1 Toy ro zara-tane ty foko Manase (zay anadahy Josefa voalohane) __zane hoe, ho ahy Makira, ze anadahy Manase voalohane vaho ty vatane ze rae Gileada. Ty tane Gileada vaho Basana le tinendre ho ahy reo foko Makira, satria Makira le lahilahin'Aly. 2 Ty tane le tinendre ho ahy ty sisa ty foko Manase, namea reo fokone iereo__le i Abi-ezera, Heleka, Asriela, Sekema, Hefera, naho Semida. Reo ro foko lahy Manase anadahy Josefa, natolotre reo foko iereo. 3 Naho Tselofehada anadahy Hefera ana i Gileada ana i Makira ana i Manase le tsy nanagnanake lahy, fa anakampela avao. Toa iaby ty agnara reo anane ampela: Mahala, Noha, Holga, Milka, naho Tiriza. 4 Namonje i Eleazara ty mpisoro, Josoa anadahy Nona, vaho reo olobey iereo, naho hoe iereo hoe:"'Yaveh ro nandily i Mosesy hagnomea antika lova miarake amireo rahalahintika." Laha zao, ty fagnoriha reo lily Yaveh, ro nagnomeane lova ho ahy reo ampela reo teo amireo rahalahin-drae iereo. 5 Ty zaran-tane folo tao Gileada vaho Basana le tinendre ho ahy Manase, ze egne andafe Jordana, 6 satria reo anakampela Manase le nandrae lova niarake tamireo anadahine. Ty tane Gilieada le tinendre ho ahy ty sisa ty foko Manase. 7 Ty faritane Manase le avy zisikagne Asera ka zisikahne Mikmetata, ze agne antignana Sekema. Naho ty sisin-tane le nindeha niagnantimo nimbaeo amireo ze mitoboke agnila ty faritane Topoa. 8 (Ty tane Topoa le ahy Manase, feie ty tanam-bey Topoa eo amity sisin-tane Manase kea le ahy ty foko Efraima.) 9 Ty faritane le mizotro mbaeo amity baibon-driake kana. Reo tana antimo ty baibon-driake eo amity tanam-bey Manase le ahy Efraima. Ty faritane Manase le agne avaratre ty baibon-driake, naho mifara agne amity riake. 10 Ty tane agne antimo le ahy Efraima, naho ty tane agne avaratre le ahy Manase; ty riake ro efetane. Agne amity sisine avara Asera, ka zisikagne amity antignana, le Isakara. 11 Ahy Isakara vaho ahy Asera avao kea, Manase le nana i Beti-sana vaho reo tanane, Ibleama vaho reo tanane, reo vahoake Dora vaho ty tanane, reo vahoake En-dora vaho ty tanane, reo vahoake Tanaka vaho ty tanane, naho reo vahoake Megido vaho ty tanane (naho ty tana fahatelo le Naftea). 12 Mboe tsy afake mangalake ho fanagna reo tana reo ty foko Manase,satria reo Kananita le mboe mitoboke ao amy tane eo. 13 Laha fa niha-mafe ty vahoake Israely, le tinahiry iereo hiasa reo Kananita, fa tsy rinoa iaby. 14 Bakeo reo foko Josefa nirehake tamy Josoa, nanao hoe:" Nagnino ro asa ty tane raike avao ro natolonao ho anay naho zara raike amity lova, kanefa vahoake maro agnisa zahay, naho le fa nitahie Yaveh zahay iaby? 15 Hoe Josoa tamiereo:" Laha vahoake maro agnisa nareo, le miarake agne agnate ala ty vatanareo naho tampaho reo hetae ao amity tane Perizita vaho Refaita agne. Anovo zay, satria ty tazoa ty firene Efraima le kele ho anareo." 16 Hoe reo foko Josefa:" Tsy ampe anay ty tazoa. Fa reo Kananita ze mitoboke agne amity baibo le mana kalese vy, reo agne Beti-sana vaho ty tanane, naho reo ze agne amity baibo Jezirela. 17 Naho hoe Josoa tamity foko Josefa tamy Efraima vaho Manase:" Vahoake maro agnisa nareo, naho mana here bey. Tsy tokone ho zara-tane raike avao ro tinendre ho anareo. 18 Ty tazoa avao kea le ho anareo. Na ty ala zay, le ho tampahenareo ka anovo fanagna zisikagne amity sisine lavitre vatane zay. Hagnakatre reo Kananita nareo, na le mana kalese vy aza iereo, na le mafe aza iereo."