¹ Tamize andro zay Josoa le nikaike reo Robenita, Gadit, naho ty antsasam-poko Manase. ² Hoe re tamiereo hoe:" Le fa vitanareo iaby ze nandilia Yaveh Mosesy mpanompo Yaveh anareo. Nanenke ty feoko nareo tamize iaby nandiliako anareo. ³ Tsy niala ty rahalahinareo nareo zisike ze andro maro zay, zisikezao, naho vitanareo reo asa ze pinay tamity alala ty lily Yaveh Zagnaharenareo. ⁴ Amizao namea Yaveh Zagnaharenareo fitofa reo rahalahinao, arake ze nampagnantegnane iereo. Laha zao miheregna naho mindehana agne amity tragnonareo agne amity tane anagnanareo, ze namea Mosesy ty mpanompo Yaveh anareo agne andafe Jordana. ⁵ Fa ambeno soa mba ho voafiambe reo lily vaho lalana ze nandilia Mosesy mpanompo Yaveh anareo, le ty hiteava Yaveh Zagnaharenareo, ty hindena amity lalane iaby, ty hiambena ty lily, naho ty hipiteha amine vaho ty hanompoa aze amity arofonareo iaby vaho ty fagnahinareo iaby." ⁶ Le nitso-drano vaho nampoly iereo ty Josoa, naho nihere tagne amity tragno iereo. ⁷ Naho ty antsasa-poko Manase le fa namea Mosesy lova tagne Basana, fa ty antsasa ty hafa kea namea Josoa leva tagne agnila reo rahalahine tagne amity tane ahandrefa Jordana. Josoa nampoly iereo tagne amity tragnone; nitso-drano iereo re ⁸ naho nirehake tamiereo hoe:" Miheregna agne amity tragnonareo miarake amity vola bey, vaho biby hare maro vatane, vaho volafoty vaho volamena, vaho varahy vaho vy, naho siky maro vatane. Zarao amireo rahalahinareo ty azo tamireo fahavalonareo." ⁹ Naho ty foko Robena, ty foko Gada, naho ty antsasa-poko Manase nihere noly, niala ty vahoake tao Silo, ze tane amity Kanana. Nindeha ho agne amity faritane Gileada, agne amity tane iereo, ze fanagnane, tamity fagnenkea ty lily Yaveh, tamity lala ty tagna Mosesy iereo. ¹⁰ Laha vay tao Jordana ze tao amity tane Kanana iereo, ty Robenita vaho ty Gadita naho ty antsasam-poko Manase le nagnore altara niharine i Jordana, alitara tena bay vaho nalaza. ¹¹ Ty vahoake Israely naharey zay ka nanao ty hoe:" Ingo! ty vahoake Robena, Gada, naho ty antsasam-poko Manase nagnore alitara teo agnoloa ty tane Kanana, agne Gelilota, agne amity faritre agnila i Jordana, amity ilane ze ahy ty vahoake Israely." ¹² Laha naharey zay ty vahoake Irsaely, le niarake-nivory tao Silo ty fiangona ty vahoake Israely iaby mba hiakatre hamoro aly handiera iereo. ¹³ Naho ty vahoake Israely nandefa mpinday talily ho agne amity Robenita, ty Gadita, naho ty antsasam-poko Manase, agne amity tane Gileada. Nandefa i Fineasy anadahy Eleazara avao kea iereo, ty mpisoro, ¹⁴ naho mpitarike folo niarake tamine, raike isake ty razambeim-poko Israely, iereo reo kirai-kiraike iaby le fa loha ty foko tao amity vahoake Israely. ¹⁵ Niavy tagne amity vahoake Robena, Gada, naho ty antsasam-poko Manase, tagne amity tane Gileada iereo, naho hoe iereo tamine: ¹⁶ "Zao ro safa ty fiangona Yaveh iaby:' Ino zao fivaliham-pitokia nataonareo tamity Zagnahare Israely zao, niala tamity fagnoriha Yaveh nareo amizao amity alala ty fagnoregnanareo alitara tamim-pavandeza tamy Yaveh tamity andro toy? ¹⁷ Tsy ampe antika vao ty hadisoantika tao Peora? Zay mboe tsy nahaliovantika ty vatantika tamizay kea. Naho ze hadisoa zay ro nampisy aretem-pandania tao amity fiangona Yaveh. ¹⁸ Tsy maintsy hiala amity fagnoriha Yaveh avao kea vao nareo amity andro androany toy? Laha miharo amy Yaveh avao kea nareo androany, le ho meloke amity fiangona Israely iaby Re hamaray. ¹⁹ Laha voaloto ty tane ze anagnanareo, le tokone hitsake amity tane ze misy ty tabernakele Yaveh nareo naho mangalake fanagna ho anareo ao aminay. Ko mavande amy Yaveh avao, na mavande aminay amity fagnoregna alitara hafa ho anareo hafa tsy ty alitara Yaveh Zagnaharentika. ²⁰ Feie vao Akana anadahy Zera tsy le fa nandrava finoa tamin-jaka ze le fa voatoka ho an'Agnahare? Feie vao tsy nily tamity vahoake Israely iaby ty heloke? Naho tsy o lahilahy io arere ro mate noho ty helone."' ²¹ Naho ty foko Robena, Gada, naho reo antsasam-poko Manase namale reo beim-poko Israely hoe: ²² "Ty Tsitoha, Zagnahare, Yaveh! Ty Tsitoha, Zagnahare, Yaveh!__Re mahay, naho ty Israely ao hahay! Laha tamim-bande na tamity fivaliham-patokia na tamy Yaveh zay, le ko andefera zahay amity andro toy ²³ ty amity nagnoregnanay alitara mba hialanay amity fagnoriha Yaveh. Laha nagnore ty alitara mba hahafaha manolotre fagnatetre oroa, fagnatetre hohane, na fagnatem-pilongoa zahay, le ao Yaveh hampandoa anay ty amizay. ²⁴ Aha! Tahotre ro nagnanovanay zao satria zisikezay le mete hagnotane ty ananay ty ananareo hoe:" Feie nifagnino amy Yaveh nareo, ty Zagnahare Israely? ²⁵ Fa Yaveh le fa nanao i Jordana ho faritre magnoloa antika vaho riha. Nareo ry vahoake i Robena vaho vahoake Gada, tsy hanao na ino ino amy Yaveh nareo.' Laha zao ty ananareo le mete hampinjano ty ananay amity fanompoa Yaveh. ²⁶ Ka hoe zahay hoe:' Mamotora anay hananga alitara amizao, tsy ho ahy ty fagnatetre oroa na soro, ²⁷ fa mba ho vavolombelo eo aminay vaho nareo, naho reo eo amity foko afarantika, fa handefe ty fanompoa Yaveh alohane tika, amity alala ty fagnatetre oroa, vaho soro naho fagnatem-pilongoa ataontika, ka mba tsy hirehafa ty ananareo amity ananay zisikezay hoe:" Tsy mana anjara ao amy Yaveh nareo."' ²⁸ Naho hoe zahay hoe:' Laha tahiene ka rehafe aminay na amireo fokonay zisikezay zay, le hataonay hoe:" Ingo! Toy ro dika mitovy amity alitara Yaveh, ze namboare ty razambeinay, tsy ho ahy ty fagnatetre oroa, na soro, fa ho vavolombelo teo aminay vaho nareo." ²⁹ Sagnatriavenay anie ty havande amy Yaveh, vaho hiala amity fagnoriha Aze androany amity alala ty fagnoregna alitara ho ahy ty fagnatetre oroa, ty fagnatetre hohane, na soro, hafa ty alitara Yaveh Zagnaharentika ze eo agnoloa ty tabernakelene."' ³⁰ Laha fa rey Finehasa ty mpisoro vaho reo mpitarike ty vahoake, zay, loham-poko Israely niarake tamine, le naharey reo rehake nirehafe ty vahoake ty Robena, Gada, naho Manase, le soa tamiereo zay. ³¹ Le hoe Fineasy anadahy Eleazara ty mpisoro tamity vahoake ty Robena, Gada, naho Manase hoe:" Hainay amizao fa eto amintika Yaveh, satria riha tsy nanao zay fivaliham-pagnenkea zay tamine. Amizao riha nagnavotre ty vahoake Israely tamity tagna Yaveh riha." ³² Naho Fineasa ana i Eleazara mpisoro, vaho reo mpitarike nihere bakagne amireo Robenita vaho reo Gadita, tao amity tane i Gileada ho agne amity tane Kanana, ho agne amity vahoake Israely, naho ninday valen-drehake tamiereo. ³³ Nimete tamity vahoake Israely ty talily iereo. Nisaotre an'Agnahare ty vahoake Israely naho tsy nirehake ty hialy amity Robenita vaho ty Gadita sase, mba hamoteha ty tane ze nitoboha iereo ³⁴ "Vavolombelo" ro natao ty Robenita vaho ty Gadita agnara ty alitara, satria hoe iereo hoe:" Io ro vavolombelo eo aminay fa Yaveh ro Zagnahare."