¹ Loza hoahy reo ze manao lala tsy arake ty hitine naho manoratre lily tsy rarene. ² Tsy magnomea rarene reo mipay fagnampea iereo, mandrava ty ndatiko mahantra amity zone iereo, mandrava reo mpivem-bata, naho manao reo bode ho haza iereo! ³ Ino ro hataonao amity andro fitofa laha fa hoavy baka lavitre ty harava? Aminia riha ro hipay fagnampea, naho aia ro hagnenganao reo hareanao? ⁴ Tsy hisy na ino ino ho sisa, naho hanampify eo amireo gagra riha na ho lavo eo amireo mate. Amireo zaka iaby reo, le tsy hiegne ty helone; fa kea, ty tagnane le mboe vototre zisikagne. ⁵ Loza ho ahy reo Asyriana, ty tsila-ketae ty heloko, tsila-ketae ze hindaisako ty heloko! ⁶ Alefako handietre firene miavognavo vaho handietre ty vahoake ze miaretre ty heloko manafotre re. Mandily aze hangalake ty babo, hangalake ty haza, naho handia reo manahake ty fotake egne amireo lala raho. ⁷ Kanefa tsy zay ro kasaene, na hoe midineke hoe zay re. Ao agnarofone zay ty hoe handrava vaho handany firene maro zay. ⁸ Fa hoe re ty hoe:"Feie tsy mpanjaka iaby vao reo roan-drian-dahiko iaby?" ⁹ Tsy manahake Karkemisy vao ty Kalno? Tsy manahake i Arpada vao ty Hamata? Tsy manahake i Damaskosy vao ty Samaria? ¹⁰ Manahake ty nandresea ty tagnako reo fanjakana mpanompo sampe, ty saren-jaka sokitre iereo le foloay kea noho reo ahy Jerosalema vaho Samaria, ¹¹ manahake ze nataoko tagne Samaria vaho reo sampe zaka-foane, feie tsy hanao hoe zay amy Jerosalema vaho reo sampene avao kea vao raho?" ¹² Laha fa nahavita ty asane teo amity Vohitse Ziona vaho tao Jerosalema ty Tompo, le hagnasaze ty safa ty arofo miavo ty mpanjaka Asyria vaho ty hente feno avognavone raho. ¹³ Fa ie nirehake ty hoe:" Amity alala ty ozako vaho ty hamareako ro hiasako." Mana hazavan-tsay raho, naho le fa nagnafake ty vala reo vahoake. Le fa nangalareko ty harea iereo, naho manahake ty agnombelahy ro nandrotroako reo vahoake. ¹⁴ Hoe ty fitsepaha bakao amity akane, ro nangala ty tagnako reo harea ty firene, naho manahake ty famoria ty raike reo atoly nienga, ro hamoriako ty tane iaby. Tsy nisy nagnopake ty elane iereo na namoha ty vavane na nikorake." ¹⁵ Feie vao ty famaky hirehareha miomba ty vatane amity raike ze manao zay? Feie vao ty tsofa hiantsa kea ty vatane noho ty raike ze mandily amity alala zay? Zay le manahake ty hoe: tsila-ketae raike ze afake mindeha amireo ze mindeha zay na hoe ty hoe afake mindeha aloha ty tsila-ketae. ¹⁶ Laha zao le handefa fahiae eo amireo mpialy sangane Yaveh Tompo ty maro; naho eo ambane ty hasine le hisy fireheta manahake ty afo mireake. ¹⁷ Hizare afo ty hazava Israely, naho ty raike Masine ho lelan'afo; hagnoro vaho handrava reo fatine ao agnate ty andro raike avao zay. ¹⁸ Yaveh le hanimba ty hasy ty alane vaho ty tanene mamokatre, le ty fagnahy zay vaho ty vata zay; hanahake ty fiay ty ndaty marare miha-rerake zay. ¹⁹ Ho tsy ampe reo sisa tavela amireo hetae ty alane, ka na ty kolo aza afake hagnisake reo. ²⁰ Amize andro zay, reo Israely sisa, reo foko Jakoba ze nilay, le tsy hiraike amity raike ze naharese iereo sase, fa hianky amy Yaveh kea, le ty raike masy Israely. ²¹ Ze sisa amy Jakoba le hihere agne amity Zagnahare mahere. ²² Fa na ty ndatinao aza, ry Israely, le manahake ty faseke egne an-driake, ze sisa tavela amiereo avao ro hihere. Tinendre ty harava, arake ty hatake manofotre ty hamarea. ²³ Fa Yaveh Tompo tompo ty maro, le eo andalam-pindaisa ty harava ze tinendre magnera ty tane. ²⁴ Laha zao Yaveh Tompo tompo ty maro manao ty hoe:" Ry vahoakeko ze mitoboke ao Ziona, ko matahotre reo Asyriana." Hagnisy anao amity tsila-ketae re, naho hananga ty tehene aminao, arake ze natao reo Egyptiana. ²⁵ Ko matahotre aze, fa afake andro kele le hitofa ty heloko aminao, naho hitarike ty haravane ty heloko." ²⁶ Naho Yaveh tompo ty maro le handay ty karavasine amiereo, hoe ty tamity nahareseane i Midiana teo ambatolampy Oreba. Handay ty tsilan-ketae eo amity riake Re naho handay zay hoe ty nataone tao Egypta. ²⁷ Amize andro zay, ty vesane le hindeha bakeo amity soronao naho ty zogane bakeo amity vozonao. Naho ty zoga le ho rava noho ty havondraha. ²⁸ Niavy tao Aiata ty fahavalo naho nandrio i Migrona; tagne Mikmasy ro nivignirane reo vatsene. ²⁹ Nitsake tamity fandriogna iereo naho nitoboke tao Geba. Nihovitre ty Rama naho nilay ty Gibea Saoly. ³⁰ Mikoraha mafe, ry anakampela Galima! Ao ho tea, ry Laisy! Ezao ry Anatota mahantra. ³¹ Milay ty Madmena, naho reo vahoake Gebima le milay ho amity fiaro. ³² Amio andro o avao ro hijano ao Noba re ka hamoretre ty komondrone agne ambohitse ty anakampela Ziona, ty tazoa Jerosalema. ³³ Ingo, Yaveh Tompo tompo ty maro hanonta ty tsempagna amity hatonta raty; reo hetae lava vatane le hotampahe, naho abo ze le ho haborie. ³⁴ Hamaky reo mateve vatane amity ala amity famaky re, naho Libanona le hitonta amity hafoloaine.