¹ Ty zara-tane ty foko i Josefa le nihabey nanomboke tagne Jordana ka zisikagne Jeriko, antignana ty loharano Jeriko, mbaeo agnefetre, niakatre bakao Jereiko zisikagne amity tane tazoa Betela. ² Bakeo zay le nimbaeo Betela ka zisikagne Lozy naho namakivaky zisikagne Atarota, ty fari-tane ty Arkita. ³ Le nizotro nagnandrefa nahazo ty faritane ty Jafletita zay zisikagne amity faritane ambane i Bedhorona, naho bakeo nimbaeo Gazera; le nifara tagne amity riake. ⁴ Zay ro fomba nahazoa reo foko Josefa, Manase vaho Efraima ty lova iereo. ⁵ Ty faritane ty foko Efraima ze tinendre ho ahy ty foko iereo le manahake ze magnarake zao: ty faritane ty lova iereo agne antignana le niala i Atarot-adara nimbaeo Beti-horona ambone, ⁶ naho nitohy zisikagne andriake zay. Bakagne Mikmeta avaratre zay ro nivio nianignana nimbaeo Tanata-silo naho nahazo ty sisin-tane agne antignana zisikagne Janoha. ⁷ Le nizotro bakagne Janoha nahazo i Atarota vaho Narata zay, naho bakeo nahatratre Jeriko, naho niafara tagne Jordana. ⁸ Bakao Tapoa ty faritane le nahazo niagnandrefa ho amity baibo kana naho niafara tagne andriake. Zay ro lova ty foko Efraima, voatendre ho ahy ty longo iaby iereo, ⁹ niarake tamireo tana ze finily ho ahy ty foko i Efraima amity lova ty foko Manase__reo tana iaby, amireo vohitse iereo. ¹⁰ Tsy nandroake reo Kananita ze nitoboke tagne Gazera iereo, ka mivelo miarake amy Efraima zisikezao reo Kananita, feie nampanoe asa antseresere reo vahoake reo.