² Mboe nisy fito reo foko teo amity vahoake Israely ze tsy tinendre ty lovane. ³ Le hoe Josoa tamity vahoake Irsaely hoe:" Zisike ombia ro mboe hihemoranao tsy hindeha ao amity tane ze namea Yaveh, Zagnaharenareo razanareo, anareo? ⁴ Maharey telo lahy ho anareo isake ty foko kirai-kiraike, naho zaho kea hagnirake iereo. Le hindeha vaho hitete tane ambone vaho ambane iereo. Le hanoratre ty famarita zay iereo arake ze teane ho lovane, naho hihere amiko atoy iereo bakeo. ⁵ Le ho zarae iereo ho faritre fito zay. Joda hijano agne amity faritane ty agne antimo, naho ty foko Josefa hanohy ty faritane iereo agne avaratre. ⁶ Faritre fito ro hamaritanareo ty tane naho aheregno amiko eto ty famarita. Le hanao antsapake ho anareo raho eto agnoloa Yaveh Zagnaharentika. ⁷ Reo Levita le tsy mana anjara eo aminareo, fa ty soro ho ahy Yaveh ro lova iereo. Gada, Robena, naho ty antsasa ty foko Manase le nahazo ty lova iereo, tagne andafe Jordana. Zay ro lova ze namea Mosesy mpanompo Yaveh iereo." ⁸ Le nifoha reo lahilahy ka nindeha. Le linily Josoa reo ze nindeha namaritre ty tane, nanao hoe:" Mindehana mitete ty tane ka farito zay naho miheregna amiko eto. Le hanao antsapake ho anareo eto agnoloa Yaveh atoy Silo raho." ⁹ Le nindeha reo lahilahy ka nitete ty tane ambone vaho ty ambane naho namaritre zay tagnate sare-sare arake reo tanane agnate faritre fito, handahara reo nihere isake ty faritre kirai-kiraike. Le nihere tagne amy Josoa tao antobe tao Silo iereo bakeo. ¹⁰ Le nanao antsapake ho ahy iereo tao Silo teo agnoloa Yaveh ty Josoa. Tao ro nanendrea Josoa ty tane ho ahy ty vahoake Israely, naho ty kirai-kiraike le sambe namea ty anjara tanene iaby. ¹¹ Ty fanendrea ty tane ho ahy ty foko i Benjamina le namea ty isam-poko iereo kirai-kiraike. Ty faritane ty tane ze voatendre ho ahy iereo le voafaritre teo agnivo reo foko Joda vaho reo foko Josefa. ¹² Tane amity ilane avaratre, tane Jordana ro nanomboha ty faritane iereo. Ty feritane le niakatre zisikagne amity ilane avaratre Jeriko, naho bakeo niakatre namakivaky ty tane tazoa ahandrefa. Zisikeo zay le nahazo ty efetre Betavena. ¹³ Zisikeo le nandrio niagnantimo nahazo nimbeo Lozy( Betela zay) ty faritane. Bakeo nizotro zisikagne amy Atarot-adara ty faritane, ao amity vohitse ze mandia ty antimo Beti-horona. ¹⁴ Nahazo nagnorike lalan-kafe ty sisin-tane noho zay: agne amity ilane ahandrefa zay ro miodike miagnantimo, le miodike amity vohitse andafe Beti-horona. Io sisin-tane eo le mifara agne Kiriata-bala (Kiriata-jearima zay), tana raike ze ahy ty foko Joda. Zay ro lasa faritane tagne amity faritre ahandrefa. ¹⁵ Nanomboke teo ambaly Kiriata-jearima ty ilane antimo. Niala teo ty faritane le nahazo i Efrona, zisikagne amireo loharano Neftoa. ¹⁶ Ty sisin-tane laha zao le nizotro nahazo ty magnodidy ty vohitse ze tandrife ty baibo Ben-hinoma, zay tane amity morone avaratre ty baibo Refaima. Le nizotro zisikagne amity baibo Hinoma zay, antimo ty ala reo Jebosita, naho nahazo nizotro zisikagne En-Rogela. ¹⁷ Le nitolike niagnavaratre zay, nahazo mbaeo En-semesy, naho bakeo le niakatre mbaeo Gelilota zay, ze tandrife ty fiakara Adomima. Naho nizotro zisikagne amity Vato Bohana anadahy Robena zay. ¹⁸ Nandroso zisike amity ilane avaratre Beti-araba zay naho nizotro mbaeo Araba. ¹⁹ Le nimbaeo nahazo ty ilane avara Beti-hogla ty faritane. Nifara tagne amity helo-drano avara ty riake zay, agne amity morone antimo Jordana, Zay ro sisin-tane tagne antimo. ²⁰ Le lasa faritane Jordana ty ilane antignana. Zay ro lova ty foko Benjamina, naho nanolotre ty isam-poko iereo kirai-kiraike, faritane isa-paritane, ty magnodidy iaby. ²¹ NAho reo tana ty foko Benjamina arake ty isam-poko iereo le Jeriko, ²² Beti-Hogla, Emeka Keziza, Bet-araba, Zemaraima, Betela, ²³ Avima, Para, Ofra, ²⁴ Kefara-Hamony, Ofny, naho Geba. Roe amby folo reo tana reo, agnate zay reo ana-bohine. ²⁵ Ao avao kea reo tana Gibeona, Rama, Berota, ²⁶ Mizpa, Kefira, Moza, ²⁷ Rekema, Irpela, Tarala, ²⁸ Zela, Haelefa, Jebosita (Jerosalema zay), Gibea, naho Kiriata, agnate zay reo ana-bohine. Zay ro lova Benjamina ho ahy ty foko iereo.