1 Naho laha fa rey Adoni-zedeka, mpanjaka i Jerosalema, fa babo Josoa ty Ay naho pinotene vatane zay (manahake ty nanaovane Jeriko vaho ty mpajakane), reine avao kea fa le fa nilongo ty vahoake Gibeona vaho ty Israely naho niara nitoboke iereo. 2 Le natahotre vatane ty vahoake Jerosalema satria Gibeona le tanam-bey, manahake ty raike amireo tanan-droandria. Bey tane Ay zay, naho ty lahilahy le mpialy mahere iabike. 3 Laha zao Adoni-zedeka, mpanjaka Jerosalema, le nandefa talily tagne amy Hohama, mpanjaka Hebrona, tagne amy Pirama, mpanjaka Jarmota, tagne amy Debira, mpanjaka Eglona ty hoe: 4 "Miakara amiko atoy naho ampeo raho. Ndao ho tafihentika ty Gibeona satria iereo le fe nilongo tamy Josoa vaho tamity vahoake Israely." 5 Reo mpanjaka dime Amorita, ty mpanjaka Jerosalema, ty mpanjaka Hebrona, ty mpanjaka Jarmota, ty mpanjaka Lakisy, naho ty mpanjaka Eglona le niakatre, iereo vaho reo tafine iaby. Nametrake ty hevetse handiera i Gibeona iereo, naho nanafike zay. 6 Nandefa talily tagne amy Josoa vaho tagne amity tafike tagne Gilgala ty vahoake Gibeona. Hoe iereo ty hoe:" Malaky! ko afaha eo amity mpanomponareo tyn tagnanareo. Miakara malaky atoy aminay, naho vonjeo zahay. Ampeo zahay, satria reo mpanjaka ty Amorita iaby mitoboke egne amity tane tazoa le fa niharo raike mba hanafike anay." 7 Niakatre bakagne Gilgala ty Josoa, re vaho reo lahilahy mpialy iaby niarake tamine, naho reo lahilahy mpanafike iaby. 8 Naho Yaveh nirehake tamy Josoa hoe:" Ko matahotre iereo. Le fa nomeako ho eo antagnanao iereo. Tsy hisy na raike amiereo hanaka ty fagnahinao." 9 Niavy tampoke teo amiereo Josoa, laha fa nindeha zisike ty hale iaby bakagne Gilgala. 10 Nasafotofoto Yaveh teo agnoloa Israely ty fahavalo, naho Israely namono iereo tamity famonoa bey tao Gibeona naho nagnia iereo tamity lala miakatre mbaeo Beti-horona, naho iereo namono iareo tegne andala mbaeo Azeka vaho Makeda. 11 Laha nilay ty Israely iereo, nizotro ty vohitse bakagne Beti-horona, Yaveh nanorake vato bey bakegne amity lagnitse teo ambone iereo tamity lala iaby mbaeo Azeka, naho mate iereo. Maro reo mate ty havandra tane ty mate ty meso reo lahilhay Israely. 12 Naho Josoa nirehake tamy Yaveh tamity andro nagnomea Yaveh ty lahilahy Israely fandresea teo agnoloa reo Amorita. Zao ty reha Josoa tamy Yaveh teo agnoloa Israely:" Ry masoandro, mijanogna ao Gibeona, naho ty vola, ao amity baibo Aialona." 13 Le nijano ty masoandro, naho nijano ty vola zisike ty hamalea ty firene fate reo fahavalone. Tsy voasoratre ao agnate Boke Jasara vao zay? Ty masoandro nijano teo agnivo ty raho; tsy nitsofotse le fa ho andro raike zisike zay. 14 Tsy nisy andro hafa manahake zay taloha na tafara io, laha fa nanenke ty feo ty ndaty Yaveh. Satria Yaveh le nialy ho ahy Israely. 15 Nihere tagne antobe tagne Gilgala Josoa vaho reo Israely iaby niarake tamine. 16 Reo mpanjaka dime nilay vaho nietake tao agnate lava-bato tao Makeda. 17 Le nirehafe tamy Josoa zay ty hoe:" Le fa hisake iereo!__mietake ao agnate lava-bato ao Makeda reo mpanjaka dime!" 18 Hoe ty Josoa ty hoe:" Magneregna vato bey eoamba ty lava-bato naho mametraha miaramila ao mba hiambe iereo. 19 Fa ko mijano nareo. Hiagno ty fahavalonareo naho tafiho bakao afara iereo. Ko enga hilitse ty tana iereo, satria Yaveh Zagnaharenareo le fa nanolotre iereo ho eo antagnanareo." 20 Josoa vaho reo anagn'Israely le fa namoteke iereo tamity famonoa bey, zisike hahapoteke iereo vatane; reo ze sisa velo avao ro afake nilay namonje ty tana manda. 21 Naho ty miaramila iaby nihere ampilamina tagne amy Josoa tao antobe tao Makeda. Tsy nisy na raike nahavany nirehake mandietse ty vahoake Israely. 22 Naho Josoa nanao ty hoe:" Sokafo ty lava-bato naho ento miakatre bakao teo amiko reo mpanjaka dime." 23 Le natao iereo arake ze nirehafene. Niente iereo bakao andava-bato ho eo amine reo mpanjaka dime__ty mpanjaka Jerosalema, ty mpanjaka Hebrona, ty mpanjaka Jarmota, ty mpanjaka Lakisy, naho ty mpanjaka Eglona. 24 Laha fa niavy iereo teo amy Josoa reo mpanjaka, le nikaike ty lahilahy Israelyn iaby re. Nirehake tamireo mpifehe ty miaramila ze niarake tamine tagne agnaly re ty hoe:" Atoboho eo amity vozone ty tombonao." Le niakatre iereo naho nemetrake ty tombone teo amity vozogniereo. 25 Naho hoe re tamiereo ty hoe:" Ko matahotre naho ko mivali-po. Mahereza vaho mimafea. Zao ro hatao Yaveh amireo fahavalonao iaby ze indehananao hialy." 26 Naho Josoa namle vaho namono reo mpanjaka dime. Nahantone tamity hetae dime iereo. Nihanto teo amity hetae iereo zisike hahariva ty andro. 27 Laha ty tsofotse andro igne, le nagnomea baiko Josoa, ka nazotro iereo bakeo amity hetae iereo naho natorake tao agnate ty lava-bato ze nihajane. Nasia iereo vato bey ty vava ty lava-bato. Mboe ao reo vato reo zisike androany. 28 Hoe zay, ro nambaboa Josoa i Makeda tamize andro zay, vaho namonoane ty ndaty iaby tao tamity meso, agnate zay ty mpanjakane. Pinotene vatane iereo vaho reo zaka velo iaby tao. Tsy nisy nengane ho velo. Manahake ty nataone tamity mpanjaka i Jeriko avao ro nataone tamity mpanjaka i Makeda. 29 Niala bakao9 Makeda ho agne Libna Josoa vaho reo Israely iaby. Le nialy tamy Libna re. 30 Nomea Yaveh ho eo antagna Israely avao kea zay__hatramity mpanjakane. Josoa nagnisy ty zaka velo iaby tao tamity meso. Tsy nasiane nenga tao. Manahake ty nagnanovane ty mpanjaka i Jeriko avao ro nagnanovane ty mpanjaka. 31 Naho nindeha bakao Libna ho agne Lakisy ty Josoa vaho reo Israely iaby niarake tamine. Nitobe tao re naho nialy tamine. 32 Le natolo Yaveh teo antagna Israely ty Lakisy. Tamity andro faharoe ro nambaboa Josoa aze. Naravane tamity meso ty zaka velo iaby tao, manahake ty nagnanaovane i Libna. 33 Naho Horama, mpanjaka Gazera, niakatre mba hagnampe i Lakisy. Fa Josoa nagnisy aze vaho ty tafine zisike ty nilaniane na le raike aza. 34 Naho Josoa vaho reo Israely iaby niarake tamine niala bakao Lakisy ho agne Eglona. Nitobe tao vaho nialy tamy iereo, 35 naho nambabo aze tamio andro o avao. Nagnisy zay tamity meso iereo naho nandrava vatane ty ndaty iaby tao, manahake ty nagnanova i Josoa i Lakisy. 36 Naho nindeha bakao Eglona Josoa vaho reo Israely iaby ho agne Hebrona. Nialy tamine iereo. 37 Nangalake iereo naho namofoke ty ndaty iaby tao tamity meso, agnate zay ty mpanjaka vaho reo ana-bohine iaby magnodidy. Rinava iereo vatane ty zaka-velo iaby tao, tsy nisy nienga, manahake ty nanaova Josoa i Eglona. Rinavane vatane zay, vaho reo zaka-velo iaby tamine ao. 38 Le nihere Josoa, vaho ty tafike Israely iaby niarake tamine, ka nimbaeo Debira iereo naho nialy tamine. 39 Nangalake zay vaho ty mpanjakane re, naho reo ana-bohine nagnenke iaby. Namofoke iereo tamity meso iereo, naho nandrava vatane reo zaka-velo iaby tao amine. Tsy nisy nenga Josoa hindeha, manahake ty nagnanovane i Hebrona vaho ty mpanjakane, vaho manahake ty nagnanovane i Libna vaho ty mpanjakane. 40 Josoa naharese ty tane iaby, ty tane tazoa, Negeva, reo tane iva, naho reo foton-tazoa. Tsy nisy nengane hindeha na le raike tamireo mpanjakane iaby. Rinavane vatane reo zaka-velo iaby, manahake ty le fa nandilia Yaveh, Zagnahare Israely. 41 Josoa namofoke iereo tamity meso nanomboke tao Kadesy-bernea ka zisikagne Gaza, vaho ty tana ty Gosena iaby ka zisikagne Gibeona. 42 Josoa nangalake ndraike reo mpanjaka iaby reo vaho ty tanene satria Yaveh, Zagnahare Israely, ro nialy ho ahy Israely. 43 Naho Josoa, vaho reo Israelita iaby niarake tamine, le nihere tagne amity tobe tao Gilgala.