robena, ty foko Gada, naho ty antsasa ty foko Manase le nandrio taloha ty nilahara reo vahoake Israely manahake ty miaramila, arake ty nirehafe Mosesy tamiereo. ¹³ Lahilahy voaoma hialy tokone ho efatre arivo ro nandrio teo agnoloa Yaveh, mba hialy egne amity tane lemake Jeriko. ¹⁴ Tamio andro o le nataon'Agnahare bey teo amaso ty vahoake Israely iaby ty Josoa. Nagnomea hasy aze iereo__manahake ty nagnomea iereo hasy i Mosesy__zisike ty androm-piaignane. ¹⁵ Naho nirehake tamy Josoa ty Yaveh ty hoe: ¹⁶ "Ameo baiko reo mpisoro ze ninday ty tomabile ty vavolombelo mba hiala bakao Jordana." ¹⁷ Ka le nagnomea baiko reo mpisoro ty Josoa hoe:" Miakara ao Jordana." ¹⁸ Laha fa niakatre bakao agnivo Jordana reo mpisoro ninday ty tomabile Yaveh, naho niakatre tegne amity tane maike ty tombogniereo, le nihere tamity toerane naho nilako ty morone ty rano Jordana, manahake ty tamity efatre andro aloha. ¹⁹ Niakatre bakao Jordana reo vahoake tamity andro fahafolo ty vola voalohane. Nijano tao Gilgala iereo, antignana Jeriko. ²⁰ Reo vato roa ambifolo ze nalae iereo bakao Jordana, le natobo Josoa tao Gilgala. ²¹ Hoe re tamireo vahoake Israely ty hoe:" Laha fa magnontane reo raene ty fokonareo amity andro hoavy ty hoe:" Ino reo vato reo?' ²² Rehafo ty ananareo ty hoe:' Teo ro nitsaha Israely agne Jordana tamity tane maike.' ²³ Nimaihe Yaveh Zagnaharenareo ho anareo ty renerano Jordana, zisike ty hitsahanareo, manahake ty natao Yaveh Zagnaharenareo tamity riake mena, ze nimaihene ho antika zisike ty hitsahantika, ²⁴ mba hahaia ty ndaty iaby eto antane fa mahere ty tagna Yaveh, naho mba hagnomea nareo hasy Yaveh Zagnaharenareo zisikezay."