¹ Fa ty vahoke Israely tsy natoky nagnoloa reo zaka natoka ho amity fandrava. Hakana anadahign'i Karmy vaho zafe i Zabdia naho zafeafei Zera, bakamity foko i Joda le nangalake zaka tao amize natoka ho amity fandrava, ka nirehetre tamity vahoake Israely ty helon'Agnahare. ² Josoa le nandefa lahilahy bakao Jeriko nimbaeo Ay, ty agnila i Bety Avena, antignana i Betela. Hoe re tamiereo hoe:" Miakara ka jilovo ty tana." Ka niakatre reo lahilahy naho nijilo tao Ay. ³ Laha fa nihere teo amy Josoa iereo, le hoe iereo tamine ty hoe:" Ko alefa miakatre agne Ay ty vahoake iaby. Lahilahy roa arivo na telo arivo avao halefa hanafike agne Ay. Ko mandrerake ty vahoake iaby agne amity aly, satria tsiampe isake iereo." ⁴ Ka teo amity lahilahy telo arivo ro niakatre bakamireo tafike, fa nilay ty lahilahy Ay iereo. ⁵ Reo lahilahy Ay le nahafate teo amity ene amby telopolo lahy teo laha fa nagnia iereo zisikeo amity vavahady ty tana zisikegne amity toera famoteham-bato, naho nivonoe iereo tegne ampizotsoa ty tazoa iereo. Natahotre ty arofognireo vahoake ka niala tamiereo ty herem-pone. ⁶ Bakeo le niriate Josoa ty akanjone. Re vaho reo olobey Israely le nagnisy deboke ty lohagniereo naho nagnohoke ty vatagniereo teo amity tane teo agnoloa ty tomabile Yaveh, nijano teo zisike hariva. ⁷ Le nirehake ty Josoa hoe:" Oh, ry Yaveh Tompo, nagnino ro nientenao nitsake agne Jordana reo vahoake reo? Mba hanolotre anay eo antagna reo Amorita mba haharava anay vao? Laha mba nana fanapahan-kevetse sambehafa kea zahay le nijano tegne andafe i Jordana! ⁸ Tompo oh, ino ro azoko rehafe, fa le fa nignamboho teo agnoloa ty fahavalo iereo ty Israely? ⁹ Satria reo Kananita vaho reo vahoake ty tane iaby le naharey ty momba zay. Hagnodidy anay iereo naho hampagnaligno ty agnaranay amity ndaty ty tane. Ka ino ro hataonao ho ahy ty agnaranao bey?" ¹⁰ Hoe ty Yaveh tamy Josoa hoe:" Mitsangana! Nagnino riha ro magnohoke ty vatanao eo? ¹¹ Nidiso ty Israely. Nandika ty fagnenkeako ze nandiliako aze iereo. Le fa nangalatre ty ilane tamireo zaka ze voatoka iereo. Le fa nangalatre iereo naho bakeo kea le nagnaja ty hadisoane tamity fanaova reo ze le fa nalae iereo ho nama ty fanagnane arere. ¹² Voka zay, tsy afake nitsanga teo agnoloa reo fahavalogniereo ty vahoake Israely. Nagnamboho ty fahavalone iereo satria le fa natoka ho amity fipoteha ty vatagniereo. Tsy hiarake aminareo sase Raho laha tsy mamoteke ty zaka ze tokone potehe nareo, kanefa mboe aminareo eo. ¹³ Mitsangana! Hamasino amiko ty ndaty naho ambarao iereo ty hoe:' Hamasino ho ahy ty hamaray ty vatanareo. Satria Yaveh, ty Zagnahare Israely nanao ty hoe:" Misy reo zaka ze natoka ho potehe mboe aminareo eo, ry Israely. Tsy afake mitsanga handietse reo fahavalonareo nareo laha tsy magnafake aminareo eo reo zaka iaby ze natoka ho potehe." ¹⁴ Amity maray, le tsy maintsy manolotre ty vatanareo amity fokonareo nareo. Ty foko ze nifilie Yaveh le hiharine ty longo maro iereo. Ty longo maro ze nifilie Yaveh le tsy maintsy miharine ty isan-tragno. Ty tokatragno ze finily Yaveh le tsy maintsy mifankarine kirai-kiraike. ¹⁵ Naho ty raike ze finily vaho mana reo zaka ze natoka ho amity fahapoteha, le ho oroa, re vaho ze fanagnane iaby, satria nandika ty fagnenkea Yaveh re naho satria nanao zaka magnafabaraka tao Israely."' ¹⁶ Laha zao, nifoha maray Josoa naho ninday Israely niharine, isam-poko, naho voafily ty foko i Joda. ¹⁷ Niente Josoa niharine reo foko i Joda, naho voafily ty foko i Zeraita. Nientene niharine isagn'ondaty ty foko i Zeraita, naho voafily ty Zabdia. ¹⁸ Nientene niharine ty foko i Zabdia, nindeha kirai-kiraike isagn'ondaty, naho Akana anadahign'i Karmy, zafe i Zabdia, zafekele Zera, bakamity foko Joda, ro voafily. ¹⁹ Naho hoe Josoa tamy Akana hoe:" Ry zanako lahy, ambarao eo agnoloa Yaveh, ty Zagnahare Israely ty mare, naho ameo aze ty fiain-kelonao. Mba ambarao ahy re ze nataonao. Ko ahaja amiko zay." ²⁰ Namale Josoa i Akana hoe:" Mare vatane, fa nidiso tamy Yaveh, ty Zagnahare Israely raho. Ezao ro nataoko: ²¹ Laha fa nahisake akanjo lava soa teo amireo zaka babo bakao Babylona, vaho volafoty roanjato sekele, naho anjam-bolamena milanja dimampolo sekele raho, le nagniry reo ka nangalake reo. Ao agnivo ty tragnoko ao agnate tane reo ro nahaja, naho ao ambane zay ty volafoty." ²² Nandefa irake ty Josoa, zay nilay nimbaeo amity tragno naho tao reo zaka reo. Laha fa nanente iereo, le nahisake zay nahaja tao amity tragnone arere, naho ty volafoty teo ambane zay. ²³ Nalae iereo teo agnivo ty tragno reo zaka reo naho niente iereo tagne amy Josoa vaho reo vahoake Israely iaby. Naily iereo teo agnoloa Yaveh zay. ²⁴ Bakeo Josoa, vaho ty Israely iaby niarake tamine, nangalake i Akana anadahign'i Zera, vaho ty volafoty, ty akanjo lava, ty anjam-bolamena, reo anadahine vaho anak'ampelane, reo agnombene, ty tragnone, naho iaby ze anagnane, ka nientene niakatre tagne amity tazoa i Akora iereo. ²⁵ Le hoe Josoa ty hoe:" Nagnino ro nampidi-doza anay riha? Hampidi-doza anao Yaveh amizao." Nitora-batovato aze ty Israely iaby. Naho tinora iereo vato ty sisa naho nagnoro iereo tamity afo. ²⁶ Nananga antontam-bato bey teo ambonene iereo ze mboe eo zisikezao. Nijano tamity helone mirehetre ty Yaveh. Laha zao ro nikaiha ty agnara io toera ao ty hoe Tazoa i Akora zisikezao.