¹ Ty antsapake faharoe le lasa i Simeona ka tinendre ho ahy ty kirai-kiraike amireo fokone. Ty lova iereo le teo agnivo ty lova ze ahy ty foko Joda. ² Nana i Beri-sheba, Molada, ³ Hazara-soala, Bala, Azema, ⁴ Eltolada, Betola, naho Horme ho lovane iereo. ⁵ Simeona avao kea le nana i Ziklaga, Beti-markabota, Hazara-sosa, ⁶ Beti-lebaota, naho Sarohena. Reo ro tana telo amby folo, miarake amireo ana-bohine. ⁷ Simeona avao kea le nana i Aina, Rimona, Etera, naho Asana. Reo ro tana efatre, miarake amnireo ana-bohine. ⁸ Reo le niarake tamireo ana-bohine magnodidy reo tana reo zisikagne Bale-tabera(mitovy amy Rama tao Negeva). Zay ro lova ty foko i Simeona, nagnomea reo fokone. ⁹ Ty lova ty foko Simeona le nagnomea ty faritre ty foko Joda. Satria tena bey loatre ho ahy iereo ty anjara-tane tinendre ho ahy ty foko Joda, le nandrae ty lova iereo tamity agnivo ty anjara ty foko Simeona. ¹⁰ Ty antsapake fahatelo le azo ty foko i Zebolona, naho namea reo fokone zay. Ty faritre ty lovane le nanomboke tao Sarida. ¹¹ Ty faritanene niakatre nagnandrefa zisikagne Marala naho nahazo iDabesera; le nihabey zisikagne amity baibon-driake ze tandrife Jokneama. ¹² Zisikeo Sarida ty faritane le nihodike mianignana zisikagne antignana ka zisikamity faritane Rislota-tabara. ¹³ Zisikeo le nindeha zisikagne Daberata naho niakatre zisikagne Jafia zay. Zisikeo le nandrio ty antignana zisikagne Gata-hefera zay, naho zisikagne Ita-Kazina; bakeo nahazo zisikagne Rimona naho nihodike nimbaeo Nea. ¹⁴ Ty faritane nihodike magnavaratre zisikagne Hanatona naho nifara teo amity baibo Jifta-ela. ¹⁵ Tafilitse amio faritre eo reo tana i Katata, Nahaloa, Simrona, Idada, naho Betlehema. Le tana reo amby folo, miarake amireo ana-bohine. ¹⁶ Zay ro lova ty foko i Zebolona, ze namea reo fokone__reo tana, miarake amireo ana-bohine. ¹⁷ Ty antsapake fahaefatre le lasa i Isakara, naho namea reo fokone zay. ¹⁸ Ty faritane iereo le ahisaha i Jezirela, Kesolota, Sonema, ¹⁹ Hafraima, Siona, naho Anaharata. ²⁰ Tafilitre amizay kea Rabita, Kisiona, Abeza, ²¹ Rameta, Enganima, Enhada, Beti-pazera. ²² Reo faritanene avao kea le nahazo i Tabara, Sahazoma, vaho Beti-semesy, naho niafara tao Jordana. Le tana ene ambifolo, miarake amireo ana-bohine. ²³ Zay ro lova ty foko Isakara, naho namea reo fokone zay__reo tana, miarake amireo ana-bohine. ²⁴ Ty antsapake fahalime le lasa ty foko i Asera, naho namea reo fokone. ²⁵ Tafilitre amity faritane iereo Helkata, Haly, Batena, Aksafa, ²⁶ Alameleka, Amada, naho Misala. Eo amity sisin-tane ahandrefa naho hihabey zisikagne Karmela vaho Sihora-libnata. ²⁷ Le nihodike mianignana zisikagne Beti-dagona naho nihalavitre zisikagne Zebolona zay, naho le zisikagne amity baibo Jifta-ela, nagnavaratre zisikagne Bet-emeka vaho Neiela. Le nitohy magnavaratre zisikagne Kabola zay. ²⁸ Le nimbaeo zisikagne Ebrona, Rehoba, Hamona, naho Kana, ka zisikagne Sidona bey zay. ²⁹ Ty faritane nitolike zisikagne Rama, naho le zisikagne amity tana manda i Tyra. Naho ty faritane nitolike tagne Hosa naho nifara teo amity riake, tao amity faritane Akziba, ³⁰ Oma, Afeka, naho Rehoba. Roe amby roapolo reo tana reo, miarake amireo ana-bohine. ³¹ Zay ro lova ty foko Asera, naho namea reo fokone zay__reo tana, miarake amireo ana-bohine. ³² Ty antsapake fahaene le lasa ty foko Naftaly, naho nameane reo fokone zay. ³³ Faritane iereo le zisikagne Halefa, zisikagne amity terebinta tao Zananima, zisikagne, zisikagne Adami-hanekeba vaho Jabniela, zisikagne Lakoma; naho nifara tao Jordana zay. ³⁴ Ty faritane niodike nianignana zisikagne Aznota-tabara naho zisikagne Hokoka; nahazo i Zebolona eo antimo zay, nahon nahazo i Asera ty tane ahandrefa vaho Joda ty tane antignana tane amity rano Jordana. ³⁵ Reo tana manda le Zidima, Zera, Hamata, Rakata, Kinereta, ³⁶ Adama, Rama, Hazora, ³⁷ Kadesy, Edrehy, naho En-hazora. ³⁸ Nisy Irona, Migdaela, Horema, Bet-anata, naho Beti-semesy avao kea. reo ro tana sive amby folo, miarake amireo ana-bohine. ³⁹ Zay ro lova ty foko Naftaly, naho namea reo fokone zay__reo tana, miarake amireo ana-bohine. ⁴⁰ Ty loka fahafito le lasa ty foko i Dana, naho namea reo fokone zay. ⁴¹ Tafilitre amity faritane ze lova zay Zora, Estaola, Ira-semesy, ⁴² Salabima, Aijalona, naho Itla. ⁴³ Tafilitre agnate zay kea Elona, Timna, Ekrona, ⁴⁴ Elteke, Gibetona, Baleta, ⁴⁵ Jehoda, Bene-beraka, Gat-rimona, ⁴⁶ Me-jarkona, naho Rakona miarake amity faritane andafe Jopa. ⁴⁷ Laha fa vototre tamiereo ty faritane ty foko Dana, le nanafike i Lesema ty Dana, nialy nandietse aze, naho nahazo aze. Vinonone iereo tamity meso ty ndaty iaby, nangalake zay ho fanagna, naho nitoboke tao. Namea iereo agnara vaovao ty Lesema, ntao ty hoe Dana arake ty razambey iereo. ⁴⁸ Zay ro lova ty foko Dana, naho namea reo fokone zay__reo tana, miarake amireo ana-bohine. ⁴⁹ Laha fa nahavita ty fizara ty tane ho lova iereo, le nagnomea lova teo amiereo ho ahy Josoa anadahy Nona ty vahoake Israely. ⁵⁰ Tamity alala ty lily Yaveh ro nagnomea iereo aze ty tana zeb nangatahene, Timna-sera ao amity tane tazoa Efraima. Naherene namboare ty tana naho nitoboke tao re. ⁵¹ Reo ro lova ze tinendre Eleazara mpisoro, Josoa anadahy Nona, naho reo mpitari-poko reo foko reo razambeine tao amity vahoake Israely, voatendre tamity loka tao Silo, teo agnoloa Yaveh teo amity filira mbaeo amity tragno fivoria. Ka le nahavita nanendre ty tane iereo.