¹ Naho reo mpanjaka iaby ze nitoboke tagne andafe Jordana tagne amity tane tazoa, vaho tagne amireo lemake amoron-driake ty Riake bey tandrife Libanona__reo Hitita, Amorita, Kananita, Perizita, Hivita, naho reo Jebosita__ ² reo le niraike ho eo ambane fifehea raike, mba hananga aly amy Josoa vaho Israely. ³ Laha fa rey reo vahoake Gibeona ze natao Josoa tamy Jeriko vaho tamy Ay, ⁴ le nanao hevetse fahihira iereo. Nindeha ho irake iereo. Ninday kitapo riatre iereo naho nasampene tamity borike iereo. Ninday siny holitse zay riatre, rovitse, vaho le fa namboare avao kea iereo. ⁵ Kapa riatre vaho mitampe ro tegne antombo iereo, naho nisiky faela, siky riatre. Reo mofo iaby tao amity fitoeram-batse iereo le kina vaho bobongolo. ⁶ Le nindeha tagne amy Josoa tagne antobe tagne Gilgala iereo ka nirehake tamine vaho tamireo lahilahy Israely ty hoe:" Le fa nindeha bakagne amity firene vatane lavitse zahay, ka amizao manaova fifankea aminay." ⁷ Hoe reo lahilahy Israely tamireo Hivita ty hoe:" Asa nareo mitoboke marine anay avao. Hataonay akore ty hanao fifagnenkea aminareo?" ⁸ Hoe iereo tamy Josoa:" Mpanomponao zahay." Josoa namale iereo ty hoe:" Fa ia nareo? Baka aia ro niboahanareo?" ⁹ Hoe iereo tamine:" Bakagne amity tane vatane lavitse mpanomponao toa, noho ty agnara Yaveh Zagnaharenareo. Reinay ty tatetre momba aze vaho momba iaby ze nataone tagne Egypta__ ¹⁰ naho iaby ze nataone tamireo mpanjaka ty Amorita roe tagne andafe Jordana__tamy Sihona mpanjaka i Hesbona, vaho tamy Oga mpanjaka i Basana te tagne Astarta. ¹¹ Hoe reo beinay vaho reo vahoake iaby tagne amity firenenay taminay ty hoe:' Mindaisa vatse egne antagnanareo ho amity lia. Mindehana mifanoje amiereo naho ambarao iereo hoe:" Mpanomponareo zahay. Manova fifagnenkea aminay." ¹² Toy ty mofonay, mboe nafana toy tamy zahay nangalake aze toy tagne antragnonay tamity andro nindenanay hombaminareo atoy. Kanefa zao, ingo, maike vaho bobongolo toy. ¹³ Ty kitapo holitse toa le vaovao tamity nagnomeanay aze eo, le ingo, mite iereo amizao. Reo siky vaho reo kapanay le simba noho ty lia tena lavitse."' ¹⁴ Le nangalake tilane tamity vatsene reo Israelita, nefa tsy nangalake hevetse tamy Yaveh iereo ho fitarike. ¹⁵ Josoa nilongo tamiereo vaho nanao fifagnenkea tamiereo, mba hagnenga iereo ho velo. Reo mpitarike ty vahoake avao kea le nanao vava tamiereo. ¹⁶ Telo andro tafara ty nanaova reo Israelita zay fifagnenkea zay tamiereo, le hay iereo te hay mpiray mone iereo naho nitoboke nifankarine teo. ¹⁷ Bakeo le nindeha ty vahoake Israely naho niavy tagne amity tana iereo tamity andro fahatelo. Ty tana iereo le Gibeona, Kefira, Berota, naho Kiriata Jearima. ¹⁸ Tsy nanafike iereo ty vahoake Israely satria reo mpitarike iereo le fa nanao fifanta momba8 aze teo agnoloa Yaveh, Zagnahare Israely. Nimenomeno reo Israelita iaby reo mpitarike iereo. ¹⁹ Ka heo reo mpitarike iaby tamity vahoake iaby:" Nanao fifanta nahakasike iereo tamy Yaveh, Zagnahare Israely zahay, naho tsy afake hanao raty iereo tika amizao. ²⁰ Zao ro hataontika amiereo: Mba hiala amity heloke ze mete hisy amintika noho ty fifanta nifantantika tamiereo, le engantika ho velo iereo." ²¹ Hoe reo mpitarike tamity vahoake iereo:" Engao iereo ho velo." Laha zao, reo Gibeonita le lasa mpanapa-ketae vaho mpantsaka rano ho ahy reo Israelita iaby, arake ze nirehafe reo mpitarike momba iereo. ²² Nikaike iereo Josoa ka nanao ty hoe:" Nagnino nareo ro namitake anay laha nanao ty hoe:' Tena lavitse anareo zahay,' nefa nareo mitoboke eto aminay? ²³ Amizao, noho zay, le voaozo nareo naho ty ilane aminareo le ho andevo avao, reo ze manampa-ketae vaho mantsaka rano ho ahy ty tragnon'Agnahareko." ²⁴ Namale Josoa iereo ka nanao ty hoe:" Satria nirehafe tamitoa mpanomponao fa Yaveh Zagnaharenao nandily Mosesy mpanompone mba hagnomea anao ty tane iaby, naho hamoteke reo vahoake ty tane iaby eo agnoloanao__laha zao le natahotre mafe ty amity arofone zahay noho riha. Zay ro nahavy anay nanao zao zaka zao. ²⁵ Amizao, ingo, tano amity fahefanao zahay. Na ino ino ty soa vaho mare aminao hatao aminay, le anovo zay." ²⁶ Le zao ro natao Josoa ho ahy iereo: nafahane tsy ho eo ambane fifeheza ty vahoake Israely iereo, naho tsy vinono reo Israelita. ²⁷ Natao Josoa mpanampake hetae vaho mpantsaka rano ho ahy ty fiarahamone, vaho ho ahy ty alitara Yaveh reo Gibeonita tamio andro o, zisike androany, eo amity toera zay filie Yaveh.