1 Naho le nampiarahe Josoa tao Sekema reo foko Israely iaby naho nikaike reo olobey tao Israely, reo mpitarike iereo, reo mpitsara, vaho ty manam-pahefa iereo iereo, naho nanoro ty vata iereo teo agnoloan'Agnahare. 2 Hoe Josoa tamity ndaty iaby hoe:" Zao ro safa Yaveh, ty Zagnahare Israely:' Tagne aloha ela bey reo razambeinareo le nitoboke tagne andafe ty rano Eofrata__Tera, ty rae Abrahama vaho ty rae i Nahora__naho nanompo reo zagnaharen-kafa iereo. 3 Fa nalaeko tagne andafe Efraita ty raenareo ka nienteko tagne amity tane Kanana naho nameako foko maro tamity alala Isaka re. Naho nameako i Jakoba vaho Esao ty Isaka. 4 Naho nameako ho fanagna Esao ty tane tazoa i Seira, fa i Jakoba vaho reo anane le nizotro tagne Egypta. 5 Nandefa i Mosesy vaho Arona raho, naho nagnisy reo Egyptiana tamity arete-mandany. Tafara zay, le nienteko niakatre nareo. 6 Nienteko niakatre i Egypta reo razambeinareo, naho niavy tegne andriake nareo. Nagnia anareo tamireo kalese vaho mpitiki-tsoavale zisikagne amity riake mena reo Egyptiana 7 Laha fa nikaike mafe Yaveh reo razambeinareo, le nasiane ieke teo agnoloanareo vaho reo Egyptiana. Nientene teo amiereo ty riake naho nanaro iereo. Nareo nahisake ty nataoko tagne Egypta. Bakeo nareo le nitoboke tagne agnefetre zisike ty andro elabey. 8 Nienteko tagne amity tane i Amorita nareo, ze nitoboke tegne andafe Jordana. Nialy taminareo iereo, naho nanolotre teo antagnanareo. Nalaenareo ho fanagnanareo ty tane iereo, naho pinoteko teo agnoloanareo iereo. 9 Naho nitsanga Balaka ana i Zipora, mpanjaka Moaba, naho nanafike Israely. Nandefa naho nikaike Balama ana i Beora, mba hagnozo anareo. 10 Fa tsy nidranjy i Balama raho. Nitahy anareo vatane re. Ka le namonje anareo tegne antgnane raho. 11 Nitsake Jordana nareo naho le niavy tao Jeriko. Reo mpitarike Jeriko le nialy taminareo, niarake tamity Amorita, reo Kananita, reo Hetita, Girgasita, reo Hevita, naho reo Jebosita. Nameako faharesea nareo naho nanao iereo ambane ty fehenareo raho. 12 Nandefasako fangarake nareo, ty nampilay iereo vaho reo mpanjaka Amorita roe teo agnoloanreo. Zay le tsy niseho tamity alala ty meso na ty folesenareo. 13 Nameako tane ze mboe tsy nasae vaho tana ze mboe tsy nagnoregna nareo, naho amizao nareo le mitoboke egne amireo. Mihina ty voa ty tanem-boaloboke vaho ty baibon'oliva ty tsy nambolenareo nareo.' 14 Amizao matahora Yaveh naho miantsa Aze amim-pahitia; foagno reo zagnahare ze tompoe reo razambeinareo tagne andafe ty Eofrata vaho tao Egypta, naho manompoa Yaveh. 15 Laha hisanao fa raty ty miantsa Yaveh, le filio androany ze hotompoenao, na reo zagnahare ze nitompoe reo razambeinareo tagne andafe Eofrata, na reo zagnahare reo Amorita, ze tompo ty tane hitobohanareo. Fa laha zaho vaho ty fokoko kea, le hanompo Yaveh zahay." 16 Namale reo vahoake naho nanao ty hoe:" Tsy hamoe Yaveh vatane zahay mba hanompo zagnahare hafa, 17 satria Yaveh Zagnaharenay ro ninday anay vaho reo razambeinay hiakatre ty tane Egypta, hiakatre ty tragno fagnandevoza, vaho ze nanao reo famantara bey teo amasonay, naho ze niaro anay tagne amity lala ibay nombanay, naho tamireo firene iaby ze nombanay. 18 Naho Yaveh le ninday reo ndaty niaolo lala anay, ao agnate zay reo Amorita ze nitoboke tao amity tane. Laha zao zahay kea le hanompo Yaveh, satria Re ro Zagnaharenay." 19 Fa hoe Josoa tamireo vahoake hoe:" Tsy mahazo manompo Yaveh nareo, satria Re Zagnahare sarotene; Re le tsy hagnenge reo fandika vaho reo hadisoanareo. 20 Laha mahafoe Yaveh nareo naho manompo reo zagnahare vahiny, le hihere Re naho hampijale anareo. Hamoa anareo Re, laha fa baka nanao soa taminareo." 21 Fa hoe reo ndaty tamy Josoa Hoe:" Aha, hanompo Yaveh zahay." 22 Naho hoe Josoa tamireo vahoake hoe:" Nareo le vavolombelo ty vatanareo fa le nifily Yaveh, mba ho tompoe." Hoe iereo hoe:" Vavolombelo zahay." 23 Amizao le afaho reo zagnahare hafa ze miarake aminareo, naho atoliho amy Yaveh Zagnahare Israely ty arofonareo." 24 Hoe reo vahoake tamy Josoa:" Hanompo Yaveh Zagnaharenay zahay. Hidranjy ty rehane zahay." 25 Nanao fifagnenkea tamity vahoake Josoa tamy andro io. Nametrake lily aman-dala tao Sekema re. 26 Sinora Josoa tao amity boke ty lilin'Agnahare reo rehake reo. Nangalake vato bey re naho natobone teo ambane ty hetae terebinta ze teo agnila ty toera masy Yaveh. 27 Hoe Josoa tamity vahoake iaby hoe:" Ingo, ty vato toy ro vavolombelo mandietse antika. Naharey reo rehake nisafagne Yaveh tamintika re. Ka ho vavolombelo aminareo io, laha ohatre ka milietse ty Zagnaharenareo nareo." 28 Naho le nalefa Josoa kirai-kiraike bakagne amity lovane reo vahoake. 29 Tafara reo zaka reo Josoa ana Nona, mpnompo Yaveh, le mate tamity faha 110 ty taone. 30 Naleve iereo tagne amity faritane ze nilovaene re, tagne Timnata-sera, ze tagne amity tane tazoa Efraima, avara ty vohitse Gasa. 31 Nanompo Yaveh ty Israely zisike ty andro i Josoa, vaho tamity andro reo olobey ze nivelo nihoatre Josoa, reo ze nivelo ty zaka-iaby ze natao Yaveh ho ahy Israely. 32 Niente ty vahoake Israely niakatre i Egypta ty taolam-balo Josefa naho naleve iereo tagne Sekema reo, ao amity ilan-tane ze vinily Jakoba tamireo anadahy Hamora, rae i Sekema. Nivily zay tamity volafoty zato singa re, naho nanjare lova ho ahy reo foko Josefa. 33 Mate avao kea Eleazara anadahy Arona. Naleve iereo tagne Gibeha, tanam-bey Finehasa anadahine, ze le fa namea aze. Zay le rehake amity tane tazoa Efraima.