¹ Laha fa rey Jabina, mpanjaka i Hazora zay, le nandefa talily ho ahy Jobaba, mpanjaka i Madona, vaho ty mpanjaka i Simrona, naho ty mpanjaka i Aksafa re. ² Nalefane tagne amireo mpanjaka ze agne amity tane tazoa avaratre, vaho tane amity baibo amity renerano i Jordana agne antimo Kinerota, vaho tane amity tane gebo, naho tane amity tane tazoa Dora mbaeo ahandrefa avao kea aty ty talily. ³ Nandefa talily tagne amireo kananita mbaeo antignana vaho ahandrefa, vaho tane amireo Amorita, reo Hetita, reo Perizita, reo Jebosita agne amity tane tazoa, vaho tane amireo Hivita agne amity Vohitse Hermona agne amity tane i Mizpa avao kea re. ⁴ Niakatre niarake tamiereo iaby ty tafike iereo iaby, miaramila maro agnisa, hoe ty faseke egne amoron-driake. Nana soavale vaho kalese maro agnisa iereo. ⁵ Nifanoje tamity lera voatondro reo mpanjaka iaby reo, naho nitobe teo amity rano i Meroma mba hialy amy Israely. ⁶ Hoe Yaveh tamy Josoa hoe:" Ko matahotre eo amity fiatreha iereo, satria hamaray amize andro zao le manolotre iereo amy Israely iaby manahake ty nadty mate raho. Ho vonoe ty soavale iereo, naho horoa ty kalese iereo." ⁷ Le avy Josoa vaho reo lahilahy mpialy iaby. Avy tampoke tagne amity rano i Meroma iereo, ka nanafike ty fahavalo. ⁸ Natolo Yaveh teo antagna Israely ty fahavalo, naho nagnisy iereo tamity meso vaho nagnia iereo tagne Sidona, Misrefota-maima, vaho tagne amity Baibo Mizpa agne antignana iereo. Namono iereo re mandram-pilaniane. ⁹ Natao Josoa tamiereo arake ze nirehafe Yaveh tamine. Nataone nandrava reo soavale naho noroane reo kalese. ¹⁰ Nihere ty Josoa tamize andro zay naho nangalake i Hazora. Tinombone tamity meso ty mpanjaka tao. (Loha reo fanjakana iaby reo ty Hazora.) ¹¹ Vinono iereo tamity meso ty zaka-velo iaby ze tao, naho natokane ho ravae reo, ka le tsy nisy zaka-velo tavela. Bakeo noroane ty Hazora. ¹² Lasa Josoa iaby ty tana reo mpanjaka iaby reo. Tsinepane avao kea ty mpanjaka reo iaby naho tinombone tamity meso. Rinavane vatane tamity meso iereo, arake ty nandilia i Mosesy mpanompo Yaveh. ¹³ Tsy nagnoro reo tana niore tegne amity dogon-tane ty Israely, laha tsy Hazora. Io avao ro noroa Josoa. ¹⁴ Nalae ty tafike Israely ty babone iaby bakamireo tana reo niarake tamity biby hare mba ho ahy iereo. Vinono iereo tamity meso ty ndaty iaby mandram-pilaniane iaby. ¹⁵ Tsy nisy zaka-velo nenga iereo ho velo. Arake ty nandilia Yaveh i Mosesy mpanompone, le manahake zay kea, ro nandilia Mosesy i Josoa, ka natao Josoa zay. Tsy nisy zaka nengane tsy ho vita iaby ze nandilia Yaveh hatao. ¹⁶ Nalae Josoa iaby zay tane iaby zay. ty tane tazoa, Negeva iaby, ty tane Gosena iaby, reo gebo amoron-tsirake, baibo y rano Jordana, ty tane tazoa Israely, naho reo tane gebo. ¹⁷ Zisikagne amity vohitse Halaka agnila Edoma, vaho nagnavaratre lavitre manahake i Bala-gada taneb amity baibo agnila i Libanona ambane ty Vohitse Hermona, le tsinepane iaby ty mpanjaka iereo naho vinonone. ¹⁸ Le fa ela Josoa ro nialy tamireo mpanjaka iaby. ¹⁹ Tsy nisy tana nanao filongoa tamity tafike Israely laha tsy reo Hivita ze nitoboke tagne Gibeona. Lasa Israely iaby reo tana sisa tavela agnaly. ²⁰ Satria Yaveh ro nagnamafe ty arofo iereo, mba hahafahane mamoteke vatane iereo tsy misy fandefera, arake ty nandilia Mosesy. ²¹ Bakeo avy Josoa Tamize andro zay ka pinotene Anakima. Nataone tagne amity tane tazoa, tagne Hebrona, Debira, Anaba, naho reo tane tazoa Joda iaby zay, vaho tane amity tane tazoa Israely iaby. Pinote Josoa vatane iereovaho reo tana. ²² Tsy nisy Anakita sisa teo amity tane Israely laha tsy i Gaza, Gata, naho Asdoda. ²³ Laha zao le lasa Josoa Iaby ty tane iaby, arake ty safa Yaveh tamy Mosesy. Namea Josoa ho lova Israely zay, tinondro ho ahy reo foko kirai-kiraike. Bakeo ty tane nijano amity aly.