¹ Laha fa afake andro maro, laha fa nagnomea fitofa ho ahy ty Israely bakao amireo fahavalone iaby ze nagnodidy iereo Yaveh, naho antetre vaho nihabey ty Josoa. ² Le nampikaike ty Israely iaby Josoa__reo olobeine, reo mpitarine, reo mpitsarane, naho reo manan-kasine__ka nanao tamiereo hoe:" Tena bey vatane raho. ³ Le fa hisanareo ty zaka iaby ze natao Yaveh Zagnaharenareo tamireo firene iaby noho nareo, fa Yaveh Zagnaharenareo ro nialy ho anareo. ⁴ Ingo! Le fa tinendreko ho anareo reo firene ze mboe ho rese ho lova reo fokonareo, miarake amireo firene iaby le fa rinavako, nanomboke tao Jordana ka zisikagne amity riake bey agne ahandrefa. ⁵ Handroake iereo Yaveh Zagnaharenareo. Hanoseke iereo hiala aminareo re. Halaene ty tane iereo, naho hangalake ty tane iereo ho fanagnanareo nareo, arake ze nampagnantegnae Yaveh Zagnaharenareo anareo. ⁶ Ka mimafea, mba ambenonareo vaho hanaovanareo ty iaby ze voasoratre ao amity boke ty lily Mosesy, tsy hiala amizay vatane na miankavana na miankavia, ⁷ mba tsy hiharoanareo amireo firene ze mijano ho amireo na hanogno reo agnara ty zagnahare iereo, mifanta amiereo, nanompo iereo, na mihohoke amiereo. ⁸ Fa kea, mitana amy Yaveh Zagnaharenareo nareo manahake ze le fa nataonareo zisike zao. ⁹ Fa Yaveh nandroake teo agnoloanareo reo firene bey, mafe. Fa ho anareo, tsy misy afake mitsanga eo agnoloa nareo zisikandroany. ¹⁰ Ty lahy toka amity isanareo le hahavy ty arivo hilay, satria Yaveh Zagnaharenareo, ro Ty mialy ho anareo, manahake ty nampagnantegnaene anareo. ¹¹ Miambena soa, mba hiteavanareo Yaveh Zagnaharenareo. ¹² Nefa laha mihere vaho miarake amireo ze sisa velo reo firene ze mijano eo aminareo nareo, na laha mifanambaly amiereo, na laha miarake amiereo nareo naho iereo miarake aminareo, ¹³ le haio vatane fa Yaveh Zagnaharenareo tsy handroake reo firene reo hiala aminareo sase. Fa kea, ho lasa fandrike vaho tonta ho anareo iereo, karavasy ao andambosinareo naho fatike eo amity masonareo, mandram-pimatezanareo eto amity tane soa ze namea Yaveh Zagnaharenareo anareo toy. ¹⁴ Amizao le hindeha amity lala ty tane iaby raho, naho hainareo amity arofonareo vaho ty fagnahinareo iaby fa tsy misy rehake raike tsy ho lefe tamireo zaka soa iaby ze nampagnantegnae Yaveh Zagnaharenareo anareo. Reo zaka iaby reo le fa hoavy ho anareo. Tsy misy raike amiereo ho latsake. ¹⁵ Fa manahake ty rehake iaby nampagnantegnae Yaveh Zagnaharenareo anareo ka lefe, le hinday aminareo reo zaka raty iaby Yaveh mandram-pandravane anareo tsy ho eo amity tane soa ze namea Yaveh Zagnaharenareo anareo toy. ¹⁶ Hataone zay laha mandika ty fagnenkea Yaveh Zagnaharenareo, ze nandiliane anareo mba hambena nareo. Laha mindeha vaho manompo reo zagnaharen-kafa naho mihohoke amizay nareo, le hirehetre aminareo ty helo Yaveh, naho ho mate tsiela tsy ho eo amity tane soa ze nameane anareo nareo."