¹ Nifofa marandray ty Josoa, naho le niala tao Sitima iereo. Nimbaeo Jordana iereo, re vaho reo vahoake Israely iaby, naho nitobe teo aloha ty nitsahane. ² Afake telo andro, reo manam-pahefa le nindeha teo agnivo ty tobe; ³ nadily ty ndaty iereo ty hoe:" Laha fa mahisake ty tomabile fifagnenkea Yaveh Zagnaharenareo nareo, vaho reo mpisoro bakamireo Levita milanja zay, le ao hiala ty toera toy nareo ka hagnorike zay. ⁴ Ao hisy malalake roa arivo metatre eo aminareo vaho zay. Ko miharine zay, mba hahafahanareo mahisake ty lala homba, satria mboe tsy nindeha tamio lala ao nareo taloha." ⁵ Hoe ty Josoa tamity vahoake ty hoe:" Hamasigno ty vatanareo, fa hanao fahagaga eo aminareo Yaveh." ⁶ Naho hoe ty Josoa tamireo mpisoro hoe:" Ento ty tomabile fifagnenkea, naho mindehana eo agnoloa ty ndaty." Ka le nadrambe ty tomabile fifagnenkea iereo naho nindeha teo agnoloa ty ndaty. ⁷ Hoe ty Yaveh tamy Josoa ty hoe:" Zao henanezao le hataoko lahilahy mahere eo amaso Israely iaby riha. ⁸ Hahay iereo fa manahake ty nataoko i Mosesy, ro hataoko anao. Riha le handily reo mpisoro ze minday ty tomabile ty fifagnenkea ty hoe:' Laha fa avy egne amoro ty rano Jordana nareo, le ao ho toly eo amity renerano i Jordana."' ⁹ Le hoe Josoa tamity ndaty Israely hoe:" Mindehana atoy, naho dranjigno zao safa Yaveh Zagnaharenareo zao. ¹⁰ Amity alala toy ro hahaianareo fa ty Zagnahare velo le eo aminareo naho handroake reo Kananita, reo Hetita, reo Hivita, reo Perizita, reo Girgasit, reo Amorita naho reo Jebosita tsy ho eo agnoloa nareo. ¹¹ Ingo! ty tomabile ty fifagnenkea ty tompo ty tane iaby mitsake eo alohanareo ho ao Jordana. ¹² Henanezao mifilia ndaty roa ambinifolo bakamity foko Israely, lahilahy raike bakamity kirai-kiraike. ¹³ Laha fa mikasike ty rano Jordana ty tombognireo mpisoro ze minday ty tomabile Yaveh, Tompo ty tane iaby, le ho tampake ty rano i Jordana, naho na ty rano ze mirarake bakagne ambone aza le hijano hivory raike." ¹⁴ ka laha fa niala mba hitsake i Jordana reo ndaty, le nindeha teo aloha reo ndaty reo mpisoro ze ninday ty tomabile ty fifagnenkea. ¹⁵ Laha vaho avy teo Jordana reo ze ninday ty tomabile, naho niroboke teo amoro ty rano ty tombo iereo(naho ty rano Jordana le nibey zisikegne amity sisine iaby zisike ty andro fihaza), ¹⁶ ty rano ze nikororoke nily bakagne ambone le nijano ka nivory raike. Nijano bakegne lavitse le lavitse ty fily ty rano. Nijano nikororoke bakagne Adama, ty tana agnila i Zaretana, zisikagne amity riake Negeva, ty Riake sira, ty rano. Nitsake niharine Jeriko ty vahoake. ¹⁷ Reo mpisoro ze ninday ty tomabile ty fifagnenkea Yaveh le nijano teo amity tane maike teo agnivo Jordana zisike nitsaha ty ndaty Israely iaby teo amity tane maike.