¹ Hidiso ty iem-pito eo amine ty tao agnate ty hirifiry. Tamity taloha le nagnafa-baraka ty tane Zebolona vaho ty tane Naftaly Re, nefa amity andro tafara atoy le hanao zay ho bey hasy re, vaho lala mbaeo amity riake, agne andafe Jordana, reo firene Galilea. ² Le fa nahisake hazavam-bey ty vahoake ze mindeha amity ieke; reo ze le fa nivelo tao amity tane ty aloke ty fate, le fa namirapiratre teo amiereo ty hazava. ³ Le fa nagnamaro ty firene Riha; le fa nanombo ty hafalea iereo Riha. Mifale magnoloa anao iereo manahake ty hafalea amity andro ty fihaza, hoe ty ndaty fale laha fa mizara ty voarebake iereo. ⁴ Tinorotoronao hoe ty tamity andro Midiana ty zoga mavesane, ty ambe teo antsorone, ty tsila-ketae ty mpampijale aze. ⁵ Fa ty kiraro iaby ze mandia eo amity koronta vaho reo akanjo mihoso-dio, le ho roa, atao solike ho ahy ty afo. ⁶ Fa kolo ro terake hoantika, ajalahy ro namea antika, naho ty fandilia ho eo amity sorone; naho ty agnarane hatao ty hoe mpagnomea hevetre mahagaga, Zagnahare Mahere, Rae zisikagne, Roandriandahy ty filamina. ⁷ Amity fitomboa ty Governemantane vaho amity filamina le tsy hisy farane, laha mandily eo amity sezan-droandria Davida Re, vaho eo amity fanjakane, mba hametrahane vaho hanohagnane zay amity rarene vaho hamarea tamity nanomboke tamio andro o naho ho zisikagne. Ty zotom-po Yaveh Tompo ty maro ro hanao zay. ⁸ Nandefa rehake ho ahy Jakoba ty Tompo, naho niavy teo amy Israely zay. ⁹ Ty vahoake iaby hahay, na le Efraima vaho reo vahoake Samaria, ty mirehake amity avognavo vaho rehareha ty arofone hoe: ¹⁰ "Le fa nitonta reo borike, nefa hatsagantika ndraike amity vato fandrake zay; le fa voatampake reo amonta, fa ho soloentika sedera eo amity toerane." ¹¹ Laha zao hitsanga handietre aze Yaveh le Rezina, ty mpifanao amine, naho handrisike reo fahavalone, ¹² le reo Syriana bakagne antignana, naho reo Filistina bakagne ahandrefa. Handrava ty Israely amity vavane mihagnahagna iereo. Amize zaka iaby zay, tsy niegne ty helone; fa kea, mboe vototre ty tagnane. ¹³ Nefa ty ndaty tsy himpoly amine ze nagnisy iereo, na hipay Yaveh Tompo ty maro. ¹⁴ Ka le ho tampahe Yaveh ty loha vaho ty solo Israely, ty tahon-drofia vaho ty volontara, ao agnate ty andro raike. ¹⁵ Ty mpitarike vaho ty ndaty soa amity hajae ro lohane; naho ty mpaminane ze magnanatre vande ro solone. ¹⁶ Reo ze mitarike reo vahoake reo ro mitarike iereo amity lalan-diso, naho reo ze mitarike iereo ro voatele. ¹⁷ Laha zao tsy ho fale amity ajalahy iereo ty Tompo na hana fiferenaigna eo amity bode iereo vaho reo mpivem-bata Re, satria ty ndaty iaby mpihatsaravelatsihy vaho mpanao raty, naho ty vava iaby mirehake hagegea. Amize zaka iaby zay, le tsy miegne ty helone; fa kea, mboe vototre ty tagnane. ¹⁸ Fa ty haratia magnoro hoe ty afo; mandrava ty here vaho ty fatike zay; magnoro ty ala aza zay, te miakatre ao amity savorovoron-deboke. ¹⁹ Amity helo Yaveh Tompo ty maro ro magnoro ty tane, naho ty ndaty le hoe ty solike ho ahy ty afo. Tsy misy ndaty miferegnay ty rahalahine. ²⁰ Handany ty sakafo amity tagna havana iereo nefa kere avao; hihina ty hane amity tagna havia iereo nefa tsy ho entsake. Na le ty kirai-kiraike aza le hihina ty nofo ty sandrine avao. ²¹ Manase handrava i Efraima, naho Efraima handrava i Manase; ka hiarake hanafike Joda iereo. Amize zaka iaby zay, tsy hiegne ty helone; fa kea, mboe vototre ty tagnane.