1 Naho Yaveh nirehake tamy Josoa hoe:" 2 Mirehafa amity vahoake Israely, manao hoe:" Tendreo reo tana fialofa ze rinehako aminao tamity tana i Mosesy. 3 Anovo zay mba hahafaha ze namono ndaty tsy nahy mbaeo. Reo tana reo le ho toera fialofa amity ndaty ze mipay hamale fate ty lio ty ndaty ze mate. 4 Hilay agne amity raike amireo tana reo re ka hitsanga eo amity filira ty vavahady ty tana, naho hagnazava ty zaka nahazo aze amireo olobey ty tana ao. Bakeo le ho raese iereo ao amity tana re naho hagnomea toera hitoboha miarake amiereo ho aze. 5 Laha misy raike amireo miezake mamale fate ty lio ty ndaty vonoe, le tsy ho atolo reo vahoake eo antana amireo manam-pahefa ty raike ze namono aze. Tsy tokone hanao zay iereo satria namono tsy nahy ty mpirai-belo tamine re, naho tsy nana falay tamine re taloha. 6 Tsy maintsy mijano ao amize tana zay re mandram-pitsangana eo agnoloa ty fiangona ho tsarae, mandram-pahafate ty raike ze nanompo manahake ty mpisorombey tamize andro zay. Naho ty raike ze namono tsy nahy ty ndaty le afake hihere agne antanane vaho ty tragnone, agne amity tanam-bey ze nilaisane."' 7 Ka le nifily i Kadesa ao Galilia tao amity tane tazoa i Naftaly, Sekema ao amity tane tazoa Efraima, naho Kiriat-arba (mitovy amy Hebrona) ao amity tane tazoa Jodia reo Israelita. 8 Tane andafe Jordana antignana Jeriko, le nifily i Bezera tagne agnefetre teo amity tane gebo bakamity foko Robena; Ramota Gileada, bakamity foko Gada; naho Golana ao Basana, bakamity foko i Manase iereo. 9 Reo tana reo ro finily ho ahy ty vahoake Israely iaby vaho ho ahy reo vahiny mitoboke miarake amiereo, mba hahafaha ze namono ndaty tsy nahy milay agne amiereo ampilamina. I ndaty io le tsy ho mate ty tagna ty raike ze ho namale fate ty lio ze napoke, mandram-pitsanga ty ndaty voata eo agnoloa ty fiangona.